Heydər Əliyev Fondunun prezidenti, YUNESKO-nun xoşməramlı səfiri Mehriban Əliyeva təşkilatın xoşməramlı səfirlərinin illik yığıncağında iştirak edib

Mayın 20-də Parisdə YUNESKO-nun xoşməramlı səfirlərinin illik yığıncağı keçirilmişdir. Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban Əliyeva yığıncaqda iştirak etmişdir.

Mehriban Əliyevanı YUNESKO-nun mənzil-qərargahında təşkilatın yüksək vəzifəli şəxsləri səmimiyyətlə qarşıladılar.

Yığıncaqdan öncə xoşməramlı səfirlər dünyada savadlılığın dəstəklənməsi üzrə YUNESKO-nun regional konfransları silsiləsindən "Avropada subregional çərçivədə savadlılıq problemlərinə baxış: tərəfdaşlıq əlaqələrinin qurulması və innovativ yanaşmaların tətbiqinə dəstək" mövzusunda Bakıda keçirilmiş 5-ci regional konfransın yüksək səviyyədə təşkilinə görə Heydər Əliyev Fondunun prezidenti Mehriban xanım Əliyevaya təşəkkür etdilər. Bildirildi ki, həmin konfrans mühüm hadisədir və regionda savadsızlığın aradan qaldırılmasında əhəmiyyətli rolu olacaqdır.

YUNESKO-nun xoşməramlı səfirlərinin illik hesabat yığıncağını təşkilatın Baş direktoru Koişiro Matsuura açdı. Xoşməramlı səfirləri salamlayan Baş direktor yığıncağın uğurla keçəcəyinə əmin olduğunu bildirdi. Yığıncaq iştirakçıları məşhur musiqiçi, həmyerlimiz Mstislav Rostropoviçin xatirəsini bir dəqiqəlik sükutla yad etdilər.

Baş direktor çıxışında əsas diqqəti təhsil, xüsusilə də dünyada savadsızlığın aradan qaldırılması probleminə cəlb etdi. Qeyd etdi ki, indi dünyada 72 milyon uşaq məktəbə getmir. Yeniyetmələrin təhsilə cəlb olunmasında hələ də problemlər var. Koişiro Matsuura bu baxımdan Bakıda keçirilmiş 5-ci regional konfransın əhəmiyyətini vurğuladı və tədbirin yüksək səviyyədə təşkilinə görə Mehriban xanım Əliyevaya təşəkkür etdi. Baş direktor mədəniyyətlərarası və sivilizasiyalararası dialoqdan da danışdı, hazırda dünyanı narahat edən iqlim dəyişikliyi, ərzaq təhlükəsizliyi, habelə səhiyyə xidmətlərinin təşkili məsələlərinə toxundu.

Heydər Əliyev Fondunun prezidenti, YUNESKO-nun xoşməramlı səfiri Mehriban Əliyeva yığıncaqda çıxış etdi. O, ötən bir ildə ölkəmizdə görülən işlər, YUNESKO dəyərlərinin təbliği və icrası istiqamətində həyata keçirilən tədbirlər barədə danışdı. Bakıda keçirilmiş regional konfransın mühüm nəticələrlə yadda qaldığını vurğulayan Mehriban xanım dedi ki, ölkəmizdə təhsilin inkişafına xüsusi diqqət göstərilir. Heydər Əliyev Fondu artıq xaricdə də təhsillə bağlı layihələr həyata keçirir. Pakistanın zəlzələdən ciddi ziyan görən Müzəffərabad şəhərində qızlar məktəbinin inşa olunması buna sübutdur. Bu, Heydər Əliyev Fondunun təhsillə bağlı xaricdə həyata keçirdiyi ilk layihədir.

Mehriban xanım Əliyeva ölkəmizdə mədəni irsin qorunması və təbliği istiqamətində də işlərin görüldüyünü dedi. Bildirdi ki, Azərbaycanda muğamın inkişafı və təbliğinə xidmət edən layihələr icra olunur. Bakıda Beynəlxalq Muğam Mərkəzi tikilir. Heydər Əliyev Fondunun dəstəyi ilə gənc ifaçıların qatıldığı muğam televiziya müsabiqəsi keçirilib, muğam jurnalı nəşr olunur. Azərbaycanda mədəni irsin qorunması istiqamətində tədbirlər bundan sonra da davam etdiriləcəkdir.

İordaniya şahzadəsi xanım Ferial YUNESKO-nun Bakıda keçirilmiş 5-ci regional konfransında iştirakı barədə danışdı, onun yüksək səviyyədə təşkil olunduğunu vurğuladı.

YUNESKO-nun xoşməramlı səfirləri ölkələrində gördükləri işlər, həyata keçirilən layihələr barədə hesabat verdilər. Hesabatlarda əsas diqqət təhsil, elm, səhiyyə, mədəni irsin qorunması, QİçS-lə mübarizə kimi mühüm məsələlərə yönəldildi.

Yığıncağın sonunda xoşməramlı səfirlər xatirə şəkli çəkdirdilər.

YUNESKO-nun Baş direktoru Koişiro Matsuuranın adından xoşməramlı səfirlərin şərəfinə ziyafət verildi.

Mehriban xanım Əliyeva "Azərbaycan uşaqlarının dostu" seçilib

"Gənc Liderlər" Uşaq Təşkilatı 1 İyun - Uşaqların Beynəlxalq Müdafiəsi Günü ilə bağlı "Uşaqların dostu" nominasiyası üzrə qalibləri müəyyənləşdirmək üçün sonuncu sorğunun nəticələrini açıqlamışdır.

Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyeva bütün namizədlərdən daha çox səs toplayaraq "Azərbaycan uşaqlarının dostu" seçilmişdir.

Növbəti qaliblər sırasında Milli Məclisin deputatları ülvi Quliyev, Nazim Məmmədov, Zahid Oruc, Nizami Cəfərov, Yaqub Mahmudov, Aqil Abbas və Fəttah Heydərov vardır.

Təhsil naziri Misir Mərdanov və Səbail Rayon İcra Hakimiyyəti başçısının birinci müavini Xalidə Bayramova isə uşaq təşkilatlarına ən çox dəstək verən dövlət məmuru nominasiyası üzrə "Uşaqların dostu" adına layiq görülmüşlər.

Bakı Şəhər Dövlət Yol Polisinin İctimaiyyətlə əlaqələr şöbəsinin rəisi Vaqif Əsədov və Təhsil Nazirliyinin İctimaiyyətlə əlaqələr şöbəsinin müdiri Bayram Hüseynzadə ictimaiyyətə ən açıq mətbuat xidməti rəhbəri olduqları üçün "Uşaqların dostu" seçilmişlər.

Yazıçı-publisist Elmira Axundovanın "Heydər Əliyev: şəxsiyyət və zaman" kitabı ən yaxşı sənədli əsər kimi fərqlənmişdir.Media qurumları arasında qaliblər həm şifahi, həm də "Gənc Liderlər"in www.liderler.azeriblog.com rəsmi İnternet səhifəsində keçirilən sorğular yolu ilə bəlli olmuşdur.

Azərbaycan Dövlət Teleqraf Agentliyi (AzərTAc) və AzəriPress İnformasiya Agentliyi uşaqlara ən çox dəstək verən informasiya agentlikləri kimi  "Uşaqların dostu" seçilmişlər.

Televiziyalardan AzTV-nin "Etimad" tok-şousu, Lider TV-nin "Səda", İTV-nin "Carçı", "Space"in "Hər gün", ATV-nin "Son xəbər" informasiya proqramları "Uşaqların dostu" adına layiq görülmüşdür.

AzərTAc