|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Fənn
olimpiadalarının rayon (şəhər)
mərhələsi başa çatdı
Respublika
turuna vəsiqə uğrunda Yanvarın 13-də
məktəblilərin fənn olimpiadalarının rayon (şəhər)
mərhələsinin II turu Bakı şəhəri üzrə,
7, 46 və 160 nömrəli ümumtəhsil
məktəblərində təşkil olunmuşdu. Əməkdaşlarımız
hər üç məktəbdə olmuş, olimpiadaları müşahidə
etmişlər. Aşağıda onların qeydlərini
oxuculara təqdim edirik. Biz həmin gün bilik yarışını
müşahidə etmək üçün Bakının 46 nömrəli
məktəbində olduq. Məktəbin
həyətinə xeyli sayda müəllim, şagird və
valideyn toplaşmışdı. Təhsil ocağının
foyesində diqqəti cəlb edən yerdə vurulmuş
olimpiada cədvəlində bilik yarışlarının
keçiriləcəyi otaqların nömrələri,
fənlərin adı, mərtəbələr qeyd edilmişdi.
Gələnləri məlumatlandırmaq, müəllim və
şagirdlərə bələdçilik etmək üçün
cədvəl qarşısında nəzarətçilərdən
biri - Tahir Babayev növbə çəkirdi. Məktəbin
direktoru, bina rəhbəri Sevinc Budaqova ilə görüşüb
gəlişimizin məqsədini ona bildirdik. Sevinc müəllim
bizi olimpiada yarışları keçiriləcək otaqlara
dəvət etdi və bildirdi ki, bu yarışların keçirilməsi
üçün 33 sinif otağı ayrılmışdır.
Tədris korpusunun mərtəbələrində ayrılmış
otaqların qapılarına nömrələr yazılmış,
siniflərin və fənlərin adı qeyd edilmişdi.
Dəhlizlərdə və siniflərdə təmizlik
və səliqə-sahman göz oxşayırdı. Bina
istiliklə tam təmin edilmiş, bilik yarışının
şəffaf aparılması üçün hər cür şərait
yaradılmışdı. Mərtəbələrdə növbə
çəkəcək nəzarətçi müəllimlər artıq
yerlərində idilər. Tibb məntəqəsi ilk yardım
üçün lazım olan dərmanlarla təchiz edilmişdi.
Həkim və tibb bacıları iş başında
idilər. Havanın şaxtalı keçməsini
nəzərə alan bina rəhbəri əlaqədar
təşkilatların razılığı ilə övladlarını
yarışa gətirmiş və axıradək gözləyən
valideynləri məktəbin geniş yeməkxanasına
dəvət etmiş və onların yerləşməsi
üçün lazımi şərait yaratmışdı. Yeri
gəlmişkən qeyd edək ki, Əzizbəyov rayon
sakini, övladını yarışa gətirmiş valideyn
Əbülfət Zeynaloğlu olimpiadanın keçirilməsi
üçün yaradılmış şərait və onlara göstərilən
qayğıya görə valideynlər adından bina və
olimpiada rəhbərliyinə dərin təşəkkürünü
bildirdi. Olimpiadanın təşkili və keçirilməsinə
rəhbərlik edən Bakı Şəhəri üzrə
Təhsil İdarəsinin baş məsləhətçisi Uğurlu
Abbasov məlumat verərək bildirdi ki, bilik yarışlarına
ayrılmış hər otağa bir nəfər olmaqla 33
qeyri-ixtisas fənn müəllimi və növbə çəkmək
üçün hər mərtəbəyə 2 müəllim cəlb
edilib. Burada iki fəndən - Azərbaycan dili
və ədəbiyyatdan və Azərbaycan
tarixindən keçirilən bilik yarışına Bakı
şəhərinin ümumtəhsil məktəblərinin I
turda qalib gəlmiş IX-XI sinif şagirdləri qatılmışlar.
Burada paytaxtın bütün məktəblərindən 2
fənn üzrə 400 şagird iştirak edirdi. Təlimata uyğun olaraq öz işinə başlayan
olimpiadanı müşahidə etmək üçün Sevinc Budaqova
və Uğurlu Abbasovla birlikdə bir neçə otağa baş
çəkdik. 1-ci mərtəbədə 10 nömrəli otaqda
15 nəfər IX sinif şagirdi Azərbaycan tarixi fənni
üzrə bilik yarışına qoşulmuşdu.
