|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Prezident İlham Əliyevə Taras Şevçenko adına Kiyev Milli Universitetinin fəxri doktoru diplomu təqdim edilib Xəbər
verdiyimiz kimi, mayın 22-də Taras Şevçenko adına
Kiyev Milli Universitetində Azərbaycan Respublikasının
Prezidenti İlham Əliyevə bu təhsil müəssisəsinin
fəxri doktoru adı verilməsi münasibətilə
təntənəli mərasim olmuşdur. Mərasim
iştirakçıları Azərbaycan dövlətinin başçısını
hərarətlə qarşıladılar. Universitetin
rektoru vəzifəsini icra edən akademik LEONİD QUBERSKİ.
Azərbaycan Prezidenti İlham Əliyevin həyat və
fəaliyyəti haqqında ətraflı məlumat verdi.
O, dövlətimizin başçısının təhsilin inkişafında
rolu barədə danışarkən vurğuladı ki,
Azərbaycan Prezidentinin fəal dəstəyi
sayəsində Azərbaycan və Ukrayna ali
məktəbləri arasında dostluq əlaqələri
və əməkdaşlıq genişlənmiş və
dərinləşmişdir. Bu böyük və mühüm işdə
Kiyev Milli Universiteti də fəal iştirak edir. Vaxtilə
burada təhsil almış Azərbaycan vətəndaşları
hazırda ölkənin ictimai-siyasi həyatında mühüm yer
tuturlar. Akademik
Quberski dedi ki, Azərbaycan Prezidenti beynəlxalq siyasi
səhnədə müdrik dövlət başçısı, nüfuzlu
siyasi xadim Heydər Əliyevin böyük işlərinin layiqli
davamçısı kimi imic qazanmışdır. O, ölkənin
sosial-iqtisadi tərəqqisi naminə Azərbaycana və
regiona yeni, müasir siyasət təklif etmiş dövlət başçısı
kimi tanınmışdır. Leonid Quberski vurğuladı ki, strateji
tərəfdaşı və müttəfiqi, onun yaxın
dostu kimi Ukrayna Azərbaycanın beynəlxalq aləmdə
qazandığı böyük uğurlara sevinir, regional və
beynəlxalq layihələrin həyata keçirilməsi üçün
Azərbaycanın atdığı qətiyyətli addımları
yüksək qiymətləndirir. Son illərdə həyata
keçirilmiş iri beynəlxalq iqtisadi layihələr, uğurlu
xarici siyasət Azərbaycanın nəinki regionda,
hətta bütün dünyada yüksək nüfuza malik olan bir ölkə
kimi tanınmasına kömək etmişdir. Akademik Leonid Quberski bildirdi ki, Taras Şevçenko
adına Kiyev Milli Universitetinin Elmi Şurası
Azərbaycan Prezidenti İlham Əliyevə bu ali
məktəbin fəxri doktoru adı verilməsi
barədə qərar qəbul etmişdir. O, fəxri doktor
diplomunu və mantiyasını Azərbaycan Prezidentinə
təqdim etdi. Dövlətimizin başçısı
mərasimdə nitq söylədi. Azərbaycan
Prezidenti İlham Əliyevin nitqi
- Əziz dostlar! Hörmətli rektor, mənim ünvanıma söylədiyiniz
xoş sözlərə görə sağ olun. Dünyanın aparıcı
ali məktəblərindən birinin - Taras Şevçenko adına
Kiyev Milli Universitetinin fəxri doktoru adına layiq görülmək
mənim üçün böyük şərəfdir. Mən bu adı ölkələrimiz arasında
çox dinamik, səmərəli şəkildə inkişaf
edən, yeni formalar kəsb edən, son nəticədə
təkcə ikitərəfli münasibətlərin möhkəmlənməsinə
deyil, həm də iri regional layihələrin həyata keçirilməsinə
gətirib çıxaracaq dostluq, qardaşlıq münasibətlərinin
inkişafı və möhkəmlənməsi işində
fəaliyyətimin qiymətləndirilməsi hesab
edirəm. Mən bilirəm ki, bu gün Ukraynanın
tarixində xüsusi bir gündür. Mənə dedilər ki, bu gün
Taras Şevçenkonun nəşinin yenidən dəfn edildiyi
gündür. Ukrayna xalqının bu görkəmli oğlunun
xatirəsinə Azərbaycanda da böyük hörmətlə yanaşırlar.
