“Azad Mirzəcanzadə İnkişaf Proqramı” çərçivəsində Lənkəran Dövlət Universitetində (LDU) “Kreativ və innovativ düşüncə tərzini necə formalaşdırmalı?” mövzusunda növbəti infosessiya keçirilib.

Universitetdən “Azərbaycan müəllimi”nə bildirilib ki, tədbiri giriş sözü ilə LDU-nun sosial məsələlər üzrə prorektoru vəzifəsini icra edən dos. Ramiz Şəmmədov açaraq akademik Azad Mirzəcanzadənin zəngin elmi yaradıcılığından, ictimai fəaliyyətindən, gənclərə göstərdiyi qayğıdan söz açıb. Bildirib ki, bu dəyərli alimin adını daşıyan qurum akademik Azad Mizəcanzadənin işıqlı ideyalarını həyata keçirmək istiqamətində davamlı iş aparır, uğurlu layihələr həyata keçirir. Dos. R. Şəmmədov “Azad Mirzəcanzadə İnkişaf Proqramı” ilə LDU arasında yaranan işgüzar əlaqələrin əhəmiyyətindən danışıb və sözü proqramın direktoru Leyla Seyidzadəyə verib. Proqram direktoru LDU-da sayca ikinci dəfə keçirilən infosessiyada iştirak edən təlimçiləri iştirakçılara təqdim edib.

Bildirilib ki, bugünkü tədbirdə Leyla Seyidzadə, Vüsalə Muradova, Nigar İbrahimova, Türkan Gözəlli və Fərid Məhərrəmli Azərbaycanın intellektual və elmi irsinin simvollarından biri olan akademik Azad Mirzəcanzadənin adını daşıyan proqramın məqsəd və vəzifələri barədə iştirakçılara ətraflı məlumat veriblər.

Diskussiya şəraitində keçən təlimdə universitetin tələbə və müəllim heyəti iştirak edib.

Qeyd edək ki, “Azad Mirzəcanzadə İnkişaf Proqramı” yeni imkanları dəyərləndirməyi, aktual problemlərin yaradıcı həlli yollarını tapmağı bacaran, dayanaqlı gələcəyə töhfə verməyə çalışan, çevik, innovativ yanaşmalara sahib olan gənclərin üzə çıxarılması və onların inkişafına dəstək verilməsi məqsədilə həyata keçirilir. Proqrama 18-35 yaş arasında Azərbaycan vətəndaşları qoşula bilərlər. Proqram qəbul olunan layihənin həyata keçirilməsi üçün 5000 AZN-ə qədər maliyyə dəstəyi göstərir.