Mayın 13-də Macarıstan Milli Assambleyasının sədr müavini, yazıçı Şandor Lejak Naxçıvan Dövlət Universitetində qonaq olub. İki günlük səfər çərçivəsində ilk olaraq universitetin Elmi Kitabxanasında yazıçının kitablarının təqdimatı keçirilib.

NDU-nun mətbuat xidmətindən "Azərbaycan müəllimi"nə verilən məlumata görə, tədbirdə Macarıstanın ölkəmizdəki səfiri, Con fon Neyman Universitetinin və TÜRKSOY-un rəhbərliyi və kollektivi, Azərbaycan Dövlət Pedaqoji Universitetinin nümayəndə heyəti,  millət vəkilləri, yazıçılar, Naxçıvan Dövlət Universitetinin rəhbərliyi, professor-müəllim heyəti iştirak ediblər. 

Naxçıvan Dövlət Universitetinin rektoru Elbrus İsayev bildirib ki, Azərbaycan və Macarıstan dost ölkələrdir. Ölkələrimiz arasında bütün sahələrdə qarşılıqlı etimada və dəstəyə əsaslanan diplomatik münasibətlər var və təhsildə də fəal əməkdaşlıq mövcuddur. Bu xüsusda rektor görüşün mahiyyətinə diqqət çəkib, Şandor Lejakın universitetə gəlişini olduqca əhəmiyyətli və çoxdan gözlənilən əlamətdar görüş adlandırıb. Belə nüfuzlu qonaqları qarşılamağın böyük məsuliyyət və şərəf olduğunu qeyd edən rektor Elbrus İsayev ötən il Macarıstana səfəri çərçivəsində Şandor Lejakın dəstəyi və təşəbbüsü ilə Con fon Neyman Universiteti ilə NDU arasında ikili diplom müqaviləsinin imzalanamasını xatırladıb və  bugünkü görüşdə iştirakına görə təşəkkürünü bildirib. 

Xatırladıb ki, müqaviləyə əsasən sentyabrdan etibarən “Kompüter mühəndisliyi” (tədrisi ingilis dilində) ixtisası üzrə ikili diplom üçün qəbul aparılır. Bu ixtisası seçən tələbələr təhsillərinin bir hissəsini Con fon Neyman Universitetində tamamlayır və hər iki ölkənin müvafiq ixtisası üzrə diplom alırlar.

Rektor dünyamiqyaslı yazıçı Şandor Lejakın ali təhsil müəssisəsində kitablarının təqdimatının keçirilməsini mühüm hadisə olaraq dəyərləndirib. Onun xüsusilə mənsub olduğu millətin ədəbi düşüncəsinə, fikir və söz xəzinəsinə özünəməxsus təsiri və imzası olduğunu vurğulayıb və əsərlərinin universitetin kitabxana fonduna töhfə olduğunu əlavə edib. 

NDU-nun Elmi Kitabxanasının direktoru Xumar Məmmədova məruzə ilə çıxış edib. Çıxışında yazıçının həyat və fəaliyyəti barədə geniş məlumat təqdim edib. Qeyd olunub ki, yazıçının kitabları bu gündən universitetin kitabxana fonduna daxil olub və irəlidə bu kitabların hamısının tərcümə olunaraq oxuculara təqdim olunacaq.

TÜRKSOY-un Baş katibi Sultan Raev Türk mədəniyyətinin böyük təbliğatçısı, türk dünyasında xüsusi hörməti olan macar yazıçı Şandor Lejakla bağlı yüksək fikirlər səsləndirib. Macarıstanın təşkilatın fəaliyyətlərində aktiv iştirak etdiyini, tərəflər arasında sıx elmi əlaqələrin mövcud olduğunu qeyd edib. 

Görüşdə Azərbaycan Dövlət Pedaqoji Universitetinin beynəlxalq əlaqələr üzrə prorektoru professor Mahirə Nağıqızı və Naxçıvan Muxtar Respublikası Yazıçılar Birliyinin sədri Asim Yadigar çıxış ediblər. Natiqlər dünyamiqyaslı yazıçının kitablarının təqdimatında yer almaqdan  məmnunluq ifadə edib, Şandor Lejakla görüşü yaddaqalan hadisə adlandırıblar. 

Macarıstan Milli Assambleyasının sədr müavini, dünyaşöhrətli yazıçı Şandor Lejak səmimi qarşılanmaya, qonaqpərvərliyə və xoş sözlərə görə təşəkkürünü çatdırıb. Azərbaycan və Macarsıtan arasında bütün sahələrdə fəal əməkdaşlıqlar olduğunu və inkişaf etdiyini söyləyib. Həyat və fəaliyyətinə dair xüsusi xatirələri tədbir iştirakçıları ilə bölüşüb.

Sonra Elmi Kitabxanada Şandor Lejakın kitablarının və Türk dünyasının ədəbiyyat nümunələrinin yer aldığı sərgiyə baxış olub. TÜRKSOY-un baş katib Sultan Raev universitetin Elmi Kitabxanasına kitablar hədiyyə edib.