Bu gün ICPC 2025 Dünya Finalı çərçivəsində Bakı Konqres Mərkəzində “R.M. 90” proqramlaşdırma müsabiqəsinin bağlanış mərasimi baş tutub. İnnovasiya və Rəqəmsal İnkişaf Agentliyi (İRİA) və Bakı Dövlət Universitetinin birgə təşkilatçılığı ilə reallaşan müsabiqə Azərbaycanın ilk proqramçısı, görkəmli pedaqoq, informatika elminin banilərindən biri “Şöhrət” ordenli Ramin Mahmudzadənin anadan olmasının 90 illiyinə həsr olunub.

“Azərbaycan müəllimi” xəbər verir ki, mərasimin açılışında çıxış edənlər Ramin Mahmudzadənin Azərbaycan elminə və təhsilinə bəxş etdiyi misilsiz xidmətləri, informatika və proqramlaşdırma sahəsində gördüyü işləri qeyd ediblər. Bildirilib ki, onun pedaqoji fəaliyyəti, zəhməti və yaratdığı ənənələr bu gün də gənclərə yol göstərir, elm və texnologiyaya marağı daha da artırır.

Tədbir çərçivəsində həm görkəmli alimin xatirəsinə ehtiram ifadə olunub, həm də gənc proqramçıların uğurları önə çəkilib. 
Mərasimin əsas hissəsində “ICPC-dən rəqəmsal cəmiyyətə” mövzusunda panel müzakirəsi təşkil edilib. Paneldə İnnovasiya və Rəqəmsal İnkişaf Agentliyinin İdarə Heyətinin sədr müavini Şahin Əliyev, Azərbaycan Respublikası Mərkəzi Bankının departament direktoru Əfqan Abbasov çıxış ediblər. Sessiyaya isə İRİA-nın aparıcı layihə meneceri Leyla Zeynalova moderatorluq edib.

Professor Ramin Mahmudzadənin tələbələri söz alaraq öz xatirələrini və bugünkü fəaliyyətlərini bölüşüblər. Onların əksəriyyəti hazırda Azərbaycanın aparıcı qurumlarında mühüm vəzifələr daşıyır, ölkənin rəqəmsal gələcəyinin qurulmasında öz töhfələrini verirlər. 

Leyla Zeynalova “Azərbaycan müəllimi”nə açıqlamasında bildirib ki, müsabiqə elan olunduğu gündən tələbələr arasında böyük maraq doğurub:
“200-dən çox tələbə müsabiqəyə qeydiyyatdan keçib. Onlardan yalnız 50 nəfər final mərhələsinə yüksəlib və 9 tələbə isə 1-ci, 2-ci və 3-cü yerlərin qalibi olub”.

Qarabağ Universitetinin Mühəndislik fakültəsinin tələbəsi Cahangir Məmmədov da mükafatlandırılanlar sırasında idi. O, seçim mərhələsində 200-dən çox iştirakçı arasından ilk 50-liyə daxil olub, finalda isə 12-ci yeri tutub. Gənc iştirakçı öz təəssüratlarını bizimlə bölüşüb:
“ICPC kimi nüfuzlu beynəlxalq tədbirin Azərbaycanda keçirilməsi mənim üçün böyük qürur və dəyərli təcrübə oldu. Qarabağ Universitetinin tələbəsi kimi belə bir beynəlxalq arenada çıxış etmək və müxtəlif ölkələrdən gəlmiş həmyaşıdlarla tanış olmaq mənim üçün misilsiz fürsət idi”.

Bakı Dövlət Universitetinin “Kompüter elmləri” ixtisasının tələbəsi Nihat Qəribli də qaliblər arasında idi. O, sevincini bizimlə bölüşərək qeyd edib ki, bu yarışda qalib olmaq onun üçün böyük qürurdur: “Bu müsabiqə mənə və komandama daha böyük hədəflərə doğru çalışmağa stimul verdi. İndi beynəlxalq yarışlarda ölkəmizi layiqincə təmsil etmək üçün daha əzmlə hazırlaşacağıq”.

Müsabiqənin təşkilatçılarından olan Bakı Dövlət Universitetinin rektoru Elçin Babayev tədbirin əhəmiyyəti barədə “Azərbaycan müəllimi”nə danışıb. 
“Ölkədə elm və təhsil sahəsində aparılan islahatlar öz bəhrəsini verməkdədir. Bu gün biz bir mötəbər müsabiqənin qaliblərini mükafatlandırma mərasimində iştirak etdik. Bu müsabiqə gənclərimiz üçün yeni perspektivlər açır. Biz istedadları üzə çıxarmağı, onlara dəstək göstərməyi və gələcəyin rəqəmsal inkişafı üçün liderlər yetişdirməyi əsas məqsədimiz hesab edirik. Bu yolda birlik və həmrəylik ən vacib amildir. Mən inanıram ki, yeni nəsil yaradılan bu imkanlardan maksimum faydalanacaq və irəli getmək üçün əzm göstərəcək”.

Xatırladaq ki, “R.M. 90” müsabiqəsi təkcə proqramlaşdırma yarışı deyil, həm də Azərbaycan gəncləri üçün beynəlxalq səviyyəli müsabiqələrə hazırlıq baxımından mühüm bir mərhələ kimi qiymətləndirilir.