Lənkəran-Astara Regional Təhsil, Lənkəran-Astara Regional Gənclər və İdman, Regional Mədəniyyət idarələrinin birgə təşkilatçılığı ilə “Peşə sərgisi” təşkil olunub. Lənkəranın ev sahibliyi etdiyi tədbirin məqsədi yeniyetmə və gənclərin peşə təhsilinə marağını artırmaq, onların yaradıcılıq potensialını üzə çıxarmaq olub.

"Azərbaycan müəllimi" xəbər verir ki, Heydər Əliyev Xatirə Parkında gerçəkləşən tədbirdə Lənkəran, Astara, Masallı, Lerik və Cəlilabad rayonlarının ümumtəhsil müəssisələrinin peşə təmayüllü siniflərində təhsil alan 14-17 yaşlı şagirdlərin əl işləri nümayiş edilib.

Dülgərlik, dərzilik, mebel quraşdırma, aşpazlıq, kompüter operatorluğu, qənnadıçılıq və digər sahələr üzrə təhsil alan şagirdlər il ərzində emalatxanalarda hazırladıqları işləri sərgidə təqdim ediblər. Onların əməyi yalnız peşə bacarıqlarını deyil, həm də yaradıcı potensiallarını əks etdirib. 

Lənkəran-Astara Regional Mədəniyyət İdarəsinin nəzdində fəaliyyət göstərən klub və sənətkarlıq evləri də sərgiyə qədim xalq yaradıcılığı nümunələri və əl işləri ilə  qatılmışdılar. 
Sərgi yalnız texniki və peşə bacarıqları ilə deyil, həm də mədəni zənginliklə müşayiət olundu. Lənkəran Mədəniyyət Mərkəzinin solistləri, Dövlət Dram Teatrının gənc aktyorları, eləcə də məktəb və bağça kollektivlərinin təqdim etdiyi bədii kompozisiyalar tədbirə rəng qatdı.

Tədbirin sonunda peşə təmayüllü siniflərin təşkili və sərgidə nümayiş olunan əl işlərinin hazırlanmasında fəallıq göstərən müəllimlər, qrup rəhbərləri və şagirdlər Regional Təhsil İdarəsi və Regional Gənclər və İdman İdarəsinin təşəkkürnamələri ilə təltif olundular.