Fürsətdən istifadə edib sizə bildirmək
istəyirəm ki, lap yaxın vaxtlarda Bakıda, şəhərimizin
mərkəzi rayonlarının birində Taras Şevçenkonun
abidəsinin açılışı olacaqdır. Bu da dövlətlərimiz
arasında olan dostluq və qardaşlıq münasibətlərinin
nümunəsidir. Artıq qeyd etdiyim kimi, bu münasibətlər
çox səmərəli və dinamik şəkildə inkişaf
edir və bu gün biz həmin münasibətlərin
keyfiyyətcə tamamilə yeni səviyyəsinin şahidiyik.
Bu gün mən Ukraynada rəsmi səfərdəyəm. Bu,
son dörd ildə sizin ölkənizə mənim dördüncü
səfərimdir və bunun özü ölkələrimiz arasında
sıx əlaqələrin göstəricisidir. Bugünkü səfər bizim münasibətlərimizin
inkişafında yeni mərhələdir. ölkələrimiz
arasında münasibətlərin gələcək inkişafını
müəyyənləşdirəcək çox mühüm
sənədlər imzalanmışdır. Bu
sənədlər bizim həyatımızın bir çox
sahələrini əhatə edir, lakin ölkələrimiz
arasında Dostluq və strateji tərəfdaşlıq
haqqında bəyannaməni xüsusi vurğulamaq istərdim.
Bu sənədin elə adı bizim münasibətlərimizin
xarakterini və ruhunu, yəni dostluq və strateji
tərəfdaşlığı əks etdirir. Əminəm
ki, gələcəkdə bizim münasibətlərimiz daha
səmərəli inkişaf edəcək, həyatımızın
yeni sahələrini, iqtisadiyyatın, humanitar sahənin
yeni sektorlarını əhatə edəcəkdir. İki
qardaş dövlət kimi həm Ukrayna, həm də
Azərbaycan islahatları uğurla həyata keçirəcək,
ölkələrimizi demokratiya və tərəqqi yolu
ilə irəli aparacaqlar. Bu
gün dünyanın aparıcı ali
məktəblərindən birinin belə yüksək
fəxri adını almaq mənə çox xoşdur.
Vaxtilə mənim də müəllimlik fəaliyyətim
olub və həyatımın bu dövrü mənə çox
əzizdir. Bu gün də Azərbaycanın Prezidenti kimi
təhsil sisteminin inkişafına böyük diqqət
yetirməyə çalışıram. Hər bir ölkənin,
hər bir xalqın gələcəyi təhsillə bağlıdır.
Əlbəttə ki, zəngin təbii
ehtiyatlara malik olan Azərbaycan iqtisadi islahatları
səmərəli şəkildə həyata keçirir. Lakin
mən tam əminəm ki, yüksək təhsil
səviyyəsi olmasa, peşəkarlıq olmasa,
gənclər ən mütərəqqi texnologiyalara
yiyələnməsələr, həqiqətən inkişaf
etmiş dövlət qurmaq mümkün deyildir. Buna görə də
təhsil bizim üçün prioritet sahədir. Son vaxtlarda
Azərbaycanda bu istiqamətdə çox iş görülmüşdür.
Bu sahəyə xərclər ilbəil artır.
Deməliyəm ki, Azərbaycan büdcəsinin
maddələri arasında təhsil sahəsi ikinci yer
tutur. Son 3-4 ildə Azərbaycanda 1300-dən çox
məktəb tikilmiş, onlar hamısı İnternet
şəbəkəsinə qoşulmuş kompüterlərlə
təchiz olunmuşdur. Biz gənclərimizin dünyanın aparıcı
ali məktəblərində təhsil alması üzrə
proqramı həyata keçirməyə başlayırıq.
Mənə çox xoşdur ki, bizim gənclər sizin
universitetdə təhsil alırlar. Rektorun artıq qeyd
etdiyi kimi, bu sahədə yaxşı ənənə
də mövcuddur. Kiyev Milli Universitetinin məzunlarının
çoxu bu gün hakimiyyət strukturunda mühüm mövqelər tutur
və ictimai həyatda əhəmiyyətli rol oynayırlar.
