Mayın 26-da Azərbaycan Dövlət Neft və Sənaye Universiteti (ADNSU) ilə Türk Əməkdaşlıq və Koordinasiya Agentliyi (TİKA) arasında əməkdaşlıq çərçivəsində “Yaşıl Dönüşüm və Dayanıqlı Təhsil” mövzusunda beynəlxalq təlim proqramının açılış mərasimi keçirilib.

Universitetdən “Azərbaycan müəllimi”nə verilən məlumata görə, açılışda ADNSU-nun strateji məsələlər üzrə prorektoru, dosent Vazėh Əskərov iştirakçıları salamlayaraq layihənin əhəmiyyətindən bəhs edib. O, iqlim dəyişikliyi, yaşıl texnologiyaların tətbiqi və bu istiqamətdə gənclərin maarifləndirilməsinin vacibliyini vurğulayıb.

Tədbirdə TİKA-nın Bakı Proqram Koordinatoru Hayrettin Özçelik və koordinator köməkçisi Kürşat Özdemir də çıxış edərək layihənin məqsədi, əhatə etdiyi mövzular və gənclər üçün yaradılan imkanlar barədə məlumat veriblər.

Qeyd edək ki, təlim proqramı enerji transformasiyası, yaşıl innovasiyalar, iqlim dəyişikliyi və yaşıl texnologiyaların tətbiqi üzrə müxtəlif modulları əhatə edir. Təlimlər Türkiyənin Çanakkale Onsekiz Mart Universitetinin (ÇOMÜ) ekspertləri Savaş Gürdal və Kadir Yılmaz tərəfindən aparılır. Beş günlük intensiv proqram çərçivəsində 30 seçilmiş tələbə təlimlərdə iştirak edəcək. Proqram mayın 30-da yekunlaşacaq.

Təlimi uğurla başa vuran iştirakçılara beynəlxalq sertifikatlar təqdim olunacaq. Eyni zamanda, onlar üçün yaşıl transformasiya layihələrində iştirak və təcrübə qazanmaq imkanı yaradılacaq. Proqram çərçivəsində fərqlənən 5 nəfər tələbə isə Türkiyədə təcrübə proqramına cəlb olunacaq.

Xatırladaq ki, bu beynəlxalq təşəbbüs TİKA-nın dəstəyi və Çanakkale Onsekiz Mart Universitetinin koordinasiyası ilə həyata keçirilir. Layihə Avropa Yaşıl müqaviləsi və qlobal iqlim siyasətlərinə uyğun olaraq “yaşıl yaxalı” kadrların hazırlanmasına yönəlib. Əsas məqsəd tələbələrin dayanıqlı inkişaf, yaşıl texnologiyalar və enerji transformasiyası sahəsində bilik və bacarıqlarını artırmaqla yanaşı, onların beynəlxalq elmi əməkdaşlıq və peşəkar inkişaf imkanlarını genişləndirməkdir.