Yusif ƏLİYEV, "Azərbaycan müəllimi"
Azərbaycanın ali təhsil
tarixində ilk dəfə tətbiq olunan SABAH qrupları
layihəsində məqsəd xüsusi istedadı ilə seçilən və
təhsildə göstəriciləri ilə fərqlənən tələbələrə yüksək
keyfiyyətli təhsil almaq üçün əlverişli şəraitin
yaradılmasıdır. Ali məktəb kollektivləri, müəllim və
tələbələr tərəfindən də yüksək rəğbətlə qarşılanan bu
layihə çərçivəsində artıq 688 tələbə seçilərək SABAH
qruplarına daxil edilmiş və cari dərs ilindən tədrisə
başlamışdır. Lakin layihənin tətbiqi yönündə görülən
işlər barədə KİV vasitəsi ilə ictimaiyyətə vaxtaşırı
məlumatların verilməsinə baxmayaraq hələ də bir çox
insanlar bu qruplar haqqında kifayət qədər məlumata
malik deyil. Bunu nəzərə alıb SABAH qrupları haqqında
hazırladığımız materialı təqdim edirik.
SABAH qruplarının tarixi
SABAH qruplarının yaradılması ideyası Azərbaycan
Respublikasının təhsil naziri, son bir ildə Azərbaycanın
təhsilində tətbiq olunan bir sıra yeniliklərin
təşəbbüsçüsü Mikayıl Cabbarova məxsusdur. Nazir bu
təşəbbüs barədə fikirlərini ilk dəfə ötən ilin payızında
keçirilmiş mötəbər tədbirlərin birində səsləndirib.
Azərbaycan müəllimlərinin XIV qurultayındakı geniş
məruzəsində isə nazir növbəti tədris ilindən başlayaraq
ali təhsil müəssisələri üzrə SABAH qruplarının təşkili
üçün seçim aparılmasının nəzərdə tutulduğunu təhsilin
bütün pillələri üzrə nümayəndələrin iştirak etdiyi
qurultayın mötəbər tribunasından bir daha bəyan edib və
bundan sonra yeni layihənin tətbiqi yönündə işlərə start
verilib. Bu il fevralın 13-də "Hyatt Regency" otelində
Təhsil Nazirliyinin tabeliyindəki ali təhsil
müəssisələrində yaradılacaq SABAH qruplarının rəsmi
təqdimatı olub.
Sonra SABAH qruplarına tələbələrin qəbulu qaydaları
işlənib hazırlanıb və təsdiq olunub. Bu ilin may ayında
ölkənin bir sıra ali təhsil müəssisələrində (ADİU, AMİU,
ATU, ADPU, GDU, NDU və s.) SABAH qruplarının
təqdimatları keçirilərək həmin ali məktəblərin müəllim
və tələbələri yeni layihənin mahiyyəti ilə bağlı
məlumatlandırılıb.
SABAH - savadlı, bacarıqlı, hazırlıqlı tələbələrin
təhsil aldığı qrupdur
SABAH abreviaturasının açılışı savadlı, bacarıqlı,
hazırlıqlı deməkdir. Bu qruplar məhz bu keyfiyyətlərə
malik tələbələrdən formalaşdırılır. Mahiyyət etibarı ilə
SABAH qrupları ali təhsil məkanında, ali təhsil
müəssisələrində keyfiyyət, tədris, münasibət islahatının
rüşeymidir. SABAH-ın əsas məramı ondan ibarətdir ki,
yaxın gələcəkdə bütün ali təhsil müəssisələri bu
səviyyəyə çatsın.
SABAH qruplarının yaradılması ideyasının əsasında ali
təhsilin keyfiyyətinin yüksəldilməsi, ölkəmizə lazım
olan yüksək ixtisaslı mütəxəssislərin xaricdə deyil,
məhz ölkəmizin ali məktəblərində hazırlanması durur.
SABAH qrupları fərqli mühit, fərqli münasibət, fərqli
tədris deməkdir. Fərqli mühit dedikdə tələbəni diqqət
mərkəzinə qoyan, ali təhsil müəssisəsi - tələbə,
tələbə-tələbə, ali təhsil müəssisəsi - müəllim,
müəllim-tələbə münasibətləri fərqli olan bir mühit
nəzərdə tutulur.
