Təhsil həyatında qazanılan uğurlar gələcək nailiyyətlərin ilk addımı, ilk carçısıdır. Məhz 1 iyun tarixində keçirilən qəbul imtahanında yüksək nəticə göstərən abituriyentlər bu sınaqdan uğurla çıxaraq gələcək nailiyyətlərinə möhkəm zəmin yaratdılar. Bu abituriyentlər arasında IV ixtisas qrupu üzrə maksimum nəticə – 400 bal toplayan Anar Babayev də var.

Bakı şəhəri 129 saylı tam orta məktəbin məzunu olan Anar “Azərbaycan müəllimi” ilə onu bu uğura aparan yol haqqında danışıb, təəssüratlarını bölüşüb.

Anar deyir ki, bu nəticə təsadüf deyil, illərlə göstərdiyi əzmkarlığın və davamlı çalışmanın bəhrəsidir. O, təhsil illəri boyunca öz biliyini müxtəlif imtahan və müsabiqələrdə dəfələrlə sınayıb və hər dəfə uğurlu nəticə göstərib: “I sinifdən bəri hər zaman əlaçı olmuşam. Məktəbdaxili və xarici müsabiqələrdə iştirak edib yüksək nəticələr əldə etmişəm. Respublika fənn müsabiqələrində kimya fənni üzrə bürünc medal, X sinifdə isə Respublika fənn olimpiadalarında fizika fənni üzrə gümüş medal qazandım”.

Anar bu il XI sinifdə isə Respublika fənn olimpiadalarında kimya fənni üzrə fərqlənərək III yerə layiq görülüb. Bununla yanaşı, Azərbaycan Astronomiya Olimpiadasında iştirak edərək qızıl medala sahib olub.

Uğur məsuliyyətdən başlayır

Anar aşağı siniflərdən etibarən dərslərinə məsuliyyətlə yanaşıb, müəllimlərini diqqətlə dinləyib. Məhz bu yanaşma onun uğurlarının təməlini qoyub. XI sinfin əvvəllərindən isə qəbul imtahanında yüksək bal toplamağı konkret məqsəd kimi seçib: “Bəzən çətin anlar olurdu, amma həmişə belə deyildi. Xüsusilə buraxılış imtahanına yaxın daha çox stres hiss edirdim. Amma qəbul imtahanı mənə daha rahat görünürdü. Ona görə də maksimum nəticə göstərə bildim”.

Çox çalışmaq və qarşınıza bir hədəf qoyub ona doğru irəliləmək ən doğrusudur

Anarın ən böyük arzusu həkim olmaqdır. Uşaqlıqdan ailəsinin onu həkim kimi görmək istədiyini deyən Anar bu amilin də onu motivasiya etdiyini bildirir: “Uğur qazanmağın yolu çox çalışmaqdan keçir. Aşağı siniflərdən güclü baza qurmaq vacibdir, amma son illərdə göstərilən əzmkarlıqla da yüksək nəticə əldə etmək mümkündür”.

Ümumilikdə 695.8 bal toplayan Anar Babayev bu yolda ən böyük dəstəkçilərinin ailəsi və müəllimləri olduğunu xüsusi vurğulayır.