“Sabahın alimləri”  XIV Respublika Layihə Müsabiqəsinin qızıl medalına layiq görülən Sumqayıt şəhəri 27 nömrəli tam orta məktəbin X sinif şagirdi Eldar Şirəliyev və XI sinif şagirdi Sürəyya Ağazadə “EcoFlow" adlı maraqlı layihə hazırlayıblar. 

Layihənin müəllifləri “Azərbaycan müəllimi”nə bildiriblər ki, bu ideyanı keçən il Bakıda baş verən güclü yağışlar və daşqınlardan sonra düşünüblər: “Həmin hadisələr zamanı iki nəfər həyatını itirmişdi və şəhər infrastrukturu ciddi ziyan görmüşdü. Bu hadisədən təsirlənən yeniyetmələr belə problemlərin qarşısını almaq üçün innovativ bir həll tapmağa qərar veriblər. Onların elmi rəhbəri Aysel Məmmədova olub, prototipin hazırlanmasına isə “Sumbuilders” komandası kömək göstərib. Layihə şəhərlərdə yağış və daşqın sularının daha effektiv və sürətli təxliyəsini təmin edən ağıllı quyu qapağı (lük) hazırlamağa yönəlib: “Lük qapağına yerləşdirdiyimiz sensor suyun hündürlüyünü aşkarlayır və servomotora siqnal göndərir və bu da lükün avtomatik şəkildə açılmasına şərait yaradır. Biz Bakıda yağış suları ilə bağlı yaranan problemləri həll etmək istəyirdik. Layihəmiz aktual bir mövzunu əhatə etdiyindən uğur qazanacağımıza inanırdıq, amma birinci yerə çıxacağımızı gözləmirdik. Bu nəticə bizi daha da ruhlandırdı”.