|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Səmərəli pedaqoji təcrübə və yaxşı müəllim hazırlığı Hər il olduğu kimi, bu il də
Azərbaycan Dillər Universitetinin bir qrup
tələbəsi ilə Nəsimi rayonundakı
Fəxrəddin Nəcəfov adına 266 nömrəli
məktəbdə pedaqoji təcrübə keçirik. IV kurs tələbələrinin pedaqoji
təcrübəsini səmərəli təşkil etmək
üçün metodist Sevda Əhədova, pedaqoq, dosent
İnqilab Xəlilov və psixoloq Sona Həsənova
ilk gündən birgə fəaliyyətə üstünlük
veriblər. Uğurlu təcrübənin ilk gündən,
məktəbə qəbul günündən başlandığını
desək, heç də səhv etmərik. Məktəb
rəhbərliyinin tələbələri səmimi, gülərüzlə
qarşılaması, onları ilk gündən
istiqamətləndirməsi təcrübəçiləri
həvəsləndirir. Hər il olduğu kimi, bu il də
məktəbin direktoru Fərqanə Əliyeva, tədris işləri
üzrə direktor müavini Asəf Vəliyev, tərbiyə işləri
üzrə direktor müavini Ağa Nağıyev, eləcə
də təcrübəçilərlə işləyən xarici
dil müəllimləri tələbələri təhsil ocağının
daxili nizam-intizam qaydaları ilə tanış edib tövsiyələr
verdilər. Tezliklə tələbələr müəllimlərə
təhkim olundular. Sınaq və zaçot (məqbul)
dərsləri müəyyənləşdirildi. İlk günlər qabaqcıl təcrübənin
öyrənilməsi məqsədilə dərslər
dinlənildi və tələbələrlə həmin
dərslər müzakirə edildi. Tələbələr
dərs deyəcəkləri şagirdlərlə tanış
olub səmimi ünsiyyət qurdular. Bu tanışlıq qısa
müddətdə təmin olundu. çünki bir qayda olaraq təcrübəçilər
III və IV kurslarda eyni məktəbə göndərilirlər.
Bu isə onların işini xeyli yüngülləşdirir.
Onlar məktəbi də, müəllimləri və şagirdləri
də kifayət qədər tanıyırlar.
Məktəbin iş rejiminə, daxili qayda-qanununa
bələd olurlar. Bütün bunlar təcrübənin normal,
səmərəli, yüksək səviyyədə keçməsi
üçün vacib şərtlərdəndir. Qeyd edək ki, metodistlərin həmin
məktəbdə təkrar eyni
tələbələrlə işləmələri
də işin müsbət tərəflərindəndir. Məktəbin xarici dil müəllimlərindən
Elmira Əliyeva, Vəcibə Səlimova, Hicran Hacıyeva,
Yeganə Məmmədova, Arzu Qiyasova və başqaları
təcrübəçilərə düzgün məsləhət
verir, həmçinin müəllimlik ixtisasının
sirlərini öyrətməkdə onlara qayğı ilə
yanaşırlar. Dərs zamanı şagirdlərin
bəzən qrup halında, bəzən üçlük, dördlük
və ya cütlük qaydasında işlədilməsi, interaktiv
fəaliyyətə cəlb olunması proqramda
nəzərdə tutulan kommunikativ bacarığın
formalaşdırılmasına təsir edir, şagirdlər
işgüzar danışıq prosesinə cəlb olunurlar. Şübhəsiz, burada şagirdlərin
qismən sərbəstliyi sərbəst danışıq
vərdiş və bacarıqlarının inkişafına
təsir edir. Səhvlərlə fikir mübadiləsinə
daxil olsalar da, tədricən psixoloji maneəni qismən
aradan qaldırırlar və əvvəllər müşahidə
olunan səhvlər sonrakı
mərhələlərdə azalır. Dərslərini bu səpgidə qurmağa
çalışan tələbələrdən Almaz Qasımlı,
Kəmalə Quliyeva, Aytən Quliyeva, Vüsalə Kərimova
və başqaları dərsdə vaxt itkisinə yol
vermir, bütün mərhələlərdə şagirdləri
işgüzar fəaliyyətə cəlb edirlər. Onlar
həm metodik cəhətdən, həm də dili
kifayət qədər yaxşı bildiklərindən işlərini
istənilən səviyyədə qura bilirlər.
