“Ölkəmiz üçün 49-cu ICPC Dünya Finalını paytaxtımızda keçirmək böyük şərəfdir. Bu tədbir təkcə bir yarış deyil, dünyanın ən parlaq gənc istedadlarının toplaşdığı bir platformadır. Burada iştirakçılar yalnız rəqabət aparmayacaq, həm də bir-birilərindən öyrənəcək, təcrübələrini paylaşacaq və yeni ideyalar yaratmaq üçün ilham alacaqlar”.  

“Azərbaycan müəllimi” xəbər verir ki, bu fikirləri rəqəmsal inkişaf və nəqliyyat nazirinin müavini Samir Məmmədov 49-cu ICPC Beynəlxalq Universitetlərarası Proqramlaşdırma Müsabiqəsinin Dünya Finalının açılış mərasimində səsləndirib.

O qeyd edib ki, Azərbaycan rəqəmsal transformasiyanı milli prioritet olaraq müəyyən edib. Baxışımız istedadları inkişaf etdirmək, qabaqcıl texnologiyaları gücləndirmək və süni intellekt, kibertəhlükəsizlik və digər müasir sahələrdə irəliləyişi təmin etməkdir:

“Beynəlxalq Təlim Düşərgələri kimi proqramlar vasitəsilə 250-dən çox iştirakçı öz bacarıqlarını inkişaf etdirmək imkanı qazanıb. Bu təşəbbüslər sayəsində yüzlərlə tələbə müxtəlif universitetlərdə  təlimlərdə iştirak edərək istedadlarını artırıb və beynəlxalq yarışlara hazırlaşıblar. Komandalarımızın uğurlarını qeyd edərkən və bizi bu günə gətirən geniş hazırlıqları vurğulayarkən, 49-cu ICPC Dünya Finalının Bakıda keçirilməsini mümkün edən bütün tərəfdaşlara təşəkkürümüzü bildiririk”.