Son iki ildə Abşeron-Xızı Regional Təhsil İdarəsinin tabeliyində fəaliyyət göstərən 35 məktəbdə cari təmir işləri aparılıb. 

Bu barədə "Azərbaycan müəllimi"nə Regional İdarədən məlumat verilib.

Qeyd olunub ki, Sumqayıt şəhəri 34 nömrəli tam orta məktəbdə əsaslı təmir işləri həyata keçirilib. Sumqayıt şəhəri 21 və 36 nömrəli tam orta məktəblərin binalarında əsaslı təmir işləri davam etdirilir.

Xırdalan şəhəri 8 nömrəli və Hökməli qəsəbə tam orta məktəblərin binaları sökülərək yenidən tikilir.

Saray qəsəbə 1 nömrəli, Qobu qəsəbə 3 nömrəli və Novxanı kənd M.Hüseynzadə adına 1 nömrəli tam orta məktəblər üçün yeni korpus tikilib, mövcud korpusları isə əsaslı təmir olunur.

Xırdalan şəhəri 11 nömrəli tam orta məktəbin yeni binası artıq tikilərək istifadəyə verilib.

Masazır kənd Yeni Bakı yaşayış massivində 1200 şagird yerlik məktəb binası tikilib və hazırda burada son tamamlama işləri görülür. 

Eyni zamanda, 11 məktəbəqədər təhsil müəssisəsində cari təmir işləri aparılıb. Sumqayıt şəhəri 22 nömrəli körpələr evi-uşaq bağçasında əsaslı təmir işləri davam etdirilir. Əlavə olaraq 180-dən çox müəssisədə istilik təminatı və kommunal-kommunikasiya problemləri ilə əlaqədar bir sıra işlər görülür.