“Əvvəllər nəzəri biliklərin öyrədilməsi ilə kifayətlənən kimya dərsləri bu gün həyatla sıx inteqrasiya olunmuş formada tədris edilir. Məqsəd şagirdlərə yalnız bilik ötürmək deyil, onlarda real həyatda qarşılaşacaqları problemləri kimya bilikləri vasitəsilə həll etmək bacarqlarını formalaşdırmaqdır”.

“Azərbaycan müəllimi” xəbər verir ki, bunu Xəzər TV-də yayımlanan “Gündəm” verilişində Təhsil İnstitutunun Təhsilverənlərin Peşəkar İnkişafı Mərkəzinin direktoru Nəzakət Mehdiyeva səsləndirib.

O bildirib ki, 15 ildən çoxdur ölkəmizdə bütün fənlər üzrə yeni fənn kurikulumları uğurla tətbiq edilir. Bu dəyişikliklər kimya fənninin tədrisinə də ciddi şəkildə təsir edib:

“Artıq kimya fənni klassik yanaşmadan uzaqlaşıb, daha çox praktiki və gündəlik həyatda tətbiq edilə biləcək biliklərin öyrədilməsinə yönəlib. Sertifikasiya imtahanlarında müəllimlərin “çətin” kimi qiymətləndirdiyi suallar əslində nəzəri baxımdan mürəkkəb deyil. Bu suallar əsasən həyatda rast gəlinən problemlərin həllinə əsaslanır. Müəllimlərimizin əksəriyyətində bu bacarıqların yüksək səviyyədə olmamasının səbəbi uzun illər ərzində universitetlərdə kimyanın daha çox nəzəri biliklər əsasında tədris olunmasıdır. Ona görə də bəzi müəllimlər yeni yanaşmalara uyğunlaşmaqda çətinlik çəkir”.

N.Mehdiyeva qeyd edib ki, Təhsil İnstitutu müəllimləri bu prosesə adaptasiya etmək üçün davamlı tədbirlər həyata keçirir: 

“Müəllimlər üçün seminar və vebinarlar təşkil olunur, onlara müasir təlim metodları ilə təlimlər keçirilir. Məqsəd kimya kimi çətin, lakin həyati problemlərin həllində böyük əhəmiyyət daşıyan fənlərin tədrisində müəllimlərin yeni baxış formalaşdırmasına dəstək verməkdir”.