Bütövlükdə Azərbaycanın bugünkü
inkişafını səciyyələndirərək
deməliyəm ki, ölkəmiz siyasi və iqtisadi islahatlar
yolu ilə inamla irəliləyir. İslahatlar paralel şəkildə
həyata keçirilir, hüquqi dövlət qurulması,
cəmiyyətin demokratikləşməsi
məsələlərinə çox böyük
əhəmiyyət verilir. Güclü siyasi sistem yaradılması
bizim bütün gələcək uğurlarımızın
rəhnidir, çünki möhkəm demokratik təsisatları
olmayan heç bir cəmiyyət inkişaf edə bilməz. Bu istiqamətdə çox böyük iş görülmüşdür,
hələ çox işlər də görülməlidir. Bununla
paralel olaraq, çox ciddi və əsaslı iqtisadi islahatlar
həyata keçirilir. Bütün bunlar əhalinin maddi rifahının
yüksəlməsinə, habelə iqtisadi potensialımızın
möhkəmlənməsinə, bütövlükdə beynəlxalq
aləmdə ölkəmizin mövqelərinin möhkəmlənməsinə
öz təsirini göstərir. İqtisadi və siyasi islahatlar
nəticəsində son dörd ildə Azərbaycanda iqtisadi
artım 96 faiz olmuşdur. Son üç ildə biz üDM-in artım
sürətinə görə dünyada ən yüksək
nəticələr əldə etmişik, artım hər
il 20-30 faiz olur. Sənaye istehsalının artımı da
təxminən iqtisadi artım səviyyəsindədir. Biz
irimiqyaslı sosial islahatlar həyata keçiririk, bunun
nəticəsində yoxsulluğun səviyyəsi bir neçə
dəfə azalmışdır və bu gün həmin göstəriciyə
görə Azərbaycan dünya miqyasında layiqli yerdədir.
Bizim vəzifəmiz sosial hadisə kimi yoxsulluğun kökünü
tamamilə kəsməkdir və mən əminəm ki,
yaxın vaxtlarda biz buna nail olacağıq. Biz Azərbaycanın regionlarının inkişafına
çox böyük diqqət yetiririk, çünki regional inkişaf ölkəmizin
hərtərəfli inkişaf yoludur. Bu, yeni iş
yerləri, müasir infrastruktur, o cümlədən təhsil
və səhiyyə infrastrukturu yaradılması
deməkdir. ölkəmizdə bütün bunların həyata keçirilməsi
mümkündür və bizim reallaşdırdığımız
proqramlar, əslində, həyatımızın bütün
sahələrini əhatə edir. Azərbaycan zəngin təbii ehtiyatlara
malik olan ölkədir. Əlbəttə, burada əsas rolu
təbiət oynamışdır. Lakin biri var həmin
təbii ehtiyatlar suyun dərin qatları altında qalsın,
biri də var ki, onlar hasil edilsin, boru kəmərləri
tikilsin və həmin resurslar dünya bazarlarına çatdırılsın.
Biz 1990-cı illərin ortalarından başlayaraq
Azərbaycanın ümummilli lideri Heydər Əliyevin təşəbbüsü
ilə enerji sektorunda irimiqyaslı əsaslı islahatlar
həyata keçirməyə nail olmuşuq. 1990-cı
illərin ortalarında qarşıya qoyulmuş bütün
vəzifələr hazırda uğurla yerinə yetirilmişdir.
Azərbaycan enerji ehtiyatlarının iri
hasilatçısına və onları Avropa və dünya
bazarlarına çatdıran dövlətə çevrilmişdir.
Azərbaycan qədim ölkədir. Dünyada ilk dəfə
sənaye üsulu ilə neft 1847-ci ildə Azərbaycanda çıxarılmışdır.