SABAH qrupları müəyyən ixtisas üzrə peşəkar mütəxəssis
olmaq istəyən hər bir tələbəyə yeni imkanlar açır. Bu
qrupa qəbul olan tələbə oxuduğu ixtisasın ən yüksək
səviyyədə tədrisinin təşkil olunduğu ali təhsil
müəssisəsinə köçürülür. Həmin qruplara da keyfiyyətli
tədris bacarığı ilə seçilən müəllimlər dərs deyir. Başqa
sözlə, müəyyən ixtisas üzrə ən yaxşı tələbələr və
müəllimlər vahid məkana gətirilir.
SABAH qrupları burada təhsil alan tələbələrə fərqli
gələcək, əmək bazarında daha tez və asan iş tapmaq
perspektivi vəd edir. SABAH qrupları nəticə etibarı ilə
həm də dövlətin təhsilə, gənclərə qayğısı deməkdir. Bu
baxımdan SABAH qruplarının yaradılması ali təhsilin
keyfiyyətinin daha da yüksəldilməsi, müasir tələblərə
uyğun kadrların sayının artırılması istiqamətində
atılmış əhəmiyyətli addım kimi qiymətləndirilir.
Bu
qruplarda 688 tələbə təhsil alır
Hazırda SABAH qruplarında 7 ali təhsil müəssisəsi üzrə
688 tələbə təhsil alır. Bu ali məktəblər Bakı Dövlət
Universiteti, Azərbaycan Memarlıq və İnşaat Universiteti,
Azərbaycan Texniki Universiteti, Azərbaycan Dövlət
İqtisad Universiteti, Azərbaycan Dövlət Neft
Akademiyası, Azərbaycan Dövlət Pedaqoji Universiteti və
Azərbaycan Dillər Universitetidir.
688 tələbənin böyük əksəriyyəti - təxminən 560 nəfəri üç
ali məktəbdə (Bakı Dövlət, Azərbaycan Dövlət İqtisad
universitetlərində və Neft Akademiyasında) təhsilə cəlb
olunub. Qalan tələbələr isə dörd ali məktəbin
(Azərbaycan Memarlıq və İnşaat Universitetinin,
Azərbaycan Dövlət Pedaqoji Universitetinin, Azərbaycan
Dillər Universitetinin və Azərbaycan Texniki
Universitetinin) payına düşür.
Tələbələrin ali təhsil müəssisələri üzrə bölgüsü isə
təxminən belədir: Bakı Dövlət Universiteti - 230 nəfər,
Azərbaycan Dövlət İqtisad Universiteti - 224 nəfər,
Azərbaycan Dövlət Neft Akademiyası 106 nəfər, Azərbaycan
Dillər Universiteti - 50 nəfərdən çox və s.
Bu il SABAH qruplarına qəbul üçün 53 ixtisas üzrə elan
verilməsinə baxmayaraq, bu ixtisaslar üzrə ərizə verən
və müsabiqədən keçən tələbələrin heç də hamısını SABAH
qruplarına daxil etmək mümkün olmayıb. Belə ki, qruplar
formalaşdırılarkən Nazirlər Kabinetinin ali məktəblərdə
qrupların formalaşdırılması ilə bağlı göstərişi nəzərə
alınıb. Məlum olduğu kimi, bu göstərişə əsasən ali
təhsil müəssisələrində qruplar minimum 15, maksimum 30
tələbədən ibarət olmaqla formalaşdırılır. Bu baxımdan
eyni ixtisas üzrə bu göstəricidən çox tələbə sayı olan
ixtisaslardan qruplar formalaşdırılıb, daha az - 5-6
nəfər tələbə sayı olan bəzi ixtisaslar üzrə isə qruplar
formalaşdırmaq mümkün olmadığından onlardan imtina
edilib.
Tədris dili ilə bağlı da vəziyyət, təxminən, bu cür olub.
Müsabiqədə ali təhsil müəssisələrinin Azərbaycan, rus və
ingilis dili bölmələrində təhsil alan tələbələrinin
iştirak etməsinə və seçilməsinə baxmayaraq, tələbə sayı
azlığından rus və ingilis dili bölmələri üzrə qruplar
yaradılması mümkün olmayıb. Bu dillərdə təhsil alan
tələbələrə təhsillərini Azərbaycan bölməsində davam
etdirmək təklif olunub. Razılaşanlar müvafiq ərizələr
alınmaqla uyğun ixtisaslar üzrə Azərbaycan bölməsi
qruplarına daxil edilib.
