“Layihənin əsas hədəf qrupu şəhər və rayon mərkəzlərindən kənarda yerləşən ərazilər olsa da, hazırda əhalinin sıxlığı nəzərə alınaraq fəaliyyət şəhər və rayon mərkəzlərini də əhatə edir”.

“Azərbaycan müəllimi” xəbər verir ki, bu fikirləri “İcma əsaslı məktəbəqədər təhsil” layihəsinin meneceri Orxan Cəfərov Təhsil TV-nin “Təhsil saatı” verilişində qonaq olarkən səsləndirib.

O bildirib ki, artıq bu istiqamətdə həmin ərazilərdə də icma əsaslı məktəbəqədər təhsil mərkəzləri fəaliyyət göstərməyə başlayıb: 

“Hazırda bu mərkəzlərin təxminən 75-80 faizi şəhər və rayon mərkəzlərindən kənarda yerləşir, qalan hissə isə şəhər və rayon mərkəzlərində fəaliyyət göstərir”.

Orxan Cəfərov qeyd edib ki, artıq şəhər ərazilərində də insanlar icmalara maraq göstərirlər. Onun sözlərinə görə, hazırda uşaq bağçalarının yerləşməsi bir qədər qeyri-bərabərdir:
“Məsələn, şəhərətrafı ərazilərdə də əhali sayı çoxdur, lakin bağçaların çoxu şəhər mərkəzlərindədir. Bu da valideynlər üçün uşaqları gətirib-aparmaq baxımından müəyyən narahatlıqlar yaradır. Məhz buna görə də biz şəhər və rayonətrafı ərazilərdə icmaların fəaliyyətini genişləndirdikcə bu təşəbbüsə maraq da artır”.
O əlavə edib ki, icmaların uğurlu fəaliyyəti və müsbət nəticələri də marağın artmasına səbəb olur:

“Valideynlər görürlər ki, uşaqların icma əsaslı məktəbəqədər təhsildə iştirak etməsi onların inkişafına, xüsusən də sosiallaşmasına böyük təsir göstərir. İcmalarda 8 ay və ya bir tədris ili ərzində iştirak edən uşaqlarda erkən təhsil vərdişlərinin formalaşması açıq şəkildə müşahidə olunur”.