Qeyri-Hökumət Təşkilatlarına Dövlət Dəstəyi Agentliyinin maliyyə yardımı, “Miqrasiya Sahəsinin İnkişafı” İctimai Birliyinin təşkilatçılığı ilə “Azərbaycanda təhsil alan əcnəbi tələbələr arasında miqrasiya qaydaları, tibbi əlçatanlıq və ölkə tanıtımı mövzularında maarifləndirmə" layihəsi çərçivəsində Bakı Avrasiya Universitetində tədbir keçirilib. 

“Azərbaycan müəllimi” xəbər verir ki, tədbirdə ilk çıxış edən Bakı Avrasiya Universitetinin beynəlxalq əlaqələr üzrə prorektoru Sevda Rzayeva iştirakçılara universitet rəhbərliyinin salamlarını çatdırıb, çalışdığı ali təhsil ocağında yeni dərs ilində tətbiq edilən son yeniliklərdən, tələbələr üçün yaradılan şəraitdən danışaraq, Dövlət Miqrasiya Xidməti əməkdaşlarının əcnəbi tələbələrlə görüşlərinin əhəmiyyətli olduğunu vurğulayıb.

Layihə rəhbəri, DMX yanında İctimai Şuranın üzvü Vidadi Fətullayev ölkəmizin yüksələn beynəlxalq nüfuzunun və iqtisadi inkişafının nəticəsi olaraq, universitetlərimizdə təhsil almaq üçün gələn xarici ölkə vətəndaşlarının sayının ildən-ilə artdığını vurğulayıb, bu sahədə ali məktəblərin və aidiyyatı dövlət qurumlarının birgə atdıqları addımlardan ətraflı bəhs edib və tədbirin keçirilməsinə dəstək olan Dövlət Miqrasiya Xidməti, QHT-lərə Dövlət Dəstəyi Agentliyi və Bakı Avrasiya Universitetinin rəhbərliyinə minnətdarlığını bildirib. 

Dövlət Miqrasiya Xidmətinin Miqrasiya Siyasəti və Hüquqi Təminat Baş İdarəsinin Hüquqi təminat idarəsinin rəis müavini Xəyalə Abbasova mövcud miqrasiya qaydaları barədə tədbir iştirakçılarına geniş məlumat verib. 

Miqrasiya Nəzarəti Baş İdarəsinin baş inspektoru Xəyalə İsmayılova, Miqrasiya Proseslərinin Təhlili və İnformasiya Təminatı Baş İdarəsinin inspektoru Ayxan Rzayev və Miqrasiya Proseslərinin Tənzimləmə Baş İdarəsinin baş inspektoru Nihat Kazımov tədbirdə iştirak edən əcnəbi tələbələri maraqlandıran sualları cavablandırıb və miqrasiya qanunvericiliyinin əcnəbi tələbələrlə bağlı müddəalarına dair müfəssəl izahatlar veriblər.