III Maarifçi tələbə-məzun təcrübə proqramının iştirakçıları üçün “Rifah strategiyaları: sağlam və effektiv həyat tərzi” mövzusunda növbəti təlim keçirilib.

“Azərbaycan müəllimi” xəbər verir ki, təlim Təhsil İnstitutunun Peşə və ömürboyu təhsilin proqramları şöbəsinin müdiri  Xanım Şabanovanın fasilitatorluğu ilə baş tutub.

Nəzəri və praktiki hissədən ibarət olan təlimdə “Maarifçi”lər “rifah nədir?” sualı ətrafında öz fikirlərini bölüşüblər. Təqdim olunan maraqlı cavablar əsasında rifah anlayışının müxtəlif aspektləri barədə geniş müzakirələr aparılıb.

Xanım Şabanova xüsusilə dövlət müəssisələrində çalışan əməkdaşlar üçün rifahın qorunması, həyat və iş balansının təmin edilməsi, yaradıcı potensialın inkişaf edilməsi, maddi rifah və maliyyə savadlılığı kimi mövzular üzrə ətraflı məlumat verib. İştirakçılar həmçinin sosial rifah, şəxsi maliyyə vərdişləri və həyat keyfiyyətinin artırılması ilə bağlı müzakirələrdə fəal iştirak ediblər.

Təlimin sonunda iştirakçılar üç komanda şəklində qrup işi həyata keçirərək mövzu üzrə əldə etdikləri bilikləri praktik olaraq tətbiq ediblər.

Qeyd edək ki, 4 ay davam edəcək proqramın məqsədi tələbə və məzunlara təcrübə imkanı yaratmaq, onların bilik və bacarıqlarını artırmaq, nəzəri biliklərini real iş mühitində tətbiq etmək və gənclərə peşəkar vərdişlər qazandırmaqdır.