Festivalda fərqlənənlərə mükafatlar təqdim olundu

Azərbaycan Respublikasının Təhsil Nazirliyi ilə Azərbaycan Təhsil İşçiləri Azad Həmkarlar İttifaqı Respublika Komitəsinin 19 fevral 2008-ci il tarixli birgə qərarına əsasən ümummilli lider Heydər Əliyevin anadan olmasının 85-ci ildönümünə həsr olunmuş ali məktəb tələbələrinin bədii yaradıcılıq festivalı keçirilmişdir. İki ay davam etmiş və tələbə gənclər arasından xeyli istedadı üzə çıxarmış festivalın aprel ayında yekun konserti olmuş və qaliblər müəyyənləşdirilmişdir.

Mayın 27-də Təhsil Nazirliyində festival qaliblərinə mükafatlar təqdim olunmuşdur. Bu münasibətlə keçirilən mərasimi təhsil nazirinin müavini Elmar Qasımov açaraq bildirdi ki, ali məktəb tələbələrinin bədii yaradıcılığına baxış olan festival artıq ikinci ildir keçirilir. ümummilli liderimiz Heydər Əliyevin 85 illik yubileyinə həsr olunmuş builki festivalda respublikamızın dövlət və özəl ali məktəblərində təhsil alan 1000 nəfərdən çox tələbə iştirak etmişdir. İştirakçılar xor, rəqs, xalq çalğı alətləri, bədii qiraət, müasir rəqs, tək ifa, aşıq musiqisi, vokal, xalq mahnılarının ifası, xarici dillərdə vokal ifa nominasiyaları üzrə qüvvələrini sınamışlar.

Son illər müxtəlif kütləvi tədbirlərdə - idman turnirlərində, bilik yarışlarında, yaradıcılıq müsabiqələrində, fənn olimpiadalarında mübarizə əzmi göstərən ali məktəb tələbələrinin bədii yaradıcılıq festivalında da fəal iştirak etdiklərini vurğulayan Elmar Qasımov bütün bu tədbirlərin tələbələrdə vətəndaşlıq keyfiyyətləri formalaşdırmaqda, onların dünya duyumlarını, estetik zövqlərini inkişaf etdirməkdə, istedadları aşkara çıxarmaqda mühüm rol oynadığını söylədi.

Nazir müavini qalibləri təbrik edib, onlara daha böyük uğurlar arzuladı. Elmar Qasımov, eyni zamanda festivalın münsiflər heyətinin üzvlərinə - professor Ramiz Zöhrabov başda olmaqla Faiq Zöhrabova, Namiq Nəbiyevə, Vaqif Süleymanova, Mübariz Əliyevə Təhsil Nazirliyi adından təşəkkür etdi, onların ağır zəhmət tələb edən işin öhdəsindən layiqincə gəldiklərini, festival iştirakçıları arasında ədalətli seçim apardıqlarını bildirdi.

Nazir müavini ölkəmizdə təhsilə, təhsil işçilərinə, istedadların yetişməsinə, ümumiyyətlə gənclərə böyük diqqət və qayğı göstərildiyini mərasim iştirakçılarının diqqətinə çatdırdı.

Qaliblərin mükafatlandırılması mərasimində çıxış edən Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov da təmsil etdiyi qurum adından festival laureatlarına təbriklərini çatdırdı, yarışmanın yüksək səviyyədə keçirildiyini qeyd etdi.

Sonra mükafatlandırma mərasimi oldu. Festivalda 10 nominasiya üzrə 31 kollektiv və tək ifaçı qaliblər sırasına çıxmışdı. I, II, III yerləri tutmuş tələbələr və özfəaliyyət kollektivlərinin rəhbərləri, habelə həvəsləndirici yerə layiq görülən 14 tələbə səhnəyə dəvət edilərək layiq görüldükləri mükafatlar - xatirə diplomları və hədiyyələr onlara təqdim olundu.

Qalibləri təbrik edən festivalın münsiflər heyətinin sədri, professor Ramiz Zöhrabov çıxışında tədbirin təşkili və keçirilməsi ilə bağlı bəzi məqamlara diqqəti cəlb etdi. Bütövlükdə festivalın uğurla keçdiyini bildirən tanınmış musiqişünas yarışmada xor kollektivlərinin az olduğunu, ali məktəblərin hamısında xor, rəqs, bədii özfəaliyyət, xalq çalğı alətləri ansamblları və s. kimi kollektivlərin yaradılmasının zəruriliyini diqqətə çatdırdı. Final mərhələsində ölkənin 13 ali məktəbindən kollektiv və tək ifaçıların iştirak etdiyini, Azərbaycan Dillər Universitetinin festivala daha yaxşı hazırlaşdığını deyən R.Zöhrabov bununla belə cənub bölgəsindən, Naxçıvandan, bir sıra digər ali məktəblərdən tələbələrin bu mühüm tədbirə qatılmadığını da bildirdi.

R.Zöhrabov təşkilatçılara minnətdarlıq edib festivalın davamlı olaraq keçirilməsini arzuladı.

Tədbirdə istedadlı gənclərin aşkara çıxarılmasındakı xidmətlərinə görə münsiflər heyətinin üzvlərinə Təhsil Nazirliyinin Fəxri fərmanları təqdim olundu.

Mərasimi yekunlaşdıran təhsil nazirinin müavini Elmar Qasımov qalibləri bir daha təbrik edib, festivalın keçirilməsində əməyi olanlara, xüsusən də Azərbaycan Həmkarlar İttifaqları Konfederasiyasının rəhbərliyinə, universitet rektorlarına, ali məktəblərin tələbə həmkarlar ittifaqları komitələrinə  Təhsil  Nazirliyi adından minnətdarlığını bildirdi.

Yusif ƏLİYEV