Lakin o vaxt Azərbaycan xalqı öz sərvətlərinin
sahibi deyildi. O dövrdə və sonrakı illərdə
Azərbaycan müstəqil dövlət deyildi. Yalnız müstəqillik əldə
edəndən sonra Azərbaycan xalqı özünün təbii
sərvətlərindən birbaşa istifadə etmək
imkanı qazanmışdır və indi bizim təbii
sərvətlərimiz ölkəmizin hərtərəfli
inkişafına şərait yaradır. Biz öz təbii
resurslarımızdan dövlətimizin rifahı naminə
istifadə edirik və bunun da nəticəsində enerji
resurslarının satışından əldə
edilən gəlir müntəzəm və ədalətli
qaydada bölünür. Biz hasilat sahəsində şəffaflığın
maksimum səviyyəsinə nail olmuşuq və bu göstərici
üzrə dünya miqyasında liderik. Bunu aparıcı
beynəlxalq təşkilatlar da etiraf etmişdir. Keçən
il Birləşmiş Millətlər Təşkilatı
neft gəlirlərinin və xərclənməsində
şəffaflığın yüksək
səviyyəsinə görə Azərbaycanı mükafatlandırmışdır.
Biz boru kəməri siyasətini və
Azərbaycanın enerji ehtiyatlarının dünya bazarlarına
çatdırılmasının şaxələndirilməsini
uğurla həyata keçirmişik. Hazırda nefti üç
istiqamətdə nəql edirik, bunlardan ikisi Qara dəniz hövzəsi,
biri Aralıq dənizi hövzəsidir. Biz yeni enerji
dəhlizlərinin yaradılması
məsələsində öz tərəfdaşlarımızla,
o cümlədən Ukrayna ilə fəal əməkdaşlıq
edirik. Sizə məlum olduğu kimi, sabah Kiyevdə
energetika məsələlərinə həsr edilmiş
sammit açılacaqdır. Həmin sammitdə müzakirə
ediləcək məsələlərdən biri Odessa-Brodı-Plotsk-Qdansk
boru kəməri layihəsinin həyata keçirilməsi
məsələsi olacaqdır. Azərbaycan lap
əvvəldən bu layihəni siyasi cəhətdən
dəstəklədiyini bildirmişdir və indi də bu
fikirdədir. Bizim neft şirkətimiz həmin layihəni
həyata keçirən "Sarmatiya" şirkətinin
səhmdarlarından biridir və ümid edirik ki, enerji
sammitinin nəticələri həm bu layihənin
həyata keçirilməsi yolunda, həm də bütövlükdə,
Xəzər dənizini Qara dəniz və Baltik dənizi
ilə birləşdirən etibarlı enerji dəhlizi
yaradılmasında irəliyə doğru daha bir addım
olacaqdır. Biz Xəzər hövzəsində yataqlarımızın
işlənilməsinə xarici şirkətləri
dəvət etmiş ilk ölkə olmuşuq. Bu gün
Azərbaycan nefti dünyanın bütün guşələrinə,
bütün qitələrə nəql edilir. Biz qarşımızda
duran əsas strateji məsələləri uğurla
həll etmişik və indi gələcəyə baxırıq.
Enerji resurslarımızla regional
əməkdaşlıq, regionumuzda sabitliyin və təhlükəsizliyin
möhkəmlənməsi işinə daha çox töhfə
vermək üçün nə edə biləcəyimiz
barədə fikirləşirik. Biz gələcəkdə
də bu istiqamətdə səylərimizi artırmaq
və qarşıya qoyulmuş bütün vəzifələri
yerinə yetirməyə çalışmaq əzmindəyik. Bu yaxınlarda Azərbaycan qaz hasil edən
və dünya bazarına qaz göndərən ölkəyə çevrilmişdir.
Əvvəllər bu, belə deyildi. Lakin qazla bağlı
ən mühüm layihələri uğurla həyata keçirən
Azərbaycan artıq indi Avropa İttifaqı bazarlarına
qaz nəql edir. Gələcəkdə isə, bildiyiniz
kimi, enerji təhlükəsizliyi məsələləri
beynəlxalq münasibətlərin gündəliyində üstünlük
təşkil edəcəkdir. Artıq bu gün enerji təhlükəsizliyi
məsələlərinə ölkənin milli təhlükəsizliyi
kontekstində yanaşırlar. İndiki halda
Xəzərin və ilk növbədə, Azərbaycanın
enerji resursları bu məsələdə artıq müsbət
rol oynayır. Biz öz enerji ehtiyatlarımızdan regionda
etimadın möhkəmlənməsi, regional əməkdaşlığın
möhkəmlənməsi üçün istifadə edirik. Enerji
ehtiyatlarından bizim dostlarımız və tərəfdaşlarımız
arasında, strateji münasibətlərə malik olduğumuz
ölkələr arasında dostluğu möhkəmlətmək
üçün istifadə edirik. Beləliklə, dünya enerji bazarı üçün,
qlobal təhlükəsizlik məsələləri üçün
Azərbaycanın dünya siyasətində rolu və yeri möhkəmlənir.