Roman-german filologiyası fakültəsinin 462-ci qrup
tələbələri dərslərini müasir
tələblərə uyğun şəkildə qurmağa
çalışırlar. Bəlkə elə ona görədir ki, onların
dərs dedikləri siniflərin şagirdləri də
dərsdə xeyli fəal iştirak edir, onların rəğbətini
qazanırlar. VII "Q", VII "D", X "B", XI
"C" və XI "B" siniflərində aparılan
müşahidələr belə nəticə çıxarmağa
imkan verdi. Şagirdlər hər dərsdə öz fəallıqları
ilə fərqlənir və qrupun ümumi fəallığına
da əsaslı təsir edə bilirlər. Şübhəsiz,
şagirdlərin səviyyəsi yüksək olduqca, təcrübəçilərin
məsuliyyəti daha da artır, dərslərinə daha
ciddi və ətraflı hazırlaşırlar. Pedaqoji təcrübənin uğuru
tələbələrin məktəbə necə
qəbulundan başlamaqla, həm də sinifdəki şagirdlərin
hazırlıq səviyyələrindən, təcrübəçinin
metodik və ixtisas hazırlığından, eləcə
də onlara rəhbərlik edən metodist, pedaqoq, psixoloq
və fənn müəllimlərinin əlbir işindən
asılıdır. Bu uğur təcrübənin
məqsədyönlü təşkili və düzgün seçilən
məktəblə də bağlıdır. Səmərəli pedaqoji təcrübə yaxşı
müəllim hazırlığının təməlini
təşkil edir desək, yəqin ki, heç də səhv
etmərik. Ona görə təcrübə keçirilən bütün
məktəblərdə təcrübənin normal təşkilinə
kömək etmək hər bir məktəb
rəhbərliyinin vəzifə borcu olmalı, yadda
saxlanmalıdır ki, tələbələrin normal
qəbulu həmin təcrübəçilərin
fəaliyyətinə stimul yaradır. Müəllim hazırlığı pedaqoji
təcrübənin düzgün təşkili və aparılması
ilə sıx əlaqədardır. Təcrübəçilərə
rəhbərlik edən metodist, pedaqoq və psixoloq
həssas olmalı, müzakirə zamanı vacib detallar üzərində
dayanmaqla, nöqsanlarla yanaşı, müsbət
cəhətləri də deməklə onları ruhlandırmalıdırlar. Firuz KƏRİMOV, ADU-nun xarici dillərin tədrisi metodikası kafedrasının baş müəllimi,
pedaqoji təcrübə rəhbəri
Təlimin
keyfiyyətinə təsir edən bəzi amillər Hazırda təhsilin keyfiyyətinin yüksəldilməsi
bu sahədə çalışanların qarşısında
duran əsas vəzifədir. Bu vəzifənin uğurlu
həlli üçün, ilk növbədə, məktəbdə
səmimilik, qarşılıqlı hörmət və
tələbkarlıq şəraiti mövcud olmalıdır.
Bu baxımdan tədris ocağında müəllim-şagird,
məktəb-valideyn və eyni zamanda direktor-müəllim münasibətləri
mühüm əhəmiyyət kəsb edir. Əgər bu münasibətlər
düzgün qurulubsa, onda təlimin keyfiyyətindən danışmaq
olar. Yox əgər məktəbdə demokratik ab-hava, qarşılıqlı
səmimiyyətə əsaslanan münasibətlər yoxdursa
təhsilin keyfiyyətinə
müsbət təsir edən birgə fəaliyyət
də mümkün olmayacaq. Bu baxımdan məktəbdə
valideyn, müəllim-şagird münasibətlərini
təhsilin keyfiyyətini artıran əsas
amillərdən biri kimi götürmək olar. Təhsilin keyfiyyətinə təsir
edən amillərdən biri də dərsdinləmədir.