Nəticə etibarı ilə indi ali təhsil müəssisələrində
yalnız Azərbaycan bölməsi üzrə qruplar fəaliyyət
göstərir.
Tələbələrin seçimi xüsusi qaydalar əsasında aparılır
SABAH qruplarına tələbələrin qəbulu Təhsil Nazirliyi
tərəfindən təsdiq olunmuş xüsusi qaydalar əsasında
aparılır. Bu qaydalara əsasən Azərbaycan Respublikasında
fəaliyyət göstərən ali təhsil müəssisələrində I kurs
tələbələrinin SABAH qruplarına qəbulu mərkəzləşdirilmiş
qaydada üç mərhələli müsabiqə yolu ilə, elektron
proqram təminatı tətbiq olunmaqla həyata keçirilir.
Müsabiqənin I mərhələsi tələbələrin elektron qaydada
Təhsil Nazirliyinin saytında yerləşdirilmiş qeydiyyat
forması əsasında qeydiyyata alınması və elektron
ərizədəki göstəricilərin qiymətləndirilməsi, II
mərhələsi xarici dil və məntiq üzrə hər biri 25 sual
olmaqla 50 sualdan ibarət test imtahanının keçirilməsi,
III - sonuncu mərhələsi isə test imtahanından uğurla
keçən tələbələrlə müsahibənin aparılmasını əhatə edir.
Müsabiqənin yekun nəticələrinə əsasən tələbələr SABAH
qruplarına qəbul edilir. Qəbul olunmuş tələbələr
müəyyənləşdirildikdən sonra onların siyahısı Təhsil
Nazirliyinin əmri ilə təsdiq olunur və müvafiq siyahılar
baza ali təhsil müəssisələrinə göndərilir.
Məlumat üçün bildirək ki, SABAH qruplarına builki seçim
proseduru da bu qaydalar çərçivəsində təşkil olunub.
Belə ki, SABAH qruplarına daxil olmaq üçün mayın 12-dən
iyunun 15-dək ərizə qəbulu aparılıb. Bu müddət ərzində
seçimin aparılacağı təhsil, təbiət, humanitar və sosial,
iqtisadiyyat və idarəetmə, texniki və texnoloji ixtisas
qruplarına daxil olan 53 ixtisas üzrə 2500-dən çox
tələbə qeydiyyatdan keçib.
İyulun 6-da Təhsil Nazirliyi tərəfindən Azərbaycan
Dövlət İqtisad və Naxçıvan Dövlət universitetlərində
SABAH qruplarına qəbul imtahanları keçirilib.
İmtahanlarda 1154 nəfər namizəd iştirak edib.
İyulun 17-dən başlayaraq isə üç gün ərzində SABAH
qruplarına daxil olmaq istəyən namizədlərlə müsahibə
aparılıb. Müsahibə mərhələsinə II mərhələnin yekunlarına
əsasən yetərli bal toplayan 24 ixtisas üzrə 750-yə yaxın
tələbə buraxılıb.
Sonda tələbələrin akademik göstəriciləri, test
imtahanından topladığı ballar, müsahibənin nəticələri
təhlil olduqdan sonra SABAH qruplarının tərkibi
müəyyənləşdirilib və deyildiyi kimi 688 tələbə bu
qruplarda təhsil almaq hüququ qazanıb.
SABAH qruplarında seçilmiş müəllimlər tədris aparır
SABAH qruplarında dərs demək üçün ali təhsil
müəssisələrində işləyən professor-müəllim heyətindən
müəllimlər də seçim yolu ilə müəyyənləşdirilib.
Müəllimlərin seçilməsi üçün Təhsil Nazirliyində 5
ixtisas qrupu üzrə komissiyalar yaradılıb. Həmin
komissiyaların tərkibinə təkcə Təhsil Nazirliyindən
deyil, ali təhsil müəssisələrindən, elmi-tədqiqat
institutlarından, sənayedən nümayəndələr, müvafiq
sahələr üzrə öz sözünü demiş nüfuzlu peşəkar müəllimlər,
şirkət rəhbərləri daxil edilib.
