|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Bakı
Slavyan Universiteti yeni inkişaf mərhələsində Müstəqilliyimizin əbədiliyini və dönməzliyini
təmin etmiş ümummilli lider Heydər Əliyevin
fədakar əməyi nəticəsində Azərbaycanın
dünya birliyinə inteqrasiyası, inkişaf etmiş xarici
ölkələrlə qurulan və günbəgün möhkəmlənən
əlaqələr, respublikamızın müasir dünyaya qovuşması
gənc nəslin təlim-tərbiyəsi sahəsində
aparılan dövlət siyasəti qarşısında yeni
tələblər qoydu. Bu baxımdan ümummilli lider
Heydər Əliyevin 2000-ci iİ 13 iyunda imzaladığı
"Azərbaycan Respublikasında təhsil sisteminin
təkmilləşdirilməsi haqqında" fərman
və bu sənədin dövlət strukturları qarşısında
qoyduğu vəzifələrin icrası ilə bağlı
görülmüş tədbirlər ölkənin təhsil sisteminin
inkişafında tarixi addım kimi
qiymətləndirilməlidir. ölkə başçısının bu
fərmanına müvafiq olaraq, təməli 1946-cı
ildə qoyulmuş, sonradan M.F.Axundov adına Azərbaycan
Pedaqoji Rus dili və Ədəbiyyatı İnstitutu kimi
fəaliyyət göstərmiş ali məktəbin bazasında
yeni tədris ocağı - Bakı Slavyan Universiteti yaradıldı.
Bu universitetin yaradılmasını, ilk növbədə,
müstəqil Azərbaycanın dünya birliyi ölkələri
ilə, o cümlədən, Şərqi Avropa dövlətləri
ilə daim genişlənən əlaqələri, bu ölkələrin
dil və ədəbiyyatını, iqtisadiyyatını,
coğrafiyasını, ictimai-siyasi sistemini və
mədəniyyətini dərindən bilən yüksək
hazırlıqlı mütəxəssislərin yetişdirilməsi
tələbatı şərtləndirmişdir. Bu
vəzifənin yüksək səviyyədə həyata keçirilməsi
məqsədi ilə Bakı Slavyan Universitetinin köklü
şəkildə yenidən təşkili zərurəti
ortaya çıxdı. Respublikada daha yüksək statusa və
tələbələrin daha geniş ixtisaslaşmasını
təminetmə qabiliyyətinə malik yeni tədris ocağı
yaradılmış, qısa bir müddət ərzində
BSU yüksək hazırlıqlı mütəxəssislərə,
peşəkar kadrlara, tədris və elmi potensiala, müasir
infrastruktura malik çoxşaxəli tədris müəssisəsinə
çevrilmişdir. Qısa müddət ərzində sürətli
inkişaf yolu keçən BSU-nun kollektivini ulu öndər
Heydər Əliyevin dövlətçilik siyasətinin layiqli
davamçısı möhtərəm Prezident İlham Əliyevin
rəhbərliyi ilə respublikamızın son
illərdə qazandığı möhtəşəm uğurlar,
dövlət başçımızın
təhsilə, elmə qayğısı yeni
nailiyyətlərə ruhlandırır. Təhsil
sistemində aparılan köklü islahatlar, tədris prosesinin
təkmilləşdirilməsi, orta və ali təhsil müəssisələrinin
maddi-texniki bazasının möhkəmləndirilməsi,
təhsil işçilərinin maddi rifahının yüksəldilməsi
və ölkənin təhsil sisteminin dünya standartlarına uyğun
təşkil edliməsi ilə bağlı digər aktual
problemlər dövlət rəhbərinin gündəlik
diqqət yetirdiyi məsələlərə çevrilmişdir. Azərbaycan Prezidenti cənab İlham Əliyev
və Rusiya Federasiyasının Prezidenti cənab Vladimir
Putinin Moskva kommunikesində ayrıca sətirlə BSU-ya
hərtərəfli dəstək göstərilməsinin
bəyan edilməsi kollektivimiz tərəfindən
dərin minnətdarlıqla qarşılanmışdır. Həmin qayğı nəticəsində
bu gün Bakı Slavyan Universiteti unikal təhsil və
mədəniyyət mərkəzi kimi slavyan xalqlarının
mənəvi dəyərlərini tədqiq edən nüfuzlu
təhsil ocağına çevrilmişdir. Burada rus və
digər slavyan dilləri və ədəbiyyatı üzrə
ciddi tədqiqatlar həyata keçirilir, təkcə respublikamız
üçün deyil, həm də bir çox Şərq ölkələri
üçün yüksək hazırlıqlı mütəxəssislər
hazırlanır. Son illər ərzində universitetdə baş
vermiş struktur dəyişiklikləri onun bütün
fəaliyyət sahələrini əhatə etmişdir.
