“Hazırda ölkənin təhsil sisteminin idarə edilməsi müəyyən mənada mərkəzləşdirilmiş şəkildədir və əsas qərarlar Elm və Təhsil Nazirliyi tərəfindən verilir. Nazirlik həm məktəbləri, həm də digər təhsil müəssisələrini birbaşa idarə edir. Lakin bu sistemin idarə edilməsinin tədricən qeyri-mərkəzləşdirilmiş formaya keçidi istiqamətində işlər aparılır”.

Bunu elm və təhsil naziri Emin Əmrullayev ADA Universiteti və Elm və Təhsil Nazirliyinin tərəfdaşlığı ilə keçirilən VIII ADA Beynəlxalq Təhsil Konfransının açılış mərasimində səsləndirib.

O bildirib ki, nazirliyin tabeliyindəki agentliklər və regional idarələrə mərhələli şəkildə daha çox səlahiyyətin verilməsinə çalışılır. Bu dəyişikliklər uzunmüddətli və çətin  prosesdir: “Arzu olunan odur ki, sonda məktəb direktorlarına daha geniş səlahiyyətlər verə bilək. Onlar da bu səlahiyyətlərdən keyfiyyətli, səmərəli və şəffaf şəkildə istifadə etməlidirlər. Bunun üçün yerli səviyyədə ictimai nəzarətin olması mütləqdir”.

Nazir vurğulayıb ki, hazırkı sistemdə vətəndaşların şikayətləri birbaşa nazirliyə yönəldilir. Bu isə müraciətlərin operativ həllinə əngəl yaradır: “Bir vətəndaşın məktəblə bağlı şikayəti nazirliyə gəlir, bu tip şikayətləri bir-bir araşdırmaq üçün çox uzun vaxt tələb olunur. Belə davam edərsə, bəlkə də 12 ildən sonra digər məktəblərə çatmaq mümkün olar. Bəzən məktəb daxilində yaranan münaqişələrə görə nazirin qəbuluna müraciət edənlər olur. Bu hallarda tərəflərə ancaq tövsiyə və məsləhət vermək mümkündür. Əgər iki yetkin insan – direktor və valideyn və yaxud müəllim bir-biri ilə yola gedə bilmirsə, bu cür hallarda biz sadəcə yol göstərə bilərik. Bu tip məsələlərdə müstəqillik, və özünəinam kimi xüsusiyyətlər çox önəmlidir və bunlar məktəbdə formalaşmalıdır. İnanıram ki, gələcək nəsil daha fərqli düşüncə tərzi və mədəniyyətdə yetişəcək, bu da sistemin daha effektiv işləməsinə imkan yaradacaq”.