Müsahibədə iştirak edən müəllimlərin siyahısı tutulub,
onlara yekun qiymət verilib və həmin qiymət əsasında da
onlara SABAH qruplarında öz ixtisasları üzrə dərs demək
təklif olunub.
Seçim zamanı müəllimin tədris təcrübəsi, tədris etdiyi
fənn üzrə mövcud ədəbiyyatla tanışlığı, müasir tədris
metodikalarından və texnologiyalarından istifadə
edib-etməməsi, ümumi dünyagörüşü, xarici dil bilməsi,
auditoriyanı diqqət mərkəzində saxlamaq üçün hansı
üsullardan istifadə etməsi və s. kimi məsələlərə diqqət
yetirilib və ən qabaqcıl müsbət nəticələrə malik olan
müəllimlər seçilib.
Bu qruplarda tədris necə
təşkil olunur?
SABAH qruplarında tədris xüsusi proqramlar əsasında
aparılır. Burada tədrisin əsasını təşkil edən ali təhsil
müəssisəsi - tələbə, tələbə-tələbə, tələbə-müəllim
münasibətləri adi qruplardakından fərqlənir və
qarşılıqlı səmimiyyət, hörmət, işgüzarlıq, birgə
fəaliyyət və s. kimi prinsiplər əsasında qurulur. Bu
qruplarda tədrisin ən böyük fərqi isə xarici dilin -
ingilis dilinin daha intensiv tədris olunmasıdır. Belə
ki, bu qruplarda həftədə 6 saat olmaqla ildə 180 saat
ingilis dilinin tədrisi nəzərdə tutulub.
İngilis dilinin tədrisində yeni yanaşmalardan istifadə
olunur. Bu qruplarda dərs demək üçün seçilmiş
müəllimlərlə yanaşı ingilis dilinin tədrisi, ingilis
mədəniyyətinin təşviqi ilə məşğul olan, Azərbaycanda 20
illik işləmək təcrübəsinə malik British Council
təşkilatının sertifikatlaşmasından keçmiş azərbaycanlı
müəllimlər, dil daşıyıcıları olan, yəni ingilis dili
onlar üçün ana dili olan, dünyanın bir sıra ölkələrində
ingilis dilinin tədrisi sahəsində böyük təcrübə toplamış
xarici mütəxəssislər dəvət olunur.
Tədrislə, akademik mühiti ilə sənaye mühitinin vəhdətini
yaratmaq məqsədi ilə SABAH qrupları ilə tədris prosesinə
sənayedən gələn mütəxəssislər, şirkət rəhbərləri,
şirkətlərin məsul işçiləri də cəlb olunur. Onlar
mühazirələr oxuyur, tələbələrlə ünsiyyət yaradırlar.
Belə şirkətlərlə ünsiyyət SABAH qruplarında oxuyan
tələbələrin istehsalat təcrübəsinin təşkilində, məzunun
gələcəkdə işlə təmin olunmasında yeni imkanlar əldə
etməyə şərait yaradır. Eləcə də tələbələrin
elmi-tədqiqat işləri ilə maraqlanmasında bu qruplar
üstün mövqeyə malikdir. Məsələn, hansısa SABAH qrupunda
tədris aparan professor aktual bir mövzunun
araşdırılması ilə bağlı yeni bir fəaliyyət, çözüm
metodları tapır və onları istehsalata tətbiq edir. Belə
əməkdaşlıq nəticəsində əldə olunan yenilikləri həmin
professor dərhal tədris etdiyi auditoriyada birbaşa
tələbələrə çatdırır. Nəticədə sənayedən tədrisə keçid
daha da yaxınlaşmış olur.
Tələbələr bir sıra
imtiyazlardan istifadə edirlər
SABAH qruplarında təhsil alan tələbələr xüsusi
imtiyazlara malikdir. Birinci imtiyaz, irəlidə qeyd
etdiyimiz kimi, bu qruplarla adi qruplar arasında tədris
fərqinin olması, SABAH qruplarında mühazirələri oxumaq
üçün xaricdən müəllimlərin dəvət olunmasıdır. Burada
ingilis dilinin intensiv proqramla öyrədilməsi də
imtiyaz hesab oluna bilər.