Əgər müəllimin dərsi vaxtaşırı və
yaxud da tez-tez dinlənilərsə, onda müəllimin
məsuliyyəti artar və dərsə hazırlıq
səviyyəsi yüksələr. Bundan başqa,
dərsdinləmə məktəblə
valideyn və ictimaiyyət arasında körpü yaradır
və bu da müəllimin fəaliyyətinə ictimai
nəzarəti təmin etməyə imkan verir. Hamımıza
yaxşı məlumdur ki, məktəblərdə "açıq
dərs"lər keçilir. Keçilən "açıq
dərs"lər müzakirə olunur, fikir, təcrübə mübadiləsi
aparılır. Keyfiyyəti yüksəltməyə kömək
edən forma və metodlarla tanışlıqda
"açıq dərs"lər mühüm rol oynayır. Bunlar
müəllimin məsuliyyətini yüksəltməyə
müəyyən təkan verir. Qeyd etdiyim məsələlər rayonumuzun
məktəblərində diqqət mərkəzində
saxlanılır. Mən Hüsənli kənd orta
məktəbində fizika fənnini tədris edirəm.
Müşahidələr göstərir ki, şagirdlərin
çoxunda dəqiq elmlərə maraq azdır. Onların
dəqiq elmlərə marağını artırmaq müəllimdən,
onun dərslərini qurmaq məharətindən asılıdır.
Sinifdə müxtəlif səviyyəli şagirdlər olur.
Hər bir şagirdə öz səviyyəsinə uyğun
yanaşıb tapşırıqlar verməklə, müstəqil
işlətməklə onların dərsə marağını
artırmaq olar. Onsuz da
zəifdir deyib şagirdləri diqqətdən kənar
qoymaq olmaz. Dərsdə daha çox əyani
vəsaitlərdən istifadə edilməsi də şagirdlərin
dərsə marağının, təhsilin keyfiyyətinin
artmasına müsbət təsir edir. Bildiyimiz kimi, bir neçə ildir ki, qəbul
olunmuş dövlət Proqramına uyğun olaraq bütün şagirdlər
dərsliklərlə pulsuz təmin edilir. Lakin
dərsliklərimizdə müəyyən qüsurlar var.
Belə ki, VII, X siniflər üçün fizika
dərsliklərində proqram tam əhatə olunduğu
halda, XI sinfin fizika dərslərində hələ də
IX sinfin fizika dərsliyinə müraciət etməli oluruq.
Bu da təlimin keyfiyyətinə mənfi təsir edir.
Təlimin keyfiyyətinə təsir edən
amillərdən biri də şagirdə müasir yanaşmadır.
Bir neçə il bundan əvvəlki şagirdləri indiki
şagirdlərlə müqayisə edəndə onlar arasında
inkişaf baxımından böyük fərq olduğu görünür.
Bu baxımdan təhsildə şagirdlərin maraq və
meyillərinin nəzərə alınması vacibdir. Bu
məsələ təhsil islahatında da ön plana çəkilmişdir. Hazırda müasir təlim metodlarından,
informasiya-kommunikasiya vasitələrindən tədrisdə
geniş istifadə etmədən təlimin
səmərə və keyfiyyətindən danışmaq
çətindir. İKT-dən istifadə həm də fənn
müəlliminin texniki bilik və bacarığının
inkişafına müsbət təsir göstərir. Lakin burada
müəyyən problemlər də ortaya çıxır.
Məsələn, əgər məktəbdə informatika
fənni tədris olunursa və əyani vəsait kimi şagirdlər
kompüterdən istifadə edə bilmirsə, belə halda
təlimin keyfiyyətindən danışmaq olmaz. Yox
əgər şagirdlər informatika dərsini müasir
avadanlıqlarla təchiz olunmuş kompüter otağında
və özü də kompüteri çox gözəl bilən müəllimdən
öyrənirsə, təbii ki, onda daha yüksək təlim
keyfiyyətindən danışmaq olar. Gülüstan ƏHMƏDOVA, Tərtər rayonundakı Hüsənli kənd orta məktəbinin fizika müəllimi
|