Nazirlikdən xüsusi zərfdə göndərilmiş 5 sual
yazı lövhəsinə yazılmışdı. Şagirdlər
ayrı-ayrı partalarda tək-tək əyləşdikləri
üçün yarış 1
variantda aparılırdı. Nəzarətçi, qeyri-ixtisas
fənn müəllimi Mətanət Cəfərova şagirdlərin
sərbəst işlədiklərini, köçürmə hallarına
yol verilmədiyini bildirdi. Yarışda iştirak edən
142 nömrəli məktəbin IX sinif şagirdi Sərxan
Cəfərzadə bu sınaqdan üzüağ çıxacağına
əmin olduğunu söylədi. 14 nömrəli otaqda isə 10 nəfər X
sinif şagirdi suallar ətrafında düşünərək
onlara paylanılmış xüsusi dəftərlərdə
qeydlər edirdilər. Burada da
bilik yarışı 1 variantda aparılırdı.
Nəzarətçi müəllim Leyla Məmmədova heç bir
neqativ halın baş vermədiyini bildirdi. Şagird
Nəbi Verdiyev sualların hamısına cavab yaza
biləcəyini qeyd etdi. Sonra 15 nəfər XI sinif şagirdinin
bilik nümayiş etdirdikləri 22 nömrəli otağa girdik.
Nəzarətçi müəllim Fazilə Manafova şagirdlərin
suallardan narazı qalmadıqlarını söylədi. Yarışda
iştirak edən 31 nömrəli məktəbin XI sinif şagirdi
Günel Abdurraxmanova cavabları yazıb qurtardığını
və I yerə çıxacağına əminliyini dedi. Bəli, həmin gün keçirilən bu yarışda
respublika turuna vəsiqə qazanmaq uğrunda mübarizə
gedirdi. Nizami MİRZƏ Şagirdlər
olimpiadanın gedişindən razı qaldılar Kimya və biologiyadan yarışlar 7 nömrəli
məktəbdə keçirildi. Şagirdlər artıq saat
09.30-dan gəlməyə başladılar. Saat 09.45-dən
etibarən Təhsil Nazirliyində hazırlanan suallar
zərflərdə məktəbə təqdim olundu. 7 nömrəli məktəbdə keçirilən
olimpiadaya rəhbərlik edən Bakı Şəhəri
üzrə Təhsil İdarəsinin ümumi təhsil sektorunun
müdiri Firudin Həmzəyev ümumilikdə olimpiadanın II
turuna 968 şagirdin keçdiyini dedi. Bildirdi ki, 7 nömrəli
məktəbdə keçirilən olimpiadaya şagirdlər böyük
həvəslə gəliblər. Beləliklə, saat 10.00-da olimpiadanın başlamasına
start verildi. Firudin Həmzəyev təşkilati işlərdə,
uşaqların siniflərdə yerləşdirilməsi
prosesində heç bir çətinliklə qarşılaşmadıqlarını,
olimpiadanın bütün qayda-qanunlarının saat 10.00-a
qədər şagirdlərə aydın şəkildə
izah edildiyini qeyd etdi. Nəzərə çatdıraq ki, olimpiadada
IX-XI sinif şagirdləri iştirak etmək
hüququna malikdirlər. Şagirdlər Təhsil
Nazirliyinin tərtib etdiyi 5 suala ətraflı cavab
verməlidirlər. Eyni zamanda onlar olimpiadanın respublika
mərhələsinə keçmək üçün mütləq 48-50
bal toplamalıdırlar. Olimpiadaya nəzarət edən
məsul şəxs, Bakı Şəhəri üzrə
Təhsil İdarəsinin ümumi təhsil sektorunun aparıcı
məsləhətçisi Rza Eləzov bildirdi ki, şagirdlər
olimpiadaya gözlənildiyindən artıq gəlib. Qeydiyyatda
254 şagird olduğu halda, olimpiadaya 275-ə yaxın iştirakçı
gəlib. Şübhəsiz, biz onları heç bir problem olmadan
siniflərdə yerləşdirdik. Məktəbin 17 sinif
otağında olimpiada keçirilir. Hər bir sinif otağında
iki nəzarətçi var. Nəzarətçilərin hamısı
qeyri-ixtisas fənn müəllimləridir. Nəzarətçi müəllimlər,
əsasən, 8 nömrəli məktəbin işçiləridir.
