Hələ III sinifdə oxuyur, ancaq baş qoşmadığı məşğuliyyət qalmayıb. Bir yandan bacarıqlara yiyələnir, bir yandan dərslərini oxuyur. 

Adı Mirel Mustafazadədir. Dünən Dubaydan qayıdıb. O, Birləşmiş Ərəb Əmirliklərinin bu məşhur şəhərində keçirilən və dünyanın 40-dan artıq ölkəsinin iştirak etdiyi, FISO - “Future Intelligence Students Olympiad” olimpiadasına qatılıb və iştirak etdiyi ingilis dili fənni üzrə qızıl medal qazanıb. 

İngilis və rus dillərini bilir, fransız dilini öyrənir, planında mandarin dili də var 

Valideynlərinə Dubaya yola düşməzdən öncə söz verib ki, Vətənə qızıl medalla qayıdacaq. Verdiyi sözə nəinki əməl edib, hətta öz kateqoriyası üzrə ən yaxşı nəticələrdən birini göstərdiyinə görə ona qızıl medaldan əlavə, “Brilyant mükafat” (“Diamond Award”) da təqdim olunub.

Qeyd edək ki, Mirel ingilis dili ilə yanaşı, rus dilində də sərbəst danışır. Mandarin dilini də öyrənməyi qarşısına məqsəd qoyub: “Azərbaycan dili ana dilimdir, onu bilmək hər birimizin borcudur. Rus və ingilis dilləri ilə yanaşı, fransız dilini də öyrənirəm, bundan sonra da mandarin dilini öyrənməyə başlayacağam. Çin haqqında bir məqalə oxumuşdum. Ondan sonra bu barədə düşünürəm. Qərar vermişəm ki, bu dili də mütləq öyrənəcəyəm”.

“Eyni vaxtda rəsm, musiqi, üzgüçülük və gimnastika ilə məşğul oluram”

Mirel 2016-cı il təvəllüdlüdür. Sanki böyüyübmüş kimi, deyir hələ balacalığından oxumağa və öyrənməyə böyük həvəs göstərir: “Mən hər şeylə maraqlanıram. Atamla anam maraqlandığım hər yerə aparır, dərnəklərə yazdırırlar. Eyni vaxtda rəsm, musiqi, üzgüçülük və gimnastika ilə məşğul oluram”. 

Qızlar arasında şahmat birincisidir

Bunlarla yanaşı, şahmatda da nailiyyətləri var. Belə ki, Bakıda keçirilən dərəcə turnirində şahmat üzrə 4-cü dərəcəyə yiyələnib və qızlar arasında şahmat birincisi olub. Sadəcə Bakıda yox, Moskvada da şahmat üzrə beynəlxalq turnirə qatılıb.

Yaxşı pianoçudur, "Opera tarixi" konsertində uğurla iştirak edib

Xalq artisti Fidan Hacıyevanın vokal musiqi məktəbində piano dərslərinə gedən Mirel İkinci Beynəlxalq Opera Festivalı çərçivəsində keçirilən "Opera tarixi" konsertində uğurla iştirak edib.

“Ən böyük arzularından biri evdə şəxsi kitabxanasının olmasıdır”

Mirelin dediyinə görə, o, çoxlu kitab oxuyur: “Ən çox sevdiyim əsər isə J.K.Roulinqin dünyaca məşhur “Harry Potter” seriyasıdır”.

Bu əsərin bütün seriyalarını tamamlayıb. Ümumiyyətlə, yaşının az olmasına baxmayaraq, Mirel bu günədək ümumilikdə 40-a yaxın bədii kitab bitirib. Ən böyük arzularından biri evdə şəxsi kitabxanasının olmasıdır. 

Mirelin arzuları çox, xəyalları rəngarəngdir. Rəngli dünyasına hər gün bir rəng qarışır. Çünki bacarıqlarını artırmaqdan, qabiliyyətlərini inkişaf etdirməkdən yorulmur. 

Onun gələcəklə bağlı ən böyük arzusu isə elmlə məşğul olmaqdır.

Hələlik isə IV sinfə hazırlaşır. Bu yayla bağlı çoxlu planları var: “Çoxlu kitablar oxuyacağam, yeni bacarıqlar əldə edəcəyəm və istirahət edəcəyəm”.