Dövlət ümumi təhsil müəssisələrində çalışan müəllimlər üçün bu gündən keçirilməyə başlanılan sertifikatlaşdırma imtahanında Naxçıvan Muxtar Respublikasının 3 müəllimi 57 bal toplayaraq yüksək nəticə əldə edib. 

“Azərbaycan müəllimi” həmin müəllimlərin imtahanla bağlı təəssüratlarını öyrənib.

Onlardan biri - Xəyalə Rzayeva Ordubad rayonu Dəstə kənd tam orta məktəbinin ingilis dili müəllimidir. Müəllimin fikrincə, imtahan nisbətən çətin idi, amma yaxşı nəticə göstərmək mümkün idi: “Son vaxtlar kurikulumla bağlı testlər edirdim, amma ixtisas mövzularını bildiyim üçün xüsusi hazırlaşmamışdım. Məncə, 11-ci sinfə dərs deyən bütün müəllimlər sualları asanlıqla yaza bilərlər. Proqramdan kənar heç bir əlavə sual yox idi. Sadə, gündəlik istifadə etdiyimiz kompüterlə işləmək çox rahat idi”.

Sertifikatlaşdırma imtahanında yüksək nəticə göstərənlərdən biri də Babək rayonu Aşağı Buzqov kənd tam orta məktəbinin riyaziyyat müəllimi Turan Hüseynovadır. 57 bal toplayan müəllim imtahanın normal keçdiyini deyir. O, sertifikatlaşdırmada iştirak edəcək digər müəllimlərə tövsiyə edir ki, həyəcanlanmasınlar və rahat olsunlar. Əgər öz fənlərindən hazırlıqlıdırlarsa, mütləq yaxşı nəticə əldə edəcəklər.

İmtahanda 57 bal toplayan daha bir şəxs Sədərək rayon Sədərək kənd 2 nömrəli tam orta məktəbin ingilis dili müəllimi Aysun Cəfərovadır. Deyir ki, müəllimlər çalışsalar, müsbət nəticə əldə edə bilərlər.