Təhsil İnstitutunda təkmilləşdirilməkdə olan musiqi fənn kurikulumunun müzakirəsi təşkil edilib. Müzakirə Bakı şəhərinin ümumtəhsil müəssisələrinin fənn müəllimləri və işçi qrupunun üzvlərinin iştirakı ilə keçirilib.

“Azərbaycan müəllimi” xəbər verir ki, görüşdə ARTİ-nin şöbə müdiri Mənsur Məhərrəmov təkmilləşdirmə prosesi və Elm və Təhsil Nazirliyi tərəfindən təsdiqlənmiş fənn kurikulumları barədə məlumat verib, musiqi fənn kurikulumunu təkmilləşdirən işçi qrupunun üzvlərini auditoriyaya təqdim edib. Daha sonra işçi qrupunun üzvləri kurikulumun təkmilləşdirilməsilə bağlı ətraflı məlumat veriblər.

Görüşdə iştirak edən ümumtəhsil müəssisələrinin müvafiq fənn müəllimləri cari kurikulum sənədinə dair rəy və təkliflərini səsləndiriblər. Müzakirə zamanı musiqi fənn kurikulumundakı standartlardan aktuallığını itirən, kurikuluma əlavə edilməsi məqsədəuyğun hesab edilən standartlar barəsində fikirlər səsləndirilib. Şagirdlər tərəfindən mənimsənilməsində çətinlik müşahidə olunan mövzularla bağlı təkliflər verilib. 

Ümumiyyətlə, görülən işlərin əhəmiyyəti xüsusilə vurğulanıb, planlanan dəyişikliklər iştirakçılar tərəfindən müsbət qiymətləndirilib.