Digər bir imtiyaz SABAH-ın tələbələrinə əlavə
təqaüdlərin verilməsidir. Əlavə təqaüd SABAH qruplarına
qəbul olunmuş bütün tələbələrə, istər dövlət sifarişli
ixtisaslar üzrə oxuyan, istərsə də ödənişli əsaslarla
təhsil alan tələbələrə ödənir. Məsələn, dövlət sifarişli
ixtisas üzrə oxuyan tələbə həm öz təqaüdünü, həm də
SABAH-da oxuduğu üçün əlavə təqaüd alır. Ödənişli əsasla
oxuyanlar isə yalnız SABAH təqaüdü alırlar. Başqa ali
təhsil müəssisəsindən gəlmiş ödənişli əsaslar üzrə
təhsil alan tələbələr ikinci kursdan başlayaraq təhsil
haqlarını SABAH qruplarında oxuduğu ali məktəbə
köçürürlər.
SABAH qruplarında təhsilin tələbələrə verdiyi bir
üstünlük də yataqxana ilə təminatdır. Belə ki, təxminən
300 tələbə yerlik, yüksək səviyyədə təmir olunmuş
yataqxana onların istifadəsindədir. Yataqxanada yer
ehtiyac duyan, rayon qeydiyyatında olan və qalmağa yeri
olmayan tələbələrə rəsmi müraciət əsasında ayrılır.
Həmin yataqxanada yaşayan tələbələrə gündə üç dəfə
pulsuz yemək verilir. Orada tələbələrə mərkəzləşdirilmiş
qaydada iaşə xidməti göstərilir.
Ali məktəblərdə ödənişli
əsaslarla təhsil alan tələbələr də bu qruplarda oxuya
bilərlər
Daxil olduqları və 1 il oxuduqları dövlət ali təhsil
müəssisələrində ödənişli əsaslarla təhsil alan tələbələr
də SABAH qruplarına daxil ola və təhsilini bu qruplarda
davam etdirə bilərlər. Bu il SABAH qruplarına qəbul
olunan tələbələr arasında belələri vardır. Əslində
tələbələrə qeydiyyat açıq elan olunur. Qeydiyyat üçün
əsas şərt isə, irəlidə deyildiyi kimi, tələbənin daxil
olduğu ali məktəbdə SABAH qrupları üçün müəyyən edilmiş
ixtisas üzrə I tədris ilinin I semestrinin nəticələrinə
görə 61 bal toplanmasıdır. Ona görə də müvafiq akademik
göstəricisi olan və ölkəmizdə fəaliyyət göstərən 33 ali
təhsil müəssisəsində (xüsusi təyinatlılar istisna
olmaqla) oxuyan tələbələr iştirak edə bilər.
Qəbul imtahanlarının nəticələri seçimdə nəzərə alınırmı?
SABAH qrupları müvafiq akademik göstəriciləri (I
semestrin nəticələrinə görə 61 bal) olan və 3 mərhələdən
ibarət müsabiqədən uğurla keçib müsbət nəticələr əldə
etmiş tələbələrdən formalaşdırılır. Əgər bu prosesdə
eyni nəticə göstərmiş 2 nəfər olursa, yəni onların
balları və digər nəticələri eyni olursa, bu zaman
tələbənin qəbul imtahanlarındakı yüksək nəticələri
nəzərə alınır və seçimdə ona üstünlük verilir.
Amma bu konkret halda, konkret ixtisasdan, ali məktəbdən
asılı ola bilir.
SABAH qruplarına tələbələri seçdikdə ilkin olaraq
onların yarımillik təhsilinin nəticələri əsas götürülür.
Mövcud SABAH qruplarının tərkibi göstərir ki, bu qrupda
oxuyan tələbələr arasında ali məktəblərə qəbul
imtahanlarında yüksək bal toplayanlar çoxdur. Amma
elələri də var ki, qəbul imtahanlarında yüksək bal
toplayıb, amma SABAH qruplarında oxumaq istəmir.
Sonda onu da qeyd edək ki, SABAH qruplarının yaradılması
tələbələrə qapıları açıq edən, yüksək tədris imkanları
verən, gələcəklərini təmin edən çox gözəl təşəbbüsdür.