Bu, əlbəttə, bizə yeni imkanlar verir, lakin həm
də bizim üzərimizə əlavə məsuliyyət
qoyur. Hazırda dünyada hər şey - istehlakçıların
enerji təhlükəsizliyi məsələləri də,
resursların satışından alınan
səmərənin hasilatçılar üçün faydası
məsələləri də bir-biri ilə qarşılıqlı
surətdə bağlıdır. Bunlar vəhdət halında
maraqların tarazlığını formalaşdırmalıdır.
Biz belə tarazlığın tərəfdarıyıq
və bu proseslərin müsbət məcrada getməsi üçün,
enerji resurslarının mübahisə və münaqişə
predmetinə çevrilməməsi üçün öz
tərəfimizdən nə lazımdırsa,
edəcəyik. Bu gün bu məqsədə nail olmuşuq,
belə ki, həmişə etimadın və qarşılıqlı
anlaşmanın möhkəmlənməsinə xidmət etmişik.
ölkəmizdə müxtəlif
sahələrdə görülən işlər barədə
çox danışa bilərəm. Artıq qeyd etdiyim kimi, bütün
sahələr üzrə konkret proqramlar həyata keçirilir.
Bizim xeyli maliyyə ehtiyatlarımız yaranmışdır
və çoxsaylı sosial proqramlar həyata keçiririk.
Sadəcə olaraq, vaxtın məhdudluğu üzündən
yalnız bizi narahat edən əsas məqamlar üzərində
dayanmalı olacağam. Bizim uğurlarımızla,
gələcəyə böyük nikbinliklə baxmağımızla
yanaşı, regionda sabitliyin pozulması, qarşıdurma
təhlükələri də mövcuddur. Əslində, onlar
həmişə olmuşdur və
Ermənistan-Azərbaycan, Dağlıq Qarabağ münaqişəsinin
həll edilməməsi kontekstində görürük ki, bu proses
dondurulmuş hesab edilə bilməz. Məsələ
həll edilməmiş qaldıqda, münaqişənin daim
yenidən alovlanması qorxusu var. Azərbaycanın bu məsələyə
münasibətdə mövqeyi birmənalıdır və bu mövqe
beynəlxalq hüququn prinsip və normalarına əsaslanır,
yəni Azərbaycanın ərazi bütövlüyü bərpa
edilməlidir, Ermənistan tərəfindən həyata keçirilən
etnik təmizləmə siyasətindən zərərçəkmiş
bir milyon azərbaycanlı özlərinin daimi yaşayış
yerlərinə qayıtmalıdır, Azərbaycanın
ərazilərinin işğalına son qoyulmalıdır
və yalnız o vaxt regionda sülh bərpa olunacaqdır.
Bizim mövqeyimiz istər tarixi baxımdan, istərsə
də hüquqi, siyasi, iqtisadi baxımdan, qüvvələr
balansı, - o cümlədən hərbi sahədə, - baxımından
möhkəmdir. Dağlıq Qarabağın
ərazisində tarixən həmişə Azərbaycan
xalqının nümayəndələri yaşamışdır.
1828-ci ildə həmin əraziyə erməni xalqının
nümayəndələri köçürülmüş, sonradan onlar orada
çoxluq təşkil etmiş və bu, separatçılıq
təzahürlərinin başlanmasına təkan vermişdir.
Bu gün Dağlıq Qarabağ rejimi heç kim
tərəfindən tanınmamışdır. O,
əslində, kriminal rejimin idarə etdiyi qanunsuz,
qeyri-leqal qurumdur. Orada heç bir qanun işləmir, orada
beynəlxalq monitorinq keçirilmir, orada kriminallaşma,
narkotrafik, terrorizm kimi çox təhlükəli proseslər baş
verir və bunların hamısı bütün qitə üçün
təhlükədir. Ona görə ki, indi dünyada, xüsusən
Avropada nəzarətsiz zonaların sayı o qədər
də çox deyildir. Bu, bütün regionda sabitliyin pozulmasına
gətirib çıxara biləcək böyük təhlükədir.