BSU-da altı fakültə, magistratura və qiyabi təhsil
şöbələri, hazırlıq şöbəsi, humanitar
lisey fəaliyyət göstərir. Filologiya fakültəsi filologiya - rus dili
və ədəbiyyatı, filologiya - Azərbaycan dili
və ədəbiyyatı və jurnalistika ixtisasları üzrə
kadr hazırlığını həyata keçirir. Pedaqoji
fakültədə respublikanın orta ümumtəhsil
məktəbləri üçün rus dili və ədəbiyyatı
müəllimləri, həmçinin ibtidai təhsilin pedaqogikası
və metodikası ixtisası üzrə bakalavrlar hazırlanır.
Beynəlxalq münasibətlər və regionşünaslıq
fakültəsində beynəlxalq münasibətlər üzrə
mütəxəssislər, Azərbaycan, Türkiyə, Rusiya,
Ukrayna, Polşa, Bolqarıstan, çexiya və Yunanıstan üzrə
genişprofilli regionşünaslar təhsil alırlar.
Tərcümə fakültəsində iki xarici dil - rus və
ingilis, polyak və ingilis, çex və ingilis və digər
dillər üzrə ixtisaslaşan peşəkar tərcüməçilər
hazırlanır. İxtisasartırma və yenidənhazırlanma
fakültəsi pedaqoji kadrların yenidən hazırlanmasını
və onların ixtisaslarının artırılmasını
təşkil edir. Respublikanın ali və orta
məktəb müəllimləri burada rus dili və
ədəbiyyatı üzrə ixtisaslarını artırır
və dinləyicilər müxtəlif sahələr üzrə
yeni ixtisaslara yiyələnirlər. Ədəbi istedadı
olan gənclər üçün BSU-da qeyri-formal təhsil həyata
keçirən yaradıcılıq fakültəsi
açılıb, burada poeziya, nəsr, tənqid üzrə
kurslar keçilir. Universitetin magistratura şöbəsində
dilşünaslıq, filologiya, regionşünaslıq,
beynəlxalq münasibətlər, maarif
istiqamətlərində müxtəlif ixtisaslar üzrə
magistr hazırlığı aparılır. Humanitar lisey,
qiyabi şöbə də universitet həyatında
əhəmiyyətli yer tutur.
Son illər ərzində BSU adi təhsil
ocağından slavistika və slavyan mədəniyyəti
mərkəzinə çevrilmişdir. Bu gün Bakı Slavyan Universitetində 25
kafedra fəaliyyət göstərir. Universitetin professor-müəllim
heyətinə 50-yə yaxın elmlər doktoru, professor,
200-dən çox elmlər namizədi, dosent, 300-dən
çox baş müəllim və müəllim daxildir. BSU-da "Lüğət mərkəzi",
"Tərcümə problemləri", "Türk-slavyan
əlaqələri", "Folklor araşdırmaları",
"ölkəşünaslıq" elmi-tədqiqat
laboratoriyaları, analitik informasiya mərkəzi yaradılmışdır.
Universitetdə yüksək ixtisaslı bakalavr və magistr
hazırlığını həyata keçirən fakültə
və kafedralardan, həmçinin ümumi və tədris
leksikoqrafiyasının, tərcüməşünaslığın,
türk-slavyan ədəbi və mənəvi
əlaqələrinin, azərbaycanşünaslığın
aktual problemlərini tədqiq edən elmi-tədqiqat
laboratoriyalarından başqa, Xarici əlaqələr
şöbəsi, Sosioloji tədqiqatlar xidməti, Ukrayna
"Bazar günü" məktəbi, "Kitab aləmi"
nəşriyyat-poliqrafiya mərkəzi, Tələbə
teatrı, "Səfir saatı" klubu, aspirantura və
doktorantura, "Russkaya kniqa" kitab mağazası,
Azərbaycan İngilis dili Müəllimləri Birliyinin ofisi
fəaliyyət göstərir. Universitetdə "BSU-nun elmi
əsərləri", "Azərbaycanda rus dili və
ədəbiyyatı" elmi-metodik jurnalı, "Mütərcim"
ədəbi, elmi, tərcümə jurnalı, alim və müəllimlərin,
aspirant və magistrantların elmi məcmuələri
nəşr edilir, "Tələbə dünyası"
qəzeti çap olunur. BSU-da "Slavyan dilləri", "Dünya
ədəbiyyatı" və müqayisəli-tarixi və müqayisəli-tipoloji
dilçilik ixtisasları üzrə doktorluq və namizədlik
dissertasiyalarının müdafiəsi üzrə Dissertasiya
Şurası fəaliyyət göstərir, "Müqayisəli
ədəbiyyat", "Müasir dilçiliyin
problemləri" adlı və digər
ənənəvi beynəlxalq elmi konfranslar keçirilir.
