Azərbaycan Memarlıq və İnşaat Universiteti (AzMİU) Tələbə Gənclər Təşkilatının (TGT) təşkilatçılığı ilə Azərbaycan Respublikasının İnsan Hüquqları üzrə Müvəkkili (Ombudsman) tərəfindən elan olunmuş insan hüquqlarının müdafiəsi sahəsində ictimai məlumatlılığı artırmaq məqsədilə 18 may – 18 iyun tarixləri “İnsan Hüquqları Aylığı” çərçivəsində  “Crip Camp” adlı sənədli filmin nümayişi baş tutub.

Universitetdən “Azərbaycan müəllimi”nə bildirilib ki, tədbirin əsas məqsədi tələbələr arasında insan hüquqları anlayışının dərinləşdirilməsi, xüsusilə də əlilliyi olan şəxslərin hüquqları sahəsində maarifləndirmənin artırılması olub. Film nümayişindən öncə qısa giriş nitqində insan hüquqlarının universallığı və hər bir fərdin doğuşdan bərabər ləyaqət və azadlıqla yaşamaq hüququ vurğulanıb.

Filmin nümayişi tələbələr arasında dərin təəssürat yaradıb və nümayişdən sonra keçirilən müzakirədə iştirakçılar insan hüquqlarının yalnız kağız üzərində qalmaması, real həyatda hər kəs üçün tətbiq edilməsinin vacibliyi barədə fikirlərini bölüşüblər. Tələbələr, xüsusilə də fiziki məhdudiyyətli şəxslərin cəmiyyətə tam inteqrasiyasının təmin edilməsinin insan hüquqları məsələsində əsas hədəflərdən biri olduğunu deyiblər.

Bu tədbir gənclərin hüquq düşüncəsinin formalaşmasına töhfə verməklə yanaşı, onlarda sosial ədalət, bərabərlik və insan ləyaqəti dəyərlərinə dair daha dərindən anlayış yaratmaq məqsədini daşıyıb.