Bu ilin fevralından iştirakçıların həm komanda, həm də fərdi şəkildə qatıldığı “Azad Mirzəcanzadə İnkişaf Proqramı”nda yekun qiymətləndirmə nəticəsində 10 layihə qalib elan olunub.

Lənkəran Dövlət Universitetindən “Azərbaycan müəllimi”nə bildirilib ki, qaliblər arasında LDU-nun Aqrar və mühəndislik fakültəsinin iki tələbəsi də var. Nuray Əliyeva “Kompüter mühəndisliyi” ixtisasının, Ramal Əsgərov “İnformasiya texnologiyaları” ixtisasının III kurs tələbələridir. Onlar “CodeByte” layihəsi ilə “Azad Mirzəcanzadə İnkişaf Proqramı”nın qalibi olublar. 

Bildirilib ki, “CodeByte” Azərbaycanda proqramlaşdırma və rəqəmsal bacarıqların inkişafına yönəlmiş innovativ təhsil startapıdır. Layihənin əsas məqsədi regionlarda yaşayan gənclərə yüksəkkeyfiyyətli, əlçatan və müasir texnologiyalara əsaslanan proqramlaşdırma təhsili təqdim etməkdir. 

Qaliblərin mentoru Texnologiya və texniki elmlər kafedrasının dosenti, texnika üzrə fəlsəfə doktoru Vüsalə Muradovadır.

Hər bir qalib layihəsini inkişaf etdirmək üçün 5000 manatadək maliyyə dəstəyi alacaq. Maliyyə dəstəyindən əlavə, qaliblər təcrübəli peşəkarların dəstəyi, mentorluqdan istifadə və təlim imkanları ilə də təmin olunacaqlar.

Xatırladaq ki, “Azad Mirzəcanzadə İnkişaf Proqramı” Azərbaycanda yaşayan, innovativ və sosial əhəmiyyətli təşəbbüsləri həyata keçirmək potensialına malik 18-35 yaşlı gənclərin dəstəklənməsinə yönəlib. Proqram iştirakçılara liderlik bacarıqlarını, sahibkarlıq düşüncəsini və sosial fəallığı inkişaf etdirmək üçün unikal imkanlar təqdim edir. “Azad Mirzəcanzadə İnkişaf Proqramı”nın üçüncü axını üçün müraciətlərin qəbulu açıqdır.