Bir çox xarici ölkələrin nüfuzlu alimlərinin iştirak
etdikləri bu ənənəvi konfranslar öz sambalı
ilə dünya səviyyəsində seçilir.Universitetimizdə
"Filoloqun kitabxanası" silsiləsindən dünya
filoloji fikrinin görkəmli nümayəndələrinin
əsərləri orijinaldan tərcümə edilərək
çap olunur. Artıq M.Baxtin, E.Koseriu, N.Xomski, Y.Qolosovkerin
monoqrafiyaları işıq üzü görmüşdür. BSU-da ali məktəb
tələbələri üçün elmin müasir
tələblərinə cavab verən yeni dərsliklər
və tədris vəsaitlərinin, lüğət və
məlumat ədəbiyyatının, tədris proqramları
və metodik tövsiyələrin hazırlanmasına xüsusi
diqqət yetirilir. Bütün ixtisaslar üzrə yeni tədris
proqramlarının tərtib edilməsi, rus
ədəbiyyatı tarixi, ədəbiyyat
nəzəriyyəsi, praktik rus dili, pedaqogika, rus dilçiliyi
və elmin digər sahələri üzrə ali
məktəb tələbələri üçün dərslik
və tədris vəsaitlərinin çapa hazırlanıb
nəşr edilməsi və dördcildlik
"Azərbaycanca-rusca lüğət"in işıq üzü
görməsi buna bariz nümunədir. 2000-ci ildə Bakı Slavyan Universitetinin
"Fəxri doktoru" adı təsis edilmişdir. ölkələrimiz
və xalqlarımız arasında dostluq və
əməkdaşlıq əlaqələrinin möhkəmləndirilməsi,
elm, təhsil və mədəniyyətin inkişaf
etdirilməsi işində xüsusi xidmətlər göstərmiş
bir sıra görkəmli dövlət rəhbərləri
və ictimai-siyasi xadimlər BSU Elmi Şurasının
qərarı ilə bu fəxri ada layiq görülmüşlər.
Rusiya Federasiyasının Prezidenti V.V.Putin, Moskva və Bütün
Rusiya patriarxı II Aleksi, Bolqarıstan Respublikasının
Prezidentləri J.Jelev və
G.Pırvanov, Yunanıstan Respublikasının Prezidenti
K.Stefanopulos, Ukrayna Respublikasının Prezidenti V.A.Yuşşenko,
Rusiya Federasiyasının Federal Məclisinin Federasiya Şurasının
sədri S.M.Mironov və Ukrayna Ali Radasının spikeri
V.S.Plyuş Bakı
Slavyan Universitetinin fəxri doktorlarıdır.
BSU bir çox xarici ölkələrin ali
məktəbləri ilə çoxşaxəli
əlaqələr qurmuşdur. Universitetin xarici
əlaqələri Rusiya, Fransa, İsveçrə, Türkiyə,
Ukrayna, Belarus, Moldova, Gürcüstan, Bolqarıstan, çexiya, Polşa,
Rumıniya, Yunanıstan və digər dövlətlərin nüfuzlu
ali məktəbləri, elmi təşkilatları
ilə imzalanmış müqavilə və sazişlərlə
tənzimlənir. Xarici dövlətlərin ictimai-siyasi
dairələrinin nümayəndələri, tanınmış
elm, təhsil və mədəniyyət xadimləri
universitetlə sıx əməkdaşlıq edirlər.