Beynəlxalq hüquq normaları baxımından
BMT-nin Təhlükəsizlik Şurası erməni silahlı
qüvvələrinin bizim ərazidən çıxarılmasını
tələb edən dörd qətnamə qəbul etmişdir,
lakin onlara əməl olunmur. Bu yaxınlarda BMT-nin Baş
Məclisi işğalçı qüvvələrin
ərazimizdən çıxarılmasını tələb
edən yeni qətnamə qəbul etmişdir. Biz Ukraynaya
çox minnətdarıq ki, o, BMT-də səsvermə zamanı
Azərbaycanı dəstəklədi, əslində,
ədaləti dəstəklədi və beynəlxalq hüquq
normalarının bərqərar olmasına tərəfdar
çıxdı. Mən bu məsələnin siyasi
tərəfi barədə danışanda qeyd
etməliyəm ki, bu gün, heç şübhəsiz, regional
əməkdaşlıq, qlobal enerji təhlükəsizliyi
məsələlərində Azərbaycanın
əhəmiyyəti və rolu artır. Azərbaycanın
iqtisadi potensialı çox sürətlə artır və indi
bizim iqtisadiyyatımız hələ də beynəlxalq hüququn
norma və prinsiplərinə riayət etmək
istəməyən həmin ölkənin iqtisadiyyatından,
demək olar ki, 7 dəfə artıqdır. Münaqişənin
həlli bizim üçün bir nömrəli problem və ölkəmizin
qarşısında duran ən ciddi problemdir. Bu, bizim
yeganə problemimizdir, çünki iqtisadi islahatlar, siyasi
islahatlar, sosial proqramlar -
bütün bunlar ona doğru aparır ki, biz Azərbaycanın,
sözün tam mənasında, inkişaf etmiş dövlətə
çevrilməsinə nail olacağıq. Dağlıq Qarabağ münaqişəsinin
həll edilməməsi bütün regionun təhlükəsizliyi
üçün təhdiddir. Bir daha demək istəyirəm ki, bizi
dəstəklədiyinə görə qardaş Ukraynaya
minnətdarıq və gələcəkdə də
diplomatik və siyasi səylərimizi artırmağa çalışacağıq
və əlbəttə, müdafiə qabiliyyətinin artırılmasını
da unutmayacağıq. Son vaxtlar bu istiqamətdə az iş
görülməmişdir. Qısaca onu deyə bilərəm ki,
hazırda Azərbaycanın müdafiə xərcləri
təxminən iki milyard dollara bərabərdir, bu isə
Ermənistanın illik büdcəsi ilə müqayisə
edilə bilər. Vaxtın məhdud olması ilə
əlaqədar mən öz çıxışımı
tamamlamağa məcburam. Bir daha demək istəyirəm
ki, bu gündən etibarən Kiyev Milli Universitetinin fəxri
doktoru adını daşımaq mənim üçün böyük
şərəfdir. Mən gələcək
fəaliyyətimdə çalışacağam ki, Ukrayna
ilə Azərbaycan arasında münasibətlər daim inkişaf
etsin, yeni formalarla, yeni layihələrlə zənginləşsin.
Bizim ölkələrimizin xalqları arasında tarixən
yaxınlıq vardır. Bu gün bir-birimizə strateji
tərəfdaşlar kimi baxdıqda, təbii ki, ölkələrimiz
arasında münasibətlərin keyfiyyəti tamam başqadır.
Əminəm ki, gələcəkdə biz bütün
sahələri - təkcə energetikanı deyil,
iqtisadiyyat, nəqliyyat sahələrini, humanitar
əməkdaşlığı və sairi də
əhatə edən bütün planları və
layihələri reallaşdıracağıq. Onda,
təbii ki, ölkələrimizin potensialı xeyli artacaqdır.
Biz artıq indi görürük ki, möhkəm siyasi
əlaqələr keçən il əmtəə dövriyyəsinin
40 faizdən çox artmasına gətirib çıxarmışdır.
