Azərbaycan Texniki Universitetinin maşınqayırma fakültəsinin əməkdaşlıq etdiyi alman universitetlərinin siyahısına Almaniyanın Lautsiz  ali məktəbi də əlavə olunmuşdur. Qeyd edək ki, bir müddət əvvəl Azərbaycan Texniki Universitetinin rektoru, professor Havar Məmmədov və Lautsiz ali məktəbinin prezidenti, professor Q.Şults tərəfindən Alman Akademik Mübadilə Xidmətinin (DAAD) Şərq əməkdaşlığı  proqramı çərçivəsində maşınqayırma sahəsi üzrə universitetlərarası əlaqələr və kooperasiya yaradılması haqqında  birgə müqavilə  imzalanıb.

Müqavilənin şərtlərinə əsasən, universitetlərarası əməkdaşlıq və kooperasiya yaradılması məqsədi ilə  Azərbaycan Texniki Universitetinin maşınqayırma fakültəsinin dekan əvəzi, dosent Ərəstun Məmmədov Lautsiz ali məktəbində olub və həmin təhsil ocağının rəhbərləri ilə görüşüb.

Görüşdə universitetlərarası əməkdaşlığın davam etdirilməsi məsələsi müzakirə edilməklə yanaşı,bir sıra yeni razılaşmalar da  əldə olunub. Razılaşmaya uyğun olaraq Azərbaycan Texniki Universitetinin maşınqayırma fakültəsinin 15 tələbəsi bu il yay istehsalat təcrübəsini  Lautsiz  ali  məktəbində  keçəcəkdir.

Samirə  KƏRİMOVA