|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Nazir məktəb direktorluğuna namizədləri qəbul etdi
Yanvarın 12-də təhsil naziri Misir Mərdanov
məktəb direktorluğuna, rayon, şəhər
təhsil şöbələrində və peşə
təhsili müəssisələrində müxtəlif
vəzifələrə namizədliyi irəli sürülmüş
bir qrup təhsil işçisini qəbul etdi. Görüşdə Təhsil Nazirliyinin müvafiq
struktur bölmələrinin rəhbərləri iştirak
edirdilər. Zala toplaşanları salamlayan nazir öncə
diqqəti son dövrlər təhsildə xüsusi aktuallıq
kəsb edən bəzi məsələlərə
cəlb etdi. Müasir dövrdə həyatın bütün
sahələrində, o cümlədən təhsildə
də informasiya-kommunikasiya texnologiyalarının, kompüteri
bilməyin əhəmiyyətini, xüsusilə
idarəetmə sahəsində bu bacarığa
yiyələnmədən səmərəli
fəaliyyətin mümkünsüzlüyünü qeyd edən nazir rayon
təhsil şöbələrinə tövsiyə etdi ki,
məktəb direktorluğuna, rayon təhsil şöbələrində
məsləhətçi vəzifələrinə namizəd
irəli sürərkən onların İKT-dən
istifadə bacarığına malik olmalarını
əsas şərtlərdən biri kimi nəzərə
alsınlar. Nazir bununla əlaqədar artıq Bakı
və Sumqayıt şəhərlərində, Abşeron
rayonunda direktor təyin edilənlərin müvafiq bacarığa
malik olması barədə qərar qəbul edildiyini, yaxın
gələcəkdə bu işin digər rayonlara da şamil
olunacağını bildirdi. Nazir, habelə yaxın
vaxtlarda hazırda fəaliyyət göstərən direktorların
kompüter və İnternetdən istifadə bacarıqlarının
müəyyənləşdirilməsi üçün onların arasında
imtahan tipli prosedurların keçiriləcəyini də söylədi. ölkəmizin
ümumtəhsil məktəblərində kifayət
qədər müəllimin çalışması
nəzərə alınaraq bu təhsil müəssisələrinə
işə qəbulun dayandırılması haqqında
qərar qəbul edildiyini bildirən Misir Mərdanov yaxın
zamanlarda bu barədə yerlərə müvafiq təlimati
məktublar göndəriləcəyini diqqətə çatdırdı.
Dedi ki, hər bir fənn üzrə vakant yerlər haqqında
nazirliyə məlumat verilməsi yerlərə tövsiyə
olunub. Bakı şəhərində olduğu kimi, bundan
sonra rayonlardan da vakant yerlər haqqında məlumat toplanıb
bu barədə "Azərbaycan müəllimi"
qəzetində elan verildikdən sonra işləmək
istəyənlərdən sənədlər qəbul
olunacaq. Hər bir fənn üzrə sadə formada imtahan keçirilib
müsabiqə qaydasında işə qəbul prosesi aparılacaq. Misir Mərdanov bir məsələni də
xüsusi vurğulayaraq dedi ki, Tələbə Qəbulu üzrə
Dövlət Komissiyasının bir neçə gün öncə keçirilmiş
toplantısında orta məktəbləri yüksək
qiymətlərlə bitirən abituriyentlərin böyük bir
qisminin qəbul imtahanlarında çox aşağı bal
toplaması, bununla da attestat qiymətlərini doğrultmadıqları
açıqlanıb. Bunu çox pis hal adlandıran nazir həmin
məsələnin araşdırılacağını,
hər hansı məktəbdə bundan sonra belə hallara
yol verilərsə, bunun üçün birbaşa cavabdehlik daşıyan
direktorların cəzalandırılacağını
diqqətə çatdırdı. Sonra təhsil naziri Misir Mərdanov
məktəb direktorluğuna, rayon təhsil şöbəsi
müdirliyinə, həmin orqanda, habelə peşə
təhsili müəssisələrində müxtəlif
vəzifələrə namizədlikləri irəli sürülən
təhsil işçilərinin şəxsi işləri
ilə yaxından tanış oldu, onların hər biri
ilə söhbət etdi. Söhbətdə nazir müxtəlif
vəzifələrə namizədlərin işlədikləri
təhsil müəssisə və orqanlarındakı mövcud
vəziyyət, ali məktəblərə qəbulun
nəticələri, müəllim-şagird nisbəti, istilik
sistemi ilə təchizat və digər
məsələlərlə maraqlandı. Nazir müəllim-şagird nisbəti 1:10-dan aşağı
olan yerlərdə yeni müəllimlərin işə götürülməsini
yolverilməz hesab etdi. Görüşün sonunda Misir Mərdanov yeni
vəzifələrə təsdiq olunanlara
məsləhət və tövsiyələrini verdi,
gələcək işlərində uğurlar arzuladı. Yusif ƏLİYEV
Təşkilat Komitəsinin iclası "İlin ən yaxşı ümumtəhsil məktəbi" və "İlin ən yaxşı müəllimi" müsabiqələri üzrə meyarlar müzakirə olundu Misir Mərdanov qeyd olunan müsabiqə üzrə
görüləcək işlərdən danışaraq bildirib
ki, müsabiqənin keçirilməsində başlıca
məqsəd ölkənin ümumtəhsil müəssisələrində
çalışan yaradıcı müəllim potensialının
üzə çıxarılması, müasir təlim texnologiyalarının
tətbiqi sahəsində uğurlu nəticələri
ilə fərqlənən istedadlı müəllimlərin müəyyən
edilməsidir. Eyni zamanda nazir bu müsabiqənin
cəmiyyətdə müəllimin status və nüfuzunun yüksəldilməsinə,
dövlətin təhsil siyasətinin yerinə
yetirilməsində müəllimin rolunun getdikcə artmasına
nail olmaq məramı daşıdığını açıqlayıb.