Son illər ərzində bir çox ictimai xadimlər,
siyasətçilər və alimlər, xarici ölkələrin
bir sıra mətbuat orqanlarının nümayəndələri
və görkəmli mədəniyyət işçiləri
universitetin qonağı olmuşlar. Universitet tələbə və magistrantlarının
Rusiya, Ukrayna, Bolqarıstan, Polşa və digər xarici ölkələrin
tanınmış ali məktəblərində
elmi-tədqiqat təcrübəsinə cəlb olunmaları,
ixtisasartırma kurslarında təhsil almaları, bu
tədris müəssisələri ilə müəllim və
tələbə mübadiləsi ənənəvi hal almışdır. BSU-nun Azərbaycan Respublikası Təhsil
Nazirliyi və Rusiya Federasiyasının ölkəmizdəki
səfirliyi ilə birgə keçirdikləri beynəlxalq
elmi-praktik konfranslarda Azərbaycanın orta ümumtəhsil
məktəblərində rus dili və ədəbiyyatının
tədrisinin aktual problemləri gündəmə çıxarılmış,
bu problemlərin həlli yolları araşdırılmış,
Rus dili və Ədəbiyyatı Müəllimlərinin
Respublika Koordinasiya Şurası yaradılmışdır.
Universitetdə Rusiya
tədris-mədəniyyət mərkəzi ("Moskva
auditoriyası"), Ukrayna tədris-mədəniyyət
mərkəzi, Yunan dili və mədəniyyəti
mərkəzi, Bolqar dili və mədəniyyəti
mərkəzi, Polyak dili və mədəniyyəti
mərkəzi, Türkiyə araşdırmaları
mərkəzi, "Sankt-Peterburq" mədəniyyət
və tədris mərkəzi, "Azərbaycanşünaslıq"
tədris-mədəniyyət mərkəzi
fəaliyyət göstərir. Qısa bir müddət ərzində
beynəlxalq aləmdə nüfuz qazanmış BSU
fəaliyyət göstərdiyi illərdə təkcə
respublikamız üçün deyil, yaxın və uzaq ölkələr
üçün də yüksək ixtisaslı mütəxəssislər
və elmi kadrlar hazırlamışdır. Son
illərdə BSU-da bir
çox xarici ölkələrin, o cümlədən Rusiya, Türkiyə,
İran, Türkmənistan, çin, Estoniya, Gürcüstan, Koreya, Bolqarıstan
və Ukraynanın yüzlərlə vətəndaşı
təhsil almışdır. Eyni zamanda bir sıra xarici universitetlərin
müəllimləri BSU-da ixtisasartırmada olur,
universitetimizin müəllimləri xaricdə mühazirələr
oxuyur, tədrislə məşğul olurlar. Universitetdə təhsil alan bir çox
tələbələr, gənc tədqiqatçılar
və müəllimlər xarici ölkələrin, o cümlədən
Rusiya, Ukrayna, Bolqarıstan, ABŞ, Yunanıstan, Türkiyə,
Almaniya və Polşanın universitetlərində
istehsalat və elmi-tədqiqat təcrübəsi keçmiş,
ixtisasları üzrə hazırlıq
səviyyələrini yüksəltmiş, bilik və bacarıqlarını
təkmilləşdirmişlər. Tələbələrə ixtisaslaşdıqları
ölkənin dili, ədəbiyyatı, tarixi, coğrafiyası,
mədəniyyəti, fəlsəfəsi, ictimai-siyasi
həyatı, hüququ, iqtisadiyyatı üzrə kompleks
biliklər verilir. Humanitar, ictimai fənlərin belə
vəhdəti tələbələrə elmi bilik və
mənəvi dəyərlərin bir-birini tamamlayaraq aşılanmasına
imkan yaradır. Qeyd edim ki, respublikamızda ilk dəfə
olaraq BSU-da azərbaycanşünaslıq ixtisasına da
qəbul keçirilmiş və tədris təşkil olunmuşdur.