Bu, yalnız başlanğıcdır. Biz öz ölkələrimizin
- müstəqil Ukraynanın və müstəqil Azərbaycanın,
müstəqil siyasət yeridən ölkələrin inkişafının
keyfiyyətcə yeni mərhələsindəyik. Xalqlarımız
əsrlər boyu öz taleyimizi özümüzün müəyyənləşdirəcəyi
günün həsrətini çəkmişdir. Bizim nəslin xoşbəxtliyi
ondadır ki, həmin günü gördük və ən başlıcası,
bu müstəqilliyi möhkəmlətmək və
gələcək nəsillərimiz üçün qoruyub saxlamaq
imkanımız vardır. Universitetin Elmi Şurasına, mənə
bu fəxri adın verilməsi barədə qərar
qəbul edənlərin hamısına təşəkkür
etmək, qardaş Ukrayna xalqına öz dərin hörmət
və məhəbbətimi ifadə etmək, sizin bütün
planlarınızın həyata keçməsini və
gələcəkdə Ukraynaya bütün işlərində böyük
uğurlar diləmək istəyirəm. Sağ olun. *** Universitetin rektoru vəzifəsini icra
edən akademik Leonid Quberski Azərbaycan dövlətinin başçısını
Taras Şevçenko adına Kiyev Milli Universitetinin fəxri
doktoru adına layiq görülməsi münasibətilə bir daha
səmimi təbrik etdi, ona cansağlığı və
Azərbaycan xalqının rifahı naminə
fəaliyyətində uğurlar, qardaş Azərbaycan
xalqına isə sülh, xoşbəxtlik və
tərəqqi arzuladı. *** Mərasimdən sonra Prezident İLHAM
ƏLİYEV universitetdə təhsil alan azərbaycanlı
tələbələrlə söhbət etdi: - Mən sizin hamınızı salamlayıram.
Şadam ki, Azərbaycanın gəncləri burada oxuyurlar.
Bu universitetin dünyanın aparıcı ali
məktəblərindən biri olduğunu qeyd etdim, çox
şadam ki, Azərbaycanın Ukraynada oxuyan
tələbələrinin sayı artır. Siz
gərək təhsili bitirəndən sonra
Vətənə qayıdasınız. Xüsusilə indi
Azərbaycanda işlər çoxdur. Sizin kimi gənc mütəxəssislər
istənilən sahədə çox lazımdır.
Azərbaycan inkişaf edir. Bilirsiniz ki, xaricdə
tələbələrin təhsil alması ilə bağlı
proqram da hazırlanıbdır. Amma mən artıq bu gün
təsəvvür edirəm ki, təhsil yaxşı olacaq
və siz yaxşı biliklərlə Vətənə qayıdacaqsınız.
Ukrayna dilini də bilirsiniz? TƏLƏBƏ: - Bəli, cənab
Prezident, Ukrayna dilində təhsil alırıq! İLHAM ƏLİYEV: - Ukrayna
dilində oxuyursunuz? Ukrayna bizim üçün dost ölkədir.
Mən bu gün də dedim, bu dostluğu möhkəmləndirmək
üçün bütün imkanlardan istifadə edəcəyəm. Siz
isə, necə deyərlər, təbii olaraq, Ukraynada
Azərbaycanın səfirlərisiniz. Siz
gələcəkdə də, yəqin ki, öz işinizdə
Ukrayna ilə bağlı olacaqsınız. Bir halda ki,
Ukrayna dilini bilirsiniz, bu, bizim dostluğumuzu daha da möhkəmləndirəcəkdir.
Mən qeyd etdim, bu universiteti bitirmiş insanlar
Azərbaycanda müxtəlif sahələrdə və
məsul vəzifələrdə çalışırlar.
Sizə də uğurlar arzulayıram. Yaxşı bilik
sahibi olmalısınız ki, Azərbaycanda yaxşı
yer tuta biləsiniz. Bu gün, doğrudan da, ölkəmizə
istənilən sahədə yaxşı mütəxəssislər
lazımdır. Sizə uğurlar arzulayıram. *** Tələbələr gənclər üçün
yaradılmış şəraitə görə dövlətimizin
başçısına təşəkkür etdilər,
Azərbaycanı başqa ölkələrdə həmişə
ləyaqətlə təmsil etməyə çalışacaqlarını
vurğuladılar. Prezident İlham Əliyev
tələbələrlə xatirə şəkli çəkdirdi.
AzərTAc
|