Müsabiqədə iştirak etmək üçün
ümumtəhsil məktəbləri üzrə minimum şərtlərdən
danışan Misir Mərdanov onu da vurğulayıb ki,
burada əsas diqqət son üç ildə ali
məktəblərə qəbulun və buraxılış
siniflərində keçirilən sınaq imtahanlarının
nəticələrinə, məzunların yüksək bal
toplamasına, respublika, beynəlxalq səviyyəli
olimpiada, müsabiqə və yarışlarda şagirdlərin
mükafata layiq yer tutmasına və digər
məsələlərə yönələcək. Nazir
həmçinin müsabiqənin üç mərhələ üzrə keçiriləcəyini
diqqətə çatdıraraq Təşkilat Komitəsinin üzərinə
düşən vəzifənin öhdəsindən layiqincə
gəlməsinin önəmli olduğunu bildirib. İclasda Misir Mərdanov bu günlərdə
2007-2008-ci tədris ili üzrə ali məktəblərə
qəbul imtahanlarının nəticələrinə
həsr olunmuş tədbirdə qeyd edilən bir neçə
məsələyə toxunub. Nazir bildirib ki, bəzi orta
məktəblər tərəfindən şagirdlərə
fərqlənmə attestatı verilsə də, həmin
şagirdlər ali məktəblərə qəbul
imtahanlarında lazımi səviyyədə bilik nümayiş
etdirə bilməmiş, kifayət qədər bal toplamamışlar.
Bu məsələni diqqətdə saxlayacağını
vurğulayan Misir Mərdanov nazirliyin müvafiq struktur bölmə
rəhbərlərinə qeyd olunan istiqamət üzrə
ciddi tapşırıqlar verib. Nazir həmçinin Bakı
şəhəri, xüsusilə Səbail və Xətai
rayonları üzrə orta məktəbləri bitirən
şagirdlərin ali məktəblərə qəbul
imtahanları zamanı yüksək göstəricilər nümayiş
etdirdiklərini də diqqətə çatdırıb. Təşkilat Komitəsinin iclasında
"İlin ən yaxşı ümumtəhsil məktəbi
və ilin ən yaxşı müəllimi" müsabiqəsinin
keçirilməsi qaydaları üzrə fikir mübadiləsi aparılıb,
qiymətləndirmə sisteminin əhəmiyyəti qeyd
olunub. Eyni zamanda məktəbin təlim keyfiyyətinin
nəzərə alınması, ciddi nöqsanlara yol verən
məktəb və müəllimlərin bu müsabiqədə
iştirak etməməsi, ərizə və şikayətlərin
daha çox olduğu məktəblərin müəyyənləşdirilməsi
və digər məsələlər üzrə müzakirələr
aparılıb. Tədbirdə qeyd olunan müvafiq
təkliflərin bir həftə müddətində
nazirliyə yazılı şəkildə təqdim
edilməsi qərara alınıb. *** Yanvarın 16-da Təhsil Nazirliyində
"İlin ən yaxşı ümumtəhsil məktəbi
və ilin ən yaxşı müəllimi" müsabiqəsi
üzrə yaradılmış Təşkilat Komitəsinin
nazirlikdən olan üzvlərinin iclası keçirilib. İclasda təhsil naziri Misir Mərdanov müsabiqənin
keçirilməsi qaydalarında göstərilən müvafiq
bəndlərin ayrı-ayrılıqda müzakirəsinin
əsas olduğunu diqqətə çatdırıb. Eyni
zamanda nazir hər
bəndlə əlaqədar iştirakçıların
fikirlərini dinləyib. Nazir bu müsabiqədə,
əsasən, xarici dil savadı, kompüterdən istifadə
bacarıqlarına malik olan, müasir təlim texnologiyalarının
tətbiqi sahəsində uğurlu nəticələr
əldə edən istedadlı və yaradıcı müəllimlərə,
məzunları ali məktəbə daha çox qəbul
olunan, yüksək bal toplayan və digər mühüm şərtlərə
cavab verən ümumtəhsil
məktəblərinə xüsusi üstünlük
veriləcəyini açıqlayıb. Sonra nazir müavinləri və struktur bölmə
rəhbərləri müvafiq təkliflərlə çıxış
edib, bir sıra əlavə və dəyişikliklərin
edilməsini irəli sürüblər. Sonda Təşkilat Komitəsinin növbəti iclasının bu günlərdə keçirilməsi qərara alınıb. |