Noyabrın 9-da təsisçisi Təhsil Nazirliyi olan "Bilik
kuboku" uğrunda breyn-rinq intellektual yarışının
növbəti oyunu keçirilib. Oyun noyabrın sonunda ayın
çempionu adını qazanmaq üçün baş tutacaq görüşün ikinci
finalçısını müəyyənləşdirib. Digər görüşlər kimi bu oyun
da "Baku Crystal Hall"da keçirilib və AzTV kanalı ilə
yayımlanıb.
Görüşdən əvvəl aparıcı DJ Fateh intellektual
yarışmanıın təşkilatçılarına və sponsorlarına
minnətdarlığını bildirib və qaydalarını xatırladıb. Oyun
iki seçim və iki final görüşündən ibarət olub. İlk seçim
görüşündə "Sumqayıt" və "Qəbələ" komandaları
qarşılaşıblar. Sumqayıtlılar tam qələbə qazanıblar: 5:0.
İkinci görüş "Parabellum" ilə "Mingəçevir" arasında
olub. "Parabellum" da rəqibini eyni hesabla (5:0)
məğlubiyyətə uğradıb. Seçim oyunlarından sonra baş tutan
final görüşləri isə həm "Sumqayıt"ın, həm də
"Parabellum"un güclü komandalar olduğunu göstərib: ilk
final görüşündə "Sumqayıt" (5:2), ikinci final görüşündə
isə "Parabellum" (6:3) qalib gəlib. Ona görə də ayın
ikinci finalçısını müəyyənləşdirmək üçün əlavə suala
ehtiyac yaranıb. Həmin sualı tez və düzgün
cavablandıran "Sumqayıt" daha güclü olduğunu sübut edib
və ayın birinciliyi oyununa vəsiqə qazanıb. Qeyd edək
ki, ayın qalibi həm oyunların baş sponsoru olan "Nar
Mobile"nin data kartlarını mükafat olaraq alır, həm də
intellektual yarışmanın finalında oynamaq hüququ
qazanır. Xatırladaq ki, dekabrın 14-də keçiriləcək
finalda sentyabr, oktyabr və noyabr aylarının qalibləri
iştirak edəcəklər.
Yusif ƏLİYEV,
"Azərbaycan müəllimi" |