Planetlərin sayına görə bu sistem digərlərini üstələyir. Kəşfin müəllifi Avropa Cənub Rəsədxanasının (ESO) mütəxəssisləridir. Astronomlar Yerdən 127 işıq ili məsafədə, Cənub Əjdahası bürcünə aid HD 10180 ulduzu ətrafında 7 planetin varlığını təsbit ediblər. Ulduzun hərəkətində ("HARPS" cihazı vasitəsilə) dəyişiklik qeydə alan alimlər bunun ətrafda ola biləcək səma cismlərinin qravitasiya təsirindən baş verdiyini əsas götürüblər. Beləliklə, ulduzun 6 iri, 1 də kiçik planetdən ibarət sistemə malik olduğu üzə çıxarılıb. Şüalanmanın təhlili metodikası ilə planetlərin xarakteristikası - sayı, kütlə və orbiti təyin edilib.

Planetlərin 5-i Neptunla müqayisə ediləcək qədər böyükdür. Onların kütləsi Yerdən 13-25 dəfə artıqdır. Ulduz ətrafında dövretmə müddətləri də fərqlidir: Məsafədən asılı olaraq 6-600 gün arasında dəyişir.

Sistemə daxil daha iki planetdən biri (Yerdən 65 dəfə ağır) Saturnu xatırladır, bu kütləli səma obyekti ulduzu ətrafında hərəkətini 2200 sutkaya tamamlayır. Digər planet isə diqqətçəkəndir - Yerdən cəmi 1,4 dəfə böyükdür. Bununla belə, astronomlar bu ekzoplanetdə həyatın ola biləcəyini istisna edirlər. Səma cismi ulduza çox yaxın, qısa orbitə malikdir. Deməli, səthində temperatur həyat üçün yararsız dərəcədə yüksəkdir.

Qeyd edək ki, bu vaxta qədər dünya astronomları (Günəş sistemindən kənar) cəmi 15 planetar sistem kəşf ediblər. Onların hər birinə ən azı 3 planet daxildir.