İnanırıq ki, yaxın gələcəkdə ölkəmizin bütün ali
təhsil müəssisələrində bugünkü SABAH qrupları
səviyyəsində təhsilin keyfiyyəti təmin ediləcək və
gənclərimizin ətək-ətək pul xərcləyib xaricdə təhsil
almasına ehtiyac qalmayacaqdır.
*
SABAH abreviaturasının açılışı savadlı, bacarıqlı,
hazırlıqlı deməkdir. Bu qruplar məhz bu keyfiyyətlərə
malik tələbələrdən formalaşdırılır.
*
Bu qrupa qəbul olan tələbə oxuduğu ixtisasın ən yüksək
səviyyədə tədrisinin təşkil olunduğu ali təhsil
müəssisəsinə köçürülür. Həmin qruplara da keyfiyyətli
tədris bacarığı ilə seçilən müəllimlər dərs deyir.
*
Hazırda SABAH qruplarında 7 ali təhsil müəssisəsi üzrə
688 tələbə təhsil alır.
*
İndi ali təhsil müəssisələrində yalnız Azərbaycan
bölməsi üzrə qruplar fəaliyyət göstərir.
*
SABAH qruplarına qəbul mərkəzləşdirilmiş qaydada üç
mərhələli müsabiqə yolu ilə, elektron proqram təminatı
tətbiq olunmaqla həyata keçirilir.
*
SABAH qruplarında dərs deyəcək müəllimlər də xüsusi
seçim qaydaları əsasında müəyyənləşdirilir.
*
SABAH qruplarında tədris xüsusi proqramlar əsasında
aparılır.
*
SABAH qruplarında təhsil alan tələbələr xüsusi
imtiyazlara malikdir.
*
SABAH qruplarında ödənişli əsaslarla təhsil alan
tələbələrə də təqaüd verilir.
*
SABAH qruplarında təhsilin tələbələrə verdiyi bir
üstünlük də yataqxana ilə təminatdır. Həmin yataqxanada
yaşayan tələbələrə həm də gündə üç dəfə pulsuz yemək
verilir.
SABAH
QRUPLARINA TƏLƏBƏLƏRİN
QƏBULU QAYDALARI
ÜMUMİ MÜDDƏALAR
1.1. "SABAH qruplarına tələbələrin qəbulu Qaydaları"
(bundan sonra Qaydalar) "Azərbaycan Respublikasında
təhsilin inkişafı üzrə Dövlət Strategiyası"na uyğun
olaraq hazırlanmışdır.
1.2. Bu Qaydalar SABAH qruplarına tələbələrin seçilməsi
ilə bağlı müsabiqənin keçirilməsini tənzimləyir.
MÜSABİQƏNİN TƏŞKİLİ
2.1. Azərbaycan Respublikasında fəaliyyət
göstərən ali təhsil müəssisələrində I kurs tələbələrinin
SABAH qruplarına qəbulu mərkəzləşdirilmiş qaydada üç
mərhələli müsabiqə yolu ilə (elektron ərizədəki
göstəricilərin qiymətləndirilməsi, test imtahanı və
müsahibə) elektron proqram təminatı tətbiq olunmaqla
həyata keçirilir.
2.2. SABAH qruplarına müəyyən edilmiş
ixtisaslar üzrə I tədris ilinin I semestrinin
nəticələrinə görə orta müvəffəqiyyət göstəricisi 61
baldan aşağı olmayan tələbələr müraciət edə bilər.
2.3. Müsabiqədə tələbələr yalnız təhsil
aldığı ixtisas üzrə iştirak edə bilər.
2.4. SABAH qruplarına tələbələrin qəbulunu
həyata keçirmək üçün SABAH layihəsinin rəsmi İnternet
saytında (www.sabah.edu.az)
"Savadlı, Bacarıqlı və Hazırlıqlı ("SABAH")
tələbələr" bu Qaydalar, "Elektron ərizə forması",
"Elektron ərizənin doldurulmasına dair təlimat" və
"Şəxsi səhifə" yerləşdirilir.
2.5. SABAH qruplarına tələbələrin qəbul
prosesinin səmərəli təşkili və keçirilməsi üçün Təhsil
Nazirliyi tərəfindən müsabiqə komissiyası və imtahanın
nəticələri ilə bağlı şikayətlərə baxılması məqsədilə
apelyasiya komissiyası yaradılır.