Bu ixtisas üzrə tədrisin əsasında da ölkəmiz
haqqında ətraflı elmi biliklərlə yanaşı,
milli mənəvi dəyərlərin, əxlaqi meyarların,
mədəniyyətimizə xas özünəməxsusluğun
və ümumbəşəri dəyərlərin aşılanması
üstünlük təşkil edir. Həmin mütəxəssislərin
xarici mədəni-diplomatik əlaqələr, diaspora
ilə iş, milli maarifçilik sahələrində xüsusi
rol oynayacağına əminik. BSU xarici universitetlərlə
ikitərəfli əməkdaşlıq edir
- ölkəmizdə slavistikanın, xaricdə
azərbaycanşünaslığın təbliğinə
və inkişafına çalışır. Artıq Rusiya,
Fransa, Polşa, Ukrayna və digər ölkələrin nüfuzlu
universitetlərində azərbaycanşünaslıq
tədris olunur, müvafiq bölmələr açılıb və
ya açılmaqdadır. Təhsilin səviyyəsinin beynəlxalq
standartlara uyğunlaşdırılması və
tədrisin keyfiyyətinin yüksəldilməsi
məqsədilə universitetin professor-müəllim heyəti
son zamanlar sanballı elmi əsərlər üzərində
işləmişlər. Alimlərin məqalələri
respublika elmi ictimaiyyəti arasında böyük nüfuz qazanmış
iki istiqamətli ("Dil və ədəbiyyat", "İctimai
və siyasi elmlər") "Elmi
əsərlər"də, "Azərbaycanda rus dili
və ədəbiyyatı" elmi-metodik və ictimai
jurnalında, "Mütərcim" ədəbi, elmi və
tərcümə jurnalında dərc olunur. Qeyd edilməlidir ki, BSU yarandığı
gündən universitetin maddi-texniki bazasının möhkəmləndirilməsi,
tədris binalarının müasir tələblərə uyğun
abadlaşdırılması, tədris prosesinin elmi-metodik
ədəbiyyatla, əyani və texniki
vasitələrlə təchiz edilməsi, kafedra və
elmi-tədqiqat laboratoriyalarının kompüter avadanlığı
ilə təmin edilməsi sahəsində gündəlik
və gərgin iş aparılır. Müxtəlif ixtisaslar üzrə təhsil alan
tələbələrin elmi biliklərə
yiyələnmələrində, onların oxucu maraqlarının
genişlənməsində, bədii mütaliəyə
həvəsləndirilməsində, elmi yaradıcılığa
cəlb edilməsində universitet kitabxanası mühüm rol
oynayır. Hazırda
universitet kitabxanasının fondunda 0,5 milyon nüsxədən
çox ədəbiyyat saxlanılır. Daim yeniləşən
və zənginləşən kitabxana fonduna daxil olan
nəşrlər barədə universitet qəzetində mütəmadi
olaraq məlumat verilir və tematik kitab sərgiləri keçirilir.
Universitetin xarici ölkələrin ali
təhsil müəssisələri ilə qurduğu
əlaqələr sayəsində kitabxana fondu yunan, polyak,
türk, bolqar, rus, Ukrayna dillərində nəşr olunmuş
elmi, bədii və publisistik ədəbiyyatla, lüğətlərlə
zənginləşmişdir. Xarici ölkə
universitetləri tərəfindən kitabxanaya çoxsaylı
kitab və dövri mətbuat nümunələri hədiyyə
edilmişdir. Universitet son zamanlar ölkəmizdə
təhsil islahatlarının həyata keçirilməsində
önəmli rol oynayır. BSU Boloniya prosesinə fəal
şəkildə qoşulmaqla ölkənin müasir Avropa
təhsil sisteminə inteqrasiyasında fəal mövqe tutmaq
niyyətində olduğunu bildirmişdir. Əgər
kredit sistemi ilə tədris 2006-2007-ci tədris ilində
yalnız rus dili və ədəbiyyatı ixtisası üzrə
aparılmışdısa, 2007-2008-ci tədris ilində
ibtidai təhsilin pedaqogikası və metodikası,
Azərbaycan dili və ədəbiyyatı, regionşünaslıq
və tərcümə ixtisasları da kredit sistemi ilə
tədrisə qoşulmuşdur. Təhsil islahatlarının
tərkib hissəsi kimi universitetdə çoxballı sistem
tətbiq olunmuş, tələbələrin biliyinin
obyektiv qiymətləndirilməsi sahəsində mühüm
əməli nəticələr əldə edilmişdir.
Sessiyalar dövründə imtahanlara valideynlərin, kütləvi
informasiya vasitələri nümayəndələrinin
fəal surətdə cəlb edilmələri, aşkarlıq
və obyektivliyin təmin edilməsi,
tələbələrin pedaqoji təcrübələrinin qaçqın
şəhərciklərinin orta məktəblərində
təşkili gənclərə fəal həyat mövqeyinin,
yüksək vətəndaşlıq hissinin aşılanması
istiqamətində atılan addımların bariz nümunəsidir. Bu gün BSU bir sıra beynəlxalq təşkilatların,
o cümlədən Maqna Charta Universitatium - Azadlıqların
Böyük Xartiyasının, Beynəlxalq Kadr Akademiyasının,
Qara Dəniz Hövzəsi Universitetləri Assosiasiyasının,
Rus dili və ədəbiyyatı Müəllimlərinin
Beynəlxalq Assosiasiyasının, regionşünaslıq
və beynəlxalq münasibətlər istiqamətləri üzrə
Rusiya Federasiyası ali məktəblərinin
tədris-metodik birliklərinin üzvüdür. Respublikada ilk dəfə olaraq universitet
tələbələrinin pedaqoji təcrübələrinin
qaçqın şəhərciklərinin orta
məktəblərində təşkili artıq
ənənəyə çevrilmişdir.
