|
Respublikamızda özünün keyfiyyətli təhsili,
yüksəkixtisaslı mütəxəssis hazırlığı ilə tanınan
Xəzər Universitetinin adı artıq dünyanın ən
yaxşı ali məktəbləri sırasında çəkilir. Ali
təhsil ocağında bu günə qədər ümumilikdə 2000-ə
yaxın məzun arzuladığı ixtisasa yiyələnərək
nəinki ölkəmizdə, hətta onun hüdudlarından
çox-çox uzaqlarda müxtəlif sahələrdə uğurla
çalışır və ya təhsillərini davam etdirir.
Elə aprelin 4-də Xəzər Universitetində keçirilən
məzun gecəsində də bu ali məktəbin uğurlu
fəaliyyəti haqqında faktlar bir daha mərasim
iştirakçılarının diqqətinə çatdırıldı. Ali
təhsil ocağının "Dünya" konsert salonunda sayca
28-ci buraxılışa həsr olunan məzun gecəsində
respublikanın bir sıra ali məktəblərinin,
Azərbaycanda fəaliyyət göstərən səfirlik və
diplomatik korpusların nümayəndələri, tanınmış
iş adamları, elm, mədəniyyət, incəsənət
xadimləri, tələbə və məzunlar, onların
valideynləri iştirak edirdilər.
Mərasimi Xəzər Universitetinin rektoru,
professor Hamlet İsaxanlı açaraq ali təhsil
ocağında aparılan işlərdən danışdı. Rektor son
illər ölkəmizin ali təhsil sahəsində mühüm
dəyişikliklərin getdiyini deyərək Xəzər
Universitetində bununla bağlı həyata keçirilən
tədbirlərdən söz açdı. Qeyd olundu ki, yaxşı ali
məktəb əslində yaxşı mütəxəssis hazırlamalı,
burada təhsil alan gəncin məqsədi isə
universiteti bitirdikdən sonra iş axtarmaq yox,
iş yaratmaq olmalıdır. Rektor məzunları əmin
etdi ki, onlar Xəzər Universitetində aldıqları
bilik, əldə etdikləri təcrübə sayəsində böyük
uğurlar qazanmağa qadirdirlər.
Çıxışının sonunda Hamlet İsaxanlı ali təhsil
ocağının 28-ci məzunları olan 108 gənci təbrik
edərək onlara müstəqil həyat yollarında
müvəffəqiyyətlər arzuladı.
Xəzər Universitetinin memarlıq, mühəndislik və
tətbiqi elmlər fakültəsinin dekanı Rafiq Əhmədov,
iqtisadiyyat və menecment fakültəsinin dekanı
Məhəmməd Nuriyev, humanitar və sosial elmlər
fakültəsinin dekanı Cabir Xəlilov, tibb,
stomatologiya və ictimai səhiyyə fakültəsinin
dekan əvəzi Nigar Bağırova və təhsil
fakültəsinin dekanı Elza Səmədova məzunları
təbrik edərək onlara xüsusi məzunluq kitabçası
təqdim etdilər.
Məzun gününə həsr olunan mərasim Xəzər
Universitetinin mahnı və rəqs ansamblının
hazırladığı konsert proqramı ilə davam etdi.
Samirə KƏRİMOVA |
