“2025-2026-cı tədris ili üçün Naxçıvan Muxtar Respublikası Təhsil Nazirliyinin tabeliyində fəaliyyət göstərən peşə təhsili müəssisələrinə 27 adda 35 ixtisas üzrə 700 yerlik Qəbul Planı tərtib olunub. Qəbulun I mərhələsinin nəticələrinə nəzər salsaq görərik ki, 2372 müraciət qeydə alınıb, 498 nəfər qəbul olunub, onlardan 378 nəfər qeydiyyatdan keçib. Boş qalan plan yerlərinə qəbulun II mərhələsində isə 194 nəfər qəbul olunub. Hazırda qeydiyyat prosesi aparılır".

"Azərbaycan müəllimi" xəbər verir ki, bu barədə Naxçıvanda Təhsil işçilərinin sentyabr konfransında Peşə təhsili sektorunun müdiri Rasim Rüstəmov məlumat verib. O bildirib ki, tələbələrdən 138-i təhsilini başa vurub, 121-i müxtəlif səbəblərdən (müddətli həqiqi hərbi xidmət, orta ixtisas təhsili müəssisəsinə qəbul, dərsə davamiyyətin zəif olması, könüllü olaraq tədrisdən imtina və s.) tələbələr sırasından azad olunub, 203 tələbə isə növbəti tədris ilindən təhsilini davam etdirəcək: “Tələbələrin qadın və kişi nisbətinə nəzər salsaq, görərik ki, qəbul olunan 462 tələbədən 269-u kişi, 193-ü isə qadındır”.

O əlavə edib ki, 2024-cü ildən etibarən ilk dəfə olaraq Naxçıvan Muxtar Respublikası Təhsil Nazirliyinin tabeliyində olan peşə təhsili müəssisələrinə işə qəbul prosesi ölkə üzrə mərkəzləşdirilmiş müsabiqə vasitəsilə həyata keçirilir: "2024-2025-ci tədris ili ərzində keçirilən işə qəbul imtahanlarında 1-i istehsalat təlim ustası, 3-ü direktor, 2-si gənclərin çağırışaqədərki hazırlıq rəhbəri, 10-u ümumtəhsil fənləri üzrə müddətsiz, 3-ü isə müddətli müqavilə əsasında olmaqla, ümumilikdə 19 nəfər işə qəbul olunub.

2025-2026-cı tədris ili üçün peşə təhsili müəssisələrində vakant olan ümumtəhsil fənləri üzrə müəllimlərin işə qəbulu üzrə 12 vakant yer müsabiqəyə çıxarılıb, 4 namizəd uğur qazanıb. İxtisas fənn müəllimi və istehsalat təlimi ustası vəzifələri üzrə 71 yer müsabiqəyə çıxarılıb, 3-ü ixtisas fənn müəllimi, 3-ü istehsalat təlimi ustası olmaqla, 6 namizəd uğur qazanıb".