Suallar birinci tura nisbətən bir az mürəkkəbdir.
Ancaq buna baxmayaraq, istedadlı şagirdlər suallara cavab
verməkdə heç bir çətinlik çəkmirlər.
Məqsədimiz istedadlı şagirdləri üzə çıxarmaqdır.
Yoxlamalar kodlaşdırılmış şəkildə
aparılır. Dəftərlərin üz qabığı
çıxarılır. Yoxlayan müəllim hansı şagirdin
yazısını yoxladığını bilmir. Belə
olduqda obyektivlik qorunur. Daha sonra sinif otaqlarına baxış keçirdik.
Nəzarətçilərlə olimpiadanın keçirilmə
prosesi və suallar haqqında söhbətləşdik.
Bildirdilər ki, suallar içərisində şagirdlərə
qaranlıq qalan heç bir məqam yoxdur. Suallar keçdikləri mövzulardan
tərtib olunub. Yalnız daha qabiliyyətli uşaqları
aşkara çıxarmaqdan ötrü suallar bir qədər çətinləşdirilib.
Hər bir şagird sakit şəkildə öz tapşırığı
üzərində çalışırdı. Olimpiada Bakı Şəhəri üzrə
Təhsil İdarəsinin nəzarəti altında keçirildiyindən
idarənin rəisi Nailə Rzaquliyeva
məktəblərə baş çəkdi. O, həmçinin 7 nömrəli
məktəbə də gəldi. Sinifləri gəzdi, ümumi
vəziyyətlə yaxından tanış oldu. Olimpiada keçirilən
sinif otaqlarının isti olması ilə əlaqədar
məmnunluğunu bildirdi. Olimpiada başlayandan təxminən bir saat
yarım sonra şagirdlər siniflərdən çıxmağa
başladılar. Lökbatan qəsəbəsindəki
N.Qurbanov adına 288 nömrəli orta məktəbin 10-cu
sinif şagirdi Aytən Əliyeva biologiya fənninə
dair bütün suallara düzgün cavab yazdığını və
yüksək nəticə əldə edəcəyini
qətiyyətlə bildirdi. Ondan sualların asan və ya
çətin olduğunu soruşduqda dedi ki, suallar
nisbətən çətin idi. Ancaq buna baxmayaraq, savadlı
şagirdlər bunun öhdəsindən gələ bilər.
Eləcə də kimya fənni üzrə olimpiadada iştirak
edən Xətai rayonundakı S.Həsənov adına 63 nömrəli
məktəbin şagirdi Əhməd Adilov da yüksək bal
toplayacağına şübhə etmirdi. Bir sözlə, şagirdlərin
əksəriyyəti yazdıqları cavablardan razı qalmışdılar. Saat 13.00-da nəzarətçilər şagirdlərdən
cavabları yığaraq olimpiada rəhbərinə
təhvil verdilər. Materiallar yoxlanılmaq üçün müvafiq
komissiyaya təhvil verildi. RƏŞAD Hər
kəs öz vəzifəsini layiqincə yerinə yetirirdi 160 nömrəli məktəbdə
keçirilən olimpiadada IX-XI siniflərdə oxuyan
şagirdlər riyaziyyat,
fizika və informatika fənləri üzrə
öz qüvvələrini sınayırdılar.
Azərbaycan və rus bölmələri üzrə 321 şagird
iştirak edirdi ki,
onlardan 219 nəfəri riyaziyyat, 75 nəfəri fizika
və 27 nəfəri isə informatika fənlərinin payına
düşürdü. Bakı Şəhəri
üzrə Təhsil İdarəsinin əmri ilə müəyyən
edilmiş nəzarətçi müəllimlərin sayı 17
nəfər idi. Onlar
qeyri-ixtisas fənn müəllimləri idi.
Olimpiadanın
keçirilməsində komissiyanın işinə də
Bakı Şəhəri üzrə
Təhsil İdarəsinin müdiri N.Rzaquliyeva özü
rəhbərlik edirdi. Olimpiada komissiyasının üzvlərindən
isə Cahangir Süleymanov, Məhəmməd Bayramov, Əfqan
İsgəndərov, Allahverdi Mirzəyev və başqaları
da bu tədbirin keçirilməsində öz
vəzifələrini layiqincə yerinə yetirirdilər. Olimpiadanın gedişi ilə bağlı maraqlanıb yarışlar keçirilən
17 otaqda olduq. Nəzarətçi müəllimlərlə görüşdük.
