2025-ci ilin Azərbaycanda “Konstitusiya və Suverenlik İli” elan edilməsi, həmçinin “İnsan hüquqları aylığı” çərçivəsində Lənkəran Dövlət Universitetində (LDU) maarifləndirmə tədbiri keçirilib. 

LDU-dan “Azərbaycan müəllimi”nə bildirilib ki, Lənkəran Ağır Cinayətlər Məhkəməsi ilə birgə keçirilən tədbiri LDU-nun tədrisin təşkili və təlim texnologiyaları üzrə prorektoru vəzifəsini icra edən dos. Zaur Məmmədov açıb. Bildirib ki, ölkə başçısı cənab İlham Əliyev tərəfindən konstitusiyamızın qəbul edilməsinin 30-cu və Vətən müharibəsində qələbəmizin 5-ci ildönümü nəzərə alınaraq 2025-ci ilin Azərbaycan Respublikasında “Konstitusiya və Suverenlik İli” elan edilməsi böyük məna daşıyır. “Konstitusiya və Suverenlik İli”nə həsr olunmuş tədbirin məqsəd və məramından danışan dos. Zaur Məmmədov qeyd edib ki, müasir Azərbaycan dövlətinin Konstitusiyası Ümummilli Lider Heydər Əliyevin şah əsərlərindən biridir. 18 may - 18 iyun tarixlərinin ölkə ərazisində “İnsan hüquqları aylığı” elan edilərək paytaxtda və regionlarda insan hüquqlarını təbliğ edən müxtəlif aktual mövzularda maarifləndirmə tədbirlərinin keçirilməsini dos. Z. Məmmədov yüksək dəyərləndirib.

Tədbirdə Lənkəran Ağır Cinayətlər Məhkəməsinin hakimləri Esmira Məmmədova və Neymət Məmmədovun mövzu ilə bağlı məruzələri dinlənilib. Məruzələrdə qeyd olunub ki, xalqımız böyük qürur və fəxarət hissi ilə bu il müəllifi Ümummilli Liderimiz Heydər Əliyev olan milli Konstitusiyamızın qəbul edilməsinin 30-cu və Prezident, Müzəffər Ali Baş Komandanın rəhbərliyi ilə Vətən müharibəsində qazanılmış tarixi qələbəmizin 5-ci ildönümünü təntənə ilə qeyd edəcək. Bu məqsədlə Azərbaycan Respublikasının Prezidenti cənab İlham Əliyev 28 dekabr 2024-cü il tarixdə Azərbaycan Respublikasında 2025-ci ilin “Konstitusiya və Suverenlik İli” elan edilməsi haqqında sərəncam imzalayıb. Mühüm tarixi əhəmiyyətə malik olan bu sərəncam tarixi zəfərimizin regionda və dünya siyasətində yol açdığı yeniliklərin, eyni zamanda, 1995-ci ildə konstitusiyamızın qəbul edilməsindən ötən dövr ərzində Azərbaycanın hüquqi dövlət kimi möhkəmlənən mövqeyinin təqdimatında əsaslı rol oynayır. İnsan hüquq və azadlıqlarının qorunması, yeni müdafiə mexanizmlərinin müəyyənləşdirilməsi dövlət siyasətinin əsasını təşkil edir. Milli Konstitusiyamızda əksini tapan müddəaların böyük əksəriyyəti də insan hüquqlarının qorunmasına həsr edilib. Konstitusiyamızın qəbulundan ötən dövr ərzində bu ali sənədə 3 dəfə: 2002, 2009 və 2016-cı illərdə əlavə və dəyişikliklərin edilməsi insan hüquqlarının qorunmasının prioritetliyini təsdiqləyir.

Sonda tələbələri maraqlandıran suallar cavablandırılıb.