Kimya fənni üzrə sertifikatlaşdırma imtahanında yüksək bal toplayan müəllimlərdən biri də Xaçmaz şəhəri akademik Zərifə Əliyeva adına 8 nömrəli məktəb-liseyin müəllimi Ceyhun Abdulxalıqovdur. 

“Azərbaycan müəllimi” imtahanda 56 bal toplayan Ceyhun Abdulxalıqovu oxucularına tanıdır.

“İnanıram ki, üzərində çalışan, yeniliklərə açıq olan hər bir müəllim istədiyi nəticəni əldə edə bilər” 

Ceyhun müəllimlə söhbət əsnasında onun 9 ildir ki, müəllim işlədiyini öyrənirik. Qürurla vurğulayır ki, bugünə qədər 20-dən çox şagirdi tibb sahəsi üzrə, həmçinin yüzlərlə şagirdi ölkənin müxtəlif universitetlərində ali təhsil alır. Müəllimlərin işə qəbulu imtahanında iştirak edən gənc mümkün 60 balın 55-ni toplayaraq pedaqoji fəaliyyətə başlayıb. Sertifikatlaşdırmadan əvvəl diaqnostik qiymətləndirmə imtahanında iştirak edib və orada da uğurlu nəticə əldə edib. Ceyhun müəllim düşünür ki, sertifikatlaşdırmada göstərdiyi müvəffəqiyyətli nəticədə bu imtahanların rolu danılmazdır və onları özü üçün gözəl təcrübə hesab edir.

“Sertifikatlaşdırma imtahanına hazırlaşmağa çox da zamanım yox idi, amma çalışdıqca kurikulum mövzuları üzrə özümü təkmilləşdirdim. Sualların əksər hissəsi asan idi, çox az hissəsi düşündürücü və çətin idi, bu, məncə, normal sayılır. Nəticə etibarilə imtahanı verən müəllimdir. İşlədiyim illər ərzində öz üzərimdə mütəmadi çalışmağım yüksək bal toplamağıma çox kömək etdi, çünki ilk imtahanım deyildi. Düşünürəm ki, işlədiyim müddət ərzində qazandığım təcrübə müsahibə mərhələsində də uğur qazanmağıma kömək olacaq. Bununla yanaşı, yeniliklərə açıq olduğum üçün metodiki biliklərimi möhkəmləndirməyə çalışıram”, – C.Abdulxalıqov bildirir.  

Uğurlu pedaqoq təhsilverənləri heç vaxt ruhdan düşməməyə, növbəti sertifikatlaşdırma imtahanına qədər öz üzərlərində ciddi çalışmağa səsləyir: “İnanıram ki, öz üzərində çalışan, yeniliklərə açıq olan hər bir müəllim istədiyi nəticəni əldə edə bilər”.

Sertifikasiya imtahanının keçirilməsini əhəmiyyətli hesab edən müəllim deyir: “Sertifikatlaşdırma imtahanında uğur qazanan hər bir müəllim bizim gələcəyimiz olan təhsilalanların savadlı kadr kimi yetişdirilməsində böyük rol oynayır”.