Mayın 21-də Türk Dövlətləri Təşkilatının (TDT) Budapeştdə keçirilən qeyri-rəsmi zirvə toplantısında Nobel mükafatı laureatı, türkiyəli alim professor Əziz Sancara Əli Şir Nəvai Beynəlxalq Mükafatı təqdim edilib. 

“Azərbaycan müəllimi” xəbər verir ki, mükafatı Ə.Sancara Qırğızıstan Prezidenti Sadır Kaparov təqdim edib. Mərasimdə iştirak edən Türkiyə Prezidenti Rəcəb Tayyib Ərdoğan və Macarıstanın Baş naziri Viktor Orban türk dünyasında elmi araşdırmalara verdiyi böyük töhfələrə görə yüksək mükafata layiq görülən Əziz Sancarı təbrik ediblər.

Türk Dövlətləri Təşkilatının Baş katibi Kubanıçbek Ömüralıyev mükafatlandırma mərasimindəki çıxışında Əziz Sancarın molekulyar biologiya və tibb sahəsində bacarıqlı bir alim olmaqla yanaşı, həm də şəxsi hekayəsi ilə milyonlarla insana örnək bir insan olduğunu bildirib. “O, əldə etdiyi nailiyyətlərə görə artıq Nobel mükafatı alıb və biz onunla eyni dövrdə yaşamaqdan qürur duyuruq. Əlişir Nəvai adına Beynəlxalq Mükafat onun türk dünyasına verdiyi mədəni və intellektual töhfənin nə qədər xüsusi olduğunu göstərir”, - deyə K.Ömürəliyev bildirib.

“Mənim üçün şərəfdir”

Professor Əziz Sancar mükafatlandırma mərasimində verdiyi açıqlamada, "Öncə prezidentimiz Ərdoğana məni bu mükafata  namizəd göstərdiyi üçün təşəkkür edirəm. Keçən il keçirilən Türk Dövlətləri Təşkilatının zirvə toplantısında namizədliyimi irəli sürdülər. Bu, mənim üçün şərəfdir", - deyib.

Ə.Sancar sammitə ev sahibliyi etdiyi üçün Macarıstana da təşəkkür edib: “Mükafatımı Türk Dövlətləri Təşkilatına üzv ölkələrin dövlət və hökumət başçılarının qarşısında Macarıstanın ev sahibliyi etməsi münasibəti ilə alıram. Xatırlayıram, 8 yaşımda futbolda olarkən o vaxt “magyarlar” adlandırdığımız macarlar hamını məğlub edirdilər. Mən uşaq olanda onlar həmişə almanlara və ingilislərə futbol yarışlarında qalib gələrdilər. O vaxt Macarıstan millisi futbol ictimaiyyətində məşhur idi. Macarlara heyranlığım o dövrə təsadüf edir. Buna görə bu mükafatı bu gün burada aldığım üçün şadam. Hamınıza çox minnətdaram”.