Hər yerdə işlərin yüksək
səviyyədə təşkil
olunduğunun şahidi olduq. Siniflərdə tam sakitlik idi
və hər bir şagirdə öz biliyini üzə çıxarmaq
üçün lazımi şərait
yaradılmışdı. Olimpiadada iştirak edən IX
sinif şagirdi Elmar Şıxəli, X sinif şagirdi Elnur
Hüseynov və XI sinif şagirdləri Elvin Rüstəmzadə
və Akif Məmmədov bu bilik yarışında
nəzarətçilərdən - Rəfiqə
İsmayılova, Səadət Səfərova və
Məleykə Əhmədovadan razılıq etdilər. Həmin
gün üç saat davam edən olimpiadada həyəcan keçirən
təkcə şagirdlər deyildi, həm də
məktəbin qarşısında öz övladlarını gözləyən
valideynlər idi. Onlardan İlhamə Xəlilova, İsgəndər
Məmmədov və İsmayıl Qazıyev övladlarının
olimpiadada iştirak
etməsindən və onlar üçün 160 nömrəli
məktəbdə yaradılmış şəraitdən
razı qaldıqlarını da qeyd etdilər.
Şakir CƏFƏROV
Direktor
məktəbdən qaçdı Şüvəlan qəsəbəsində
yerləşən zəif eşidən və sonradan karlaşmış
uşaqlar üçün Respublika Təmayüllü İnternat
Məktəbinə çatanda təxminən saat 10.10
dəqiqə olardı. Direkior əyləşən binaya
daxil olub, bir qadından onun otağını soruşdum.
O, haradan gəldiyimi öyrənib direktorun kabinetinə girdi.
çox çəkmədi ki, razılıq əldə olundu
və mən içəri keçib direktora - "Azərbaycan müəllimi"
qəzetindən gəlmişəm, - dedim. Sözun doğrusu,
kreslosuna yayxanmış direktor bir qədər özünü
dərişdirdi. Sifətinin rəngi azca da olsa dəyişmişdi.
Dedim ki, sizdən iki şikayət ərizəsi var. Yaxşı
olar ki, əvvəlcə birlikdə məktəbinizin uşaqları,
müəllimləri ilə görüşək,
davamiyyətlə tanış olaq. Görək ki, bu
ərizələrdə göstərilən faktlar nə
dərəcədə düzgündür... Bu sözlərimə
bənd imiş kimi direktorun gözləri alacalandı. Başladı
məni sorğu-sual etməyə: - Ərizələr qeydiyyatdan keçibmi?
Təhsil Nazirliyindən icazəniz varmı? Sizi bura kim göndərib?.. Mən onun bu suallarını ətraflı
cavablandırdım. Yalnız bundan sonra o, əsəbi
halda ayağa qalxıb əl telefonu ilə tanış-bilişinə
zəng etməyə başladı. Danışa-danışa
yan otağa keçdi. Tam örtülməmiş qapıdan
"Azərbaycan müəllimi", "Azərbaycan müəllimi"
qəzeti sözləri eşidilirdi... Bir neçə dəqiqədən sonra müdir
halı çox pərişan bir vəziyytdə qayıdıb
kreslosunda əyləşdi. Açıq-aydın hiss olunurdu
ki, bu qəzetin adını eşidənlər ondan üz döndərmişdilər.
Necə deyərlər, ümidləri puça çıxmışdı...
Vəziyyətinin çox acınacaqlı olduğunu hiss
edən müdir mülayim bir tərzdə: - Mən
"Azərbaycan müəllimi" qəzetinin çox nüfuzlu
bir qəzet olduğunu yaxşı bilirəm. Onunla zarafat
etmək olmaz, - dedi. Sonra əlini cibinə saldı... Bu
istəyinin də baş tutmadığını görəndə
Kamil müəllim dedi: - Məni bağışlayın, vacib işim
var, getməliyəm... Bu sözlərdən sonra ərizələri
tanış olmaq üçün ona verdim. Kamil müəllim birinci
İldırım Nəzərovun şikayət
ərizəsini vərəqləyib dedi ki, bu, bizim
məktəbdə işə düzəlmək istəyir, bu
heç, buna bir quş... Sonra uzun illər bu
məktəbdə müəllim işləmiş
Vəliyulla Ələkbərovun şikayət
ərizəsini nəzərdən keçirdi. Bildirdi ki,
mən onu işdən azad etmişəm. Sərxoş
olması barədə polisdən arayış düzəltdirmişəm...
