Azərbaycan Dövlət Neft və Sənaye Universiteti (ADNSU) ilə Böyük Britaniyanın nüfuzlu ali təhsil müəssisəsi Vorvik Universiteti arasında əməkdaşlıq yeni mərhələyə qədəm qoyur. Səfər çərçivəsində ADNSU-nun rektoru dosent Rüfət Əzizov və rektorun elmi inkişaf məsələləri üzrə müşaviri Orxan Kərimzadə universitetin fəaliyyəti ilə yaxından tanış olublar.

Universitetdən “Azərbaycan müəllimi”nə verilən məlumata görə, Vorvik Universiteti Jaguar, Land Rover, Tata Steel, Airbus, Rolls-Royce, BAE Systems, Goodyear, James Walker, Horiba MIRA, Bosch və AVL kimi dünyanın bir sıra aparıcı şirkətləri ilə əməkdaşlıq edir. Bu tərəfdaşlıqlar əsasında mərkəzdə sənayenin tələblərinə uyğun innovativ layihələr hazırlanır, tətbiqi tədqiqatların nəticələri real istehsalatda sınanır və yeni məhsulların inkişafı təmin olunur.

Bildirilib ki, universitetin əsas hədəfi Vorvik Universiteti ilə əməkdaşlığı yalnız təhsil sahəsində deyil, həm də tədqiqat və inkişaf istiqamətində gücləndirməkdir. Bu məqsədlə ölkə üçün strateji əhəmiyyət daşıyan sahələr üzrə birgə layihələrin icrası nəzərdə tutulur.

“ADNSU yaxın gələcəkdə sənaye müəssisələrinə tədqiqat və inkişaf xidmətləri təqdim edən güclü bir universitet kimi formalaşacaq. Bunun üçün tələbə və gənc tədqiqatçılarımızın sənayenin ehtiyaclarını düzgün qiymətləndirməsi və praktiki bacarıqlarını təkmilləşdirməsi mühüm şərtdir,” – deyə rektor Rüfət Əzizov qeyd edib.