“Yenilənmiş kurikulumda əsas götürülən prinsip akademik deyil, didaktik yanaşma, yəni şagirdlərin yaş xüsusiyyətlərinin nəzərə alınmasıdır. Eyni zamanda, spiral kurikulum prinsipləri tətbiq olunub. Əvvəlki kurikulumla müqayisədə əsas fərq də bundadır. Belə ki, əvvəlki kurikulumda bir məzmun xətti, əsasən, bir sinifdə daha ağır şəkildə işlənirdi”.

“Azərbaycan müəllimi” xəbər verir ki, bu fikirləri bu gün 2025-2026-cı tədris ilində ümumtəhsil müəssisələrinin VIII siniflərində tətbiq olunacaq yeni nəsil “Fizika” dərslik komplektinin məzmun və tədris texnologiyasının xüsusiyyətlərinin müzakirəsinə həsr edilmiş vebinarda VII və VIII sinif “Fizika” dərsliklərinin həmmüəllifi Yalçın İslamzadə səsləndirib. 

O bildirib ki, əvvəllər yaranan əsas problemlərdən biri də dərslik və kurikulumların hazırlanmasında şagirdlərin yaş xüsusiyyətlərinin nəzərə alınmaması idi: “Lakin sonrakı təcrübələrin ümumiləşdirilməsi göstərdi ki, şagirdlərə hər hansı material təqdim edilərkən onların yaş xüsusiyyəti və koqnitiv inkişaf mərhələsi mütləq nəzərə alınmalıdır. Çünki təbiət fənlərində kifayət qədər abstrakt konsepsiyalar mövcuddur. Məlumdur ki, 12 yaşa qədər şagirdlərdə abstrakt anlayışları mənimsəmək və onlarla mühakimə aparmaq bacarığı tam formalaşmır. Bu dövrdə onlar daha çox konkret fiziki dünya üzərindən fəaliyyətlər icra etməlidirlər. Məhz bu tədqiqatların və refleksiyaların nəticəsi olaraq beynəlxalq təcrübədə təbiət fənlərinin mövzuları mərhələli şəkildə bir neçə təhsil pilləsində öyrədilməyə başlandı. Hər pillədə həmin anlayış və mövzular şagirdlərin yaş xüsusiyyətlərinə uyğunlaşdırılaraq təqdim edilir”.

VII və VIII “Fizika” dərsliklərinin həmmüəllifi Dünyamalı Məmmədov isə qeyd edib ki, yeni dərslikdə sualların tərtibinə xüsusi diqqət yetirilib. Burada daha çox keyfiyyət yönümlü və açıq tipli suallara üstünlük verilib: “Əsas məqsəd faktoloji biliklərin yoxlanılması deyil, şagirdlərin konseptual düşünmə, yaradıcılıq qabiliyyəti və izah etmə bacarığını inkişaf etdirməkdir. Bu yanaşma sayəsində şagirdlər mövzulara münasibət bildirmək, fikir irəli sürmək və əsaslandırmaq imkanları qazanırlar. Təsvirlərin seçimində də fərqli yanaşma tətbiq olunub. Bəzi təsvirlər kəmiyyət məlumatları olmadan təqdim edilir ki, bu da şagirdlərin mövzunu daha müsbət qəbul etməsinə və öyrənmə prosesinə fəal qoşulmasına şərait yaradır”.