|
Seminarda Beynəlxalq Humanist
Pedaqogika Assosiasiyasının prezidenti, professor Şalva
Aleksandroviç Amonaşvili iştirak edib
 1-4
dekabr 2014-cü il tarixlərində Bakı şəhərində "Təhsil
prosesində uşaqlara şəxsiyyətyönümlü-humanist yanaşmanın
əsasları" mövzusunda seminar keçirilib. Azərbaycan
Respublikasının Təhsil Problemləri İnstitutunun
təşkilatçılığı ilə baş tutan seminarı Rusiya Təhsil
Akademiyasının akademiki, Beynəlxalq Humanist Pedaqogika
Assosiasiyasının prezidenti psixologiya elmləri doktoru,
professor Şalva Aleksandroviç Amonaşvili aparıb.
Dekabrın 1-də "Avropa" otelinin Bakı zalında keçirilən
açılış mərasimində Təhsil Problemləri İnstitutunun
direktoru, hüquq üzrə fəlsəfə doktoru Qulu Novruzov,
əməkdar müəllim, təhsil eksperti Asif Cahangirov, Rusiya
Təhsil Akademiyasının akademiki, Beynəlxalq Humanist
Pedaqogika Assosiasiyasının prezidenti, psixologiya
elmləri doktoru, professor Şalva Amonaşvili, Gürcüstan
Beynəlxalq Humanist Pedaqoqika Mərkəzinin prezidenti,
psixoloq Paata Amonaşvili, Moskvada fəaliyyət göstərən
"Valideyn qayğısı" Beynəlxalq İctimai Hərəkatın sədri
Klara Mansurova, Sankt-Peterburqdakı Ümuminsan dəyərləri
İnstitutunun filial direktou, Ümumrusiya Pedaqoji
Cəmiyyətinin üzvü, psixologiya üzrə fəlsəfə doktoru
Valeriy Voşin və respublikamızın müxtəlif bölgələrində,
eləcə də paytaxtımızda fəaliyyət göstərən bir çox orta
məktəblərin direktorları və müəllimləri, məktəbəqədər
təhsil müəssisələrinin müdirləri, tərbiyəçiləri,
tanınmış alimlər iştirak ediblər.
Mərasimi Təhsil Problemləri İnstitutunun direktoru,
hüquq üzrə fəlsəfə doktoru Qulu Novruzov açaraq seminar
iştirakçılarını salamlayıb və qonaqları təqdim edib.
Bildirib ki, tədbirdə iştirak edən professor Şalva
Amonaşvili məşhur pedaqoq, Rusiya Təhsil Akademiyasının
akademiki, Ukrayna Təhsil Akademiyasının xarici üzvü,
Beynəlxalq Humanist Pedaqogika Assosiasiyasının
prezidenti və humanist pedaqogikanın ideya müəllifidir.
Dünyaca məşhur alim, humanist pedaqogikanın əsasını
qoyan akademik Şalva Amonaşvilinin pedaqogika elminə
verdiyi töhfələrdən danışan Qulu müəllim onun iştirakı
ilə aparılacaq seminarın, təhsil prosesində uşaqlara
şəxsiyyətyönümlü-humanist yanaşma ilə bağlı söyləyəcəyi
dəyərli fikirlərin, mülahizələrin təhsil işçilərimiz
tərəfindən maraqla qarşılanacağına ümidvar olduğunu
deyib.
Çıxış üçün söz alan əməkdar müəllim, təhsil eksperti
Asif Cahangirov professor Şalva Amonaşvili ilə
tanışlığının onun və digər təhsil işçilərinin
inkişafında əhəmiyyətli rol oynamasından, pedaqogika
elminə gətirdiyi yeniliklərdən, dünya elmində humanist
pedaqogikanın əsasını qoymaqla özünəməxsus yer
tutmasından danışıb.
Sonra Şalva Amonaşvili seminar iştirakçıları ilə
humanist pedaqogika haqqında fikirlərini bölüşüb. Qeyd
edib ki, bu gün əsas problemlərdən biri sürətlə dəyişən
cəmiyyətə uyğunlaşmağa qadir bir şəxsiyyət yetişdirmək
və humanist müəllim şəxsiyyətinin formalaşmasında tətbiq
edilə biləcək vasitələrlə mənəviyyatı, nəcibliyi,
alicənablığı üzə çıxarmağı bacarmaqdır. Humanist
pedaqoji düşüncə məktəb həyatının daim yeniləşməsi üçün
imkan yaradır. Onun əsas postulatları- uşağın imkanına
inam, onun orijinal təbiətini üzə çıxarmaq, şəxsiyyət
kimi hörmət etmək, ədalətli olmaq və müasir pedaqoji
düşüncə, öz metodları, formaları ilə tarixi, sosial
milli və iqtisadi şəraitdən asılı olaraq yeni pedaqoji
sistemlərin meydana gəlmasinə şərait yaratmaqdan
ibarətdir. Bütün bunları isə müəllim kollektivlərinin
yaradıcılıq işlərindəki çoxistiqamətli fəaliyyətlə əldə
etmək mümkündür.
Akademik daha sonra hazırda böyüməkdə olan nəslin
xarakterik xüsusiyyətlərindən, müəllimlərin uşaqlara
düzgün yanaşma prinsiplərindən, onlarla rəftarda daha
humanist olmağın zəruriliyindən, bu istiqamətdə diqqət
yetirilməli olan məqamlardan söz açıb.
Onu da qeyd edək ki, Şalva Amonaşvilinin "Təhsil
prosesində uşaqlara şəxsiyyətyönümlü-humanist yanaşmanın
əsasları" mövzusunda apardığı və dekabrın 4-dək davam
edən seminarda təhsil işçiləri tanınmış pedaqoqdan "ustad
dərsləri" almaqla yanaşı, Gürcüstan Beynəlxalq Humanist
Pedaqogika Mərkəzinin prezidenti, psixoloq Paata
Amonaşvilinın təqdimatını da dinləyiblər.
Şalva Amonaşvili ilə ünsiyyətdə olan seminar
iştirakçıları onunla və digər qonaqlarla fikir
mübadiləsi aparıblar. Geniş diskussiya və işgüzarlıq
şəraitində keçən beynəlxalq seminarın sonunda
iştirakçılara sertifikatlar təqdim olunub.
Samirə KƏRİMOVA,
"Azərbaycan müəllimi" |
