Əhəd Ağayev - Bu 10 yaşlı uşağın siması, səsi artıq hamımıza tanışdır. Haradan, niyə tanışdır? Ağdam Muğam Mərkəzinin açılışından.

Mayın 10-da Prezident İlham Əliyev və birinci xanım Mehriban Əliyevanın iştirak etdiyi açılış mərasimində azyaşlı üçlüyün ifası yəqin ki, yadınızdadır.

Bu üçlük “Qarabağ şikəstəsi”ni ifa edən zaman dövlət başçısı kövrəlmiş, onları ayaq üstə alqışlamışdı.

Səhnəyə qalxan Prezidentlə xanımı ifaçıların üçü ilə də tək-tək görüşmüşdü. Həmin azyaşlılardan biridir Əhəd.

“Azərbaycan müəllimi” balaca xanəndə ilə həmsöhbət olub.

“Prezident və birinci xanımın alqışını almaq məni qürurlandırdı”

Ağdam rayonu Gülablı kənd uşaq musiqi məktəbinin 4-cü sinfində oxuyur. Müəllimi xanəndə Humay Məmmədovadır. Eyni zamanda, Habil Məmmədovdan da dərs alır.

Əhəd deyir ki, 5 yaşından musiqiyə həvəsi yaranıb.

“İlk ifam “Xudayar təsnifi” olub. 6 yaşımda isə “Qatar” muğamını müəllimim öyrətmişdi. Hazırlıqlarım mütəmadi qaydada davam edir. Bir çox müsabiqələrdə iştirak edib 1-ci yerə layiq görülmüşəm, "Payız əfsanələri – 2022" adlı beynəlxalq müsabiqənin  “Qran-pri”sini almışam. Hər dəfə sənətkarlarımıza, xalq artistlərimizə qulaq asıb, yeni nəsə öyrənməyə çalışırdım.

Hər bir yarışmada, müsabiqədə həyəcanlı oluram. Amma daha çox Ağdam Muğam Mərkəzinin açılışında həyəcanlı idim. Prezident və birinci xanımın alqışını almaq, onların isti münasibətini görmək çox qürurlandırdı məni. Mərkəzin açılışına məsuliyyətlə hazırlaşmışdım. Bu açılışa, həmçinin IX “Muğam” Televiziya Müsabiqəsinə (Heydər Əliyev Fondunun dəstəyi, Mədəniyyət Nazirliyinin və Azərbaycan Televiziyasının təşkilatçılığı ilə keçirilir) hazırlaşarkən Əməkdar arstist Təyyar Bayramov mənə böyük dəstək göstərmişdi”.

“İstəyirəm ki, muğamlarımızın dünyaya tanıdılmasında rolum olsun”

“Açılışla bağlı konservatoriya və Muğam Mərkəzində məşqlərimiz olurdu. Evə gələndən sonra da telefon vasitəsilə səsimi müəllimimə göndərirdim, o da səhvlərimi düzəldirdi. Çətin qəzəllər var idi, onları öyrənmək mənə muğamı yenidən öyrənmək kimi gəlirdi. 4 ay çox əziyyət çəkdik. Amma bu zəhmətə dəydi. IX “Muğam” Televiziya müsabiqəsində 9-16 yaşlılar arasında 1-ci yerə çıxdım. Qalibiyyət gözəl hissdir. Böyüyəndə də bu yolu davam etdirəcəyəm. Çox istəyirəm ki, muğamlarımızın dünyaya tanıdılmasında rolum olsun.

Bütün hər yerdə atamla anamın dəstəyini hiss etmişəm, əziyyətləri böyükdür, onlara da çox təşəkkür edirəm”.

“Şəhid Xudayar Yusifzadənin ifasını eşidəndən sonra 5 yaşında olan oğlumun musiqiyə marağı oyandı”

Arada söhbətimizə Əhədin atası Mehdi Ağayev də qoşulur.

“Bayaq oğlum xanəndəliyə “Xudayar təsnifi” ilə başladığını dedi. Bəli, 2020-ci ildə Vətən müharibəsinin şəhidi Xudayar Yusifzadənin ifasını eşidəndən sonra 5 yaşında olan oğlumun musiqiyə marağı oyandı sanki. İlk oxuduqları “Can Qarabağ” və “Xudayar təsnifi” oldu. İfasını gördükdən sonra bizdə də maraq yarandı, onun bu istedadının arxasınca getməsinə dəstək olduq.

Beləcə, oğlumu götürüb gəldim Ağdamın Gülablı kənd uşaq musiqi məktəbinə. Humay Məmmədova onun səsinə qulaq asandan sonra müsbət rəy verdi və hazırlaşdırdı.

Oğlu ilə bütün məşqlərə gedən Mehdi Ağayev bildirir ki, çəkilən əziyyətin bəhrəsini gördülər.

“Özüm maşın ustasıyam, Əhədin anası da evdar xanımdır.

Azyaşlı olmasına baxmayaraq prinsipləri olan uşaqdır. Qarşısına qoyduğu məqsədə nail olmaq üçün çalışır, uğur əldə etməyə səy göstərir.

Muğam bizim kimliyimiz, irsimizdir, mədəniyyətimizdir. Çalışmalıyıq ki, gələcək nəsillərə doğru və düzgün şəkildə çatdırılsın. İnanıram ki, Əhəd də bu yolda gözəl örnək olacaq, buna bütün qəlbimlə əminəm. Qarşıda onu çoxlu uğurlar gözləyir”.