Tələbələr hər il Bərdə, Biləsuvar,
Beyləqan rayonlarının qaçqın şəhərciklərindəki
orta məktəblərdə təcrübə keçirlər.
Təcrübə dövründə universitet tələbə
və magistrantları tərəfindən qaçqın uşaqlara
yardım göstərilir, məktəblərə dərs
ləvazimatı, kitablar və əyani vəsaitlər
hədiyyə edilir. Son 3 il ərzində rayonlardakı qaçqın
şəhərciklərinin orta məktəblərində
keçirilmiş pedaqoji təcrübələr ölkənin kütləvi
informasiya vasitələrində geniş işıqlandırılmışdır. Bütövlükdə pedaqoji təcrübənin coğrafiyası
geniş olmuş və respublikanın 8 rayonunu
əhatə etmişdir. Universitetdə folklor təcrübəsinə,
xüsusən rus folklorunun toplanılmasına xüsusi diqqət
yetirilir. Folklor materiallarının toplanılması
və emalını nəzərdə tutan bu növ təcrübə
tələbələrə şifahi xalq ədəbiyyatı
nümunələrinin geniş tədqiqi üzrə bacarıq
və vərdişlərin aşılanmasını
nəzərdə tutur. Son illərdə folklor təcrübəsi
Bakı, Sumqayıt, Gəncə, Naxçıvan, Əli
Bayramlı şəhərləri ilə yanaşı,
respublikanın 16 rayonunda, o cümlədən İsmayıllı
rayonunun İvanovka qəsəbəsində keçirilmişdir. BSU-da müxtəlif ixtisaslar üzrə kadr hazırlığını
təmin edən tədris prosesi təlim-tərbiyə işləri
ilə sıx və ayrılmaz vəhdət təşkil
edir. Universitetdə təhsil alan
tələbə gənclərin təlim və
tərbiyəsi istiqamətində görülən işlərin
başlıca məqsədi seçdikləri ixtisaslar üzrə
dərin biliyə, geniş dünyagörüşünə və yüksək
mədəniyyətə malik, xalqımızın milli müstəqillik
ideyalarına sədaqətli, Vətənini, millətini
və dövlətini sevən əsl
vətənpərvər yetişdirməkdir. Bu
məqsədə nail olunmasında universitetdə aparılan
təlim-tərbiyə işinin düzgün təşkili xüsusi
əhəmiyyət kəsb edir. Universitetdə təlim-tərbiyə işi
müxtəlif istiqamətlərdə həyata keçirilir. Son dövrdə
"Birgünlük xəlifə" tələbə özünüidarəetmə
günü, "Şam işığında" və
"Gənc qələmlər" ədəbi
dərnəklərinin məşğələləri,
Tələbə teatrının quruluşunda
səhnələşdirilən tamaşalar, xeyriyyə
marafonları, "Səfir saatı" klubunda və
"Disput klub"unda görüşlər yaddaqalan
hadisələrdir. Təhsildə və davranışda seçilən
tələbələr üçün Heydər Əliyev adına,
eləcə də M.Kazım bəy, A.Bakıxanov,
M.F.Axundov, M.Tağıyev adına fəxri təqaüdlər
təsis edilmişdir. Slavistika və azərbaycanşünaslığın
inkişafı məqsədi ilə gənc tədqiqatçılar
üçün də Heydər Əliyev adına fərdi təqaüd
təsis edilmişdir. BSU bu gün özünün inkişaf dövrünü yaşayır.
Universitet kollektivi qazanılan nailiyyətlərlə
kifayətlənməmək, qarşıda duran
vəzifələri layiqincə yerinə yetirmək,
təhsildə və elmdə əldə etdiyi
nəticələrə özünütənqid ruhunda yanaşmaq,
islahatları genişləndirmək, möhtərəm
Prezident İlham Əliyevin təhsil işçiləri qarşısında
qoyduğu vəzifələri layiqincə icra etmək
əzmindədir. Kamal ABDULLAYEV, Bakı Slavyan Universitetinin rektoru, professor, əməkdar elm xadimi, AMEA-nın müxbir üzvü |