Uşaq müəssisələrində səhhətində problem olan uşaqların qidalanması üçün həkimin tövsiyəsinə əsasən menyu hazırlanmalıdır. 

“Azəbaycan müəllimi” xəbər verir ki, bu, Nazirlər Kabinetinin təsdiqlədiyi “Dövlət və qeyri-dövlət uşaq müəssisələrində göstərilən xidmətlərin keyfiyyətinə dair tələblər”də öz əksini tapıb.

Bu tələblərdə qidalanmaya dair tələblər də yer alıb.

Həmin tələblərə görə, müəssisələr uşaqların minimum keyfiyyəti və təhlükəsizliyi qida təhlükəsizliyi sahəsində texniki normativ hüquqi aktların tələblərinə cavab verən qida ilə təmin etməlidirlər. Qida məhsullarının mikrobioloji, kimyəvi və fiziki çirklənməsinin qarşısının alınmalı, onlar üzərində aşkar korlanma, dağılma, çürümə əlamətlərinin olmamalı, Qida
Təhlükəsizliyi Reyestrindən çıxarışı olan məhsul və xammallar qəbul edilməlidir. Hər bir müəssisədə qida maddələrinə olan fizioloji tələbat və qidalanma normaları əsasında hazırlanmış 10 günlük və ya 2 həftəlik menyu tərtib olunmaqla, yeməkxanaların divarında yerləşdirilməlidir. 

Bir yaşadək uşaqların qidalanması fərdi qaydada, fizioloji yaş həddi normalarına və bütün növ qida məhsullarının vaxtında tətbiqinə uyğun olaraq təyin edilməlidir. 

Qeyd edək ki, uşaq müəssisələri dedikdə, dövlət və qeyri-dövlət uşaq müəssisələri təhsil, sosial xidmət, açıq və qapalı tipli xüsusi təlim-tərbiyə,  yetkinlik yaşına çatmayanların tərbiyə müəssisələri, yetkinlik yaşına çatmayanlar üçün müvəqqəti təcridetmə mərkəzləri, tibb müəssisələri, eləcə də qanunvericiliklə müəyyən edilmiş qaydada yaradılan digər dövlət və qeyri-dövlət müəssisələri nəzərdə tutulur.