Çin məktəblərində süni intellekt təhsili ilə bağlı yeni mərhələ başlayır. Şagirdlərə süni intellekt savadlılığı aşılanacaq, müəllimlər üçün isə ciddi qaydalar tətbiq ediləcək.

“Azərbaycan müəllimi” “Global Times”a istinadən xəbər verir ki, Çinin Təhsil Nazirliyi ibtidai və orta məktəblərdə süni intellekt təhsilini təşviq etmək məqsədilə iki əsas sənəd qəbul edib: 2025-ci il üzrə ümumi süni intellekt təhsili üzrə qaydalar və generativ süni intellektdən istifadə üzrə qaydalar. Bu sənədlər vasitəsilə Çin məktəblərində mərhələli və pilləli süni intellekt təhsil sistemi yaradılacaq, innovativ və məsuliyyətli kadrların yetişdirilməsi məqsədilə süni intellekt savadlılığına əsaslanan proqramlar həyata keçiriləcək.

Yeni proqramda ibtidai məktəblərdə əsas məqsəd şagirdlərdə maraq oyatmaq və ilkin idrak səviyyəsini formalaşdırmaqdır. Orta məktəbdə texniki prinsiplər və əsas süni intellekt tətbiqləri öyrədiləcək, yuxarı siniflərdə isə sistemli düşüncə və yenilikçilik qabiliyyəti inkişaf etdiriləcək.

Qaydalar müəllim və şagirdlər üçün ciddi etik və texniki çərçivələr müəyyən edir. İbtidai sinif şagirdlərinin açıq məzmun yaradan süni intellekt alətlərindən müstəqil istifadəsi qadağandır. Müəllimlərə isə dərsi əvəz etmək, suallara cavab vermək və qiymətləndirmədə süni intellektdən istifadə etmək, eləcə də şəxsi məlumat və imtahan suallarını AI sistemlərinə daxil etmək ciddi şəkildə qadağan edilir.

Bu təşəbbüslər süni intellekt texnologiyasının təhlükəsiz, səmərəli və etik istifadəsini təmin etməklə Çində süni intellekt əsaslı təhsilin yeni modelini formalaşdırmağı və gələcəyin texnoloji savadlı, sosial məsuliyyətli kadrlarını yetişdirməyi hədəf kimi müəyyənləşdirir.