2.6. Müsabiqədə iştirak etmək üçün SABAH
qruplarının rəsmi İnternet saytına (www.sabah.edu.az)
daxil olub elektron ərizə doldurulmalıdır. Elektron
ərizələrin qəbulu vaxtı Təhsil Nazirliyi tərəfindən hər
il müəyyənləşdirilir və elan edilir.
2.7. Elektron ərizələrin qəbulu başa
çatdıqdan 10 (on) təqvim günü sonra ərizəsi təsdiqlənmiş
namizədlər II mərhələnin test imtahanının keçirilmə
vaxtı və məkanı barədə elektron formada bildiriş
göndərilməklə məlumat əldə edirlər.
2.8. Elektron ərizə əsasında müsabiqənin I
mərhələsində elektron proqram təminatı vasitəsilə hər
bir namizədin qiymətləndirilməsi aparılır.
2.9. SABAH qruplarına tələbələrin qəbulu
üzrə müsabiqənin II mərhələsində test imtahanın
keçirilməsi üçün Təhsil Nazirliyi tərəfindən "Test
bankı" hazırlanır. Test imtahanı xarici dil və məntiq
komponentləri üzrə aparılır.
2.10. Müsabiqə iştirakçıları imtahanın
başlanmasına 1 (bir) saat qalmış qeydiyyatdan
keçməlidirlər. Bunun üçün şəxsiyyət vəsiqəsinin əsli
təqdim edilir. Şəxsiyyəti təsdiq edən sənəd təqdim
olunmadıqda, namizəd imtahana buraxılmır.
2.11. Hər hansı bir səbəbdən göstərilən vaxtda
imtahanda iştirak etməyənlər üçün təkrar imtahan
keçirilmir.
2.12. "Test suallarının cavablandırılmasına
dair təlimat"a uyğun olaraq imtahanda iştirak edən hər
bir namizədə fərdi olaraq xarici dil üzrə 25 sual və
məntiq üzrə 25 sual olmaqla, cəmi 50 sual təqdim edilir.
Sualların cavablandırılmasına 1,5 saat vaxt ayrılır.
2.13. Hər bir düzgün cavab 1 balla
qiymətləndirilir.
2.14. Müsabiqənin I və II mərhələləri üzrə
qiymətləndirmə nəticələri Təhsil Nazirliyinin saytında
dərc edilir.
2.15. Topladıqları ümumi bal əsasında
iştirakçılar III mərhələdə iştirak etməyə dəvət
olunurlar.
2.16. Müsabiqənin III mərhələsinə buraxılmış
namizədlər müsahibə üçün qeyd olunan tarixdə şəxsi işini
(elektron ərizənin surəti, diplomlar və sertifikatların
surəti və şəxsiyyət vəsiqəsinin surətini) müsabiqə
komissiyasına təqdim edirlər.
2.17. Müsahibə hər bir ixtisas üzrə Təhsil
Nazirliyi tərəfindən təyin olunmuş üç nəfərdən ibarət
səriştəli komissiya tərəfindən şifahi formada aparılır.
Müsahibədə namizədin seçdiyi ixtisasa marağı, bu
sahədəki bilikləri və ümumi dünyagörüşü
qiymətləndirilir.
2.18. Bütün mərhələlər üzrə yekun
qiymətləndirmə aşağıdakı meyarlar əsasında həyata
keçirilir.
2.18.1. tələbənin akademik göstəriciləri;
2.18.2. II mərhələ zamanı keçirilən test imtahanının
nəticəsi;
2.18.3. tələbənin motivasiyası.
2.19. I mərhələnin qiymətləndirilməsinə təsir
edən elektron ərizədəki məlumatlarla təqdim edilən
sənədlər arasında uyğunsuzluq halları aşkarlandıqda,
həmin namizəd müsabiqədən kənarlaşdırılır.
2.20. Müsabiqənin yekun nəticələrinə əsasən
SABAH qruplarına qəbul edilən tələbələr
müəyyənləşdirildikdən sonra onların siyahısı Azərbaycan
Respublikası təhsil nazirinin əmri ilə təsdiq olunur,
Nazirliyin İnternet səhifəsində və SABAH qruplarının
rəsmi saytında yerləşdirilir, müvafiq siyahılar baza ali
təhsil müəssisələrinə göndərilir. |