Kamil müəllim bu sözləri deyə-deyə məktubda
onun haqqında yazılmış sözləri oxuyanda nitqi
qurudu. Nəfəs belə çəkmədən burada yazılanları
nəzərdən keçirdikcə hələ 16 il
sərasər məktəbdə tədris işləri üzrə
direktor müavini işlədiyi müddətdə yol verdiyi ciddi
nöqsanlar, təkcə iki onuncu sinifdə cəmi iki
nəfər şagirdin olması, məktəbin
təmirini səthi apararaq qalan pulları
mənimsəməsi və sair və ilaxır saymaqla
qurtarmaq olmayan faktları gözləri önündə yenidən
canlandı... İki əli ilə başını
bərk-bərk tutmuş Kamil müəllim şikayət
məktubunu nəzərdən keçirib axıra çıxar-çıxmaz
ayağa qalxdı, yarlı-yaraşıqlı kabinetini
son dəfə nəzərdən keçirirmiş kimi
qapıya yaxınlaşdı. - Mənim çox vacib işim var, - deyib qaça-qaça
məktəbin həyətinə, oradanda maşınına
doğru yüyürdü... Bax beləcə məktəbin direktoru
"Azərbaycan müəllimi" qəzetinin suallarına
cavab vermədən qaçdı. Daha düşünmədi ki,
ərizədə göstərilən, ancaq müəllimi, ziyalını
təmsil edən bir qəzetdə yaza bilmədiyimiz faktlar
sübut olunanda onu heç bir himayədarı müdafiə
etməyəcək. Axı o, bu müəssisəyə
təyin edilib ki, vicdanla işləsin. Onu da deyim ki, mən redaksiyaya qayıdandan
sonra həmin təhsil ocağından bir nəfər
zəng edib bildirdi ki, siz məktəbdə olanda orada 155
əvəzinə dərslərdə cəmi 19 şagird
var idi. Ona görə də direktor Kamil Məmmədov bu
vəziyyəti "Azərbaycan müəllimi"
qəzetinin müxbiri bilməsin deyə çıxış
yolunu qaçmaqda gördü... Ədalət DAŞDƏMİRLİ 307
nömrəli məktəbdə istilik sistemi bərpa olundu Keçən ilin son ayında Azərbaycan
Respublikasının Təhsil Nazirliyinin kollegiya iclasında
Bakı məktəblərində istilik sisteminin
vəziyyəti müzakirə olunmuşdur. Aparılan
monitorinqin nəticələrinə əsasən məlum
olmuşdur ki, şəhərin 326 məktəbindən
156-sı istiliklə normal, 13-ü isə qismən təmin
olunub. 157 məktəbdə, yəni, bütün
məktəblərin 48,2 faizində istilik yoxdur. Kollegiyada
təhsil naziri Misir Mərdanov Bakı
məktəblərinin yarısında problem olduğunu
qeyd etmişdir. Problemi olan məktəblər sırasında
bir sıra tədris ocaqlarının, o cümlədən ötən
il istifadəyə verilmiş 307 nömrəli məktəbin
adı da çəkilmişdi. Bu günlərdə problemin aradan qaldırılıb-qaldırılmadığını
öyrənmək məqsədilə şəhərin 307 nömrəli
orta məktəbinə və
Avropa Liseyinə telefon açdıq. 307 nömrəli orta
məktəbin təlim-tərbiyə işləri üzrə
direktor müavini Məryam Gəncəliyeva sualımızın
cavabında bildirdi ki, mövcud problemlər aradan qaldırılıb, hazırda
məktəbdə istilik sistemi normaldır.
Fəaliyyət üçün şəraitimiz var. Lakin Məryam müəllim
cavabının sonunda məktəb yollarının
bərbadlığından gileyini də gizlətmədi. Sonra Avropa Liseyinə zəng çaldıq.
Liseyin təlim-tərbiyə işləri üzrə direktor
müavini Aygün Mikayılova da istiliklə bağlı
problemlərinin olmadığını, qızdırıcı
sistemin yaxşı işlədiyini dedi.
Bildirdi ki, buna görə də liseydə şagirdlərin
dərsə davamiyyəti çox yaxşıdır. Şakir
CƏFƏROV
|