2024–2025-ci tədris ilində Gəncə- Daşkəsən Regional Təhsil İdarəsinin tabeliyində olan ümumtəhsil müəssisələri üzrə ali məktəbə qəbul imtahanı nəticələri maraqlı tendensiyaları ortaya qoyub.
 
“Azərbaycan müəllimi”nin araşdırmasına əsasən, Gəncə şəhəri üzrə 97 məzun 600-dən çox bal toplayıb.

600-dən yüksək bal toplayanların sayına görə regionun lider məktəbi Gəncə şəhəri 27 nömrəli məktəb – liseydir. Bu təhsil müəssisəsinin 9 məzunu qəbul imtahanlarında 600-dən çox bal toplayıb.

Gəncə şəhərində 13 nömrəli tam orta məktəbin məzunu Alı İsmayılov isə 697,05 bal toplayaraq region birincisi olub. 
Goranboy-Naftalan üzrə 24, Samux üzrə 11, Göygöl üzrə isə 11 məzun yüksək bal toplamaqla uğurlu nəticə nümayiş etdirib. 
Goranboy şəhər 2 nömrəli tam orta ümumtəhsil məktəbinin məzunu Nəzrin Yusifova 684 bal, Rəhimli kənd məktəbinin məzunu Günel Həmidova 647,7 bal toplayıb. Samuxun Yuxarı Ağasıbəyli kənd məktəbinin məzunu Nərmin Abdullayeva 627,9 bal toplamaqla kənd məktəblərinin də yüksək nəticəyə nail ola biləcəyini göstərib.

Cins üzrə müqayisədə qız şagirdlər sayca daha çox yüksək bal toplayaraq regionların təhsil uğurlarında dominant rol oynayırlar. Məsələn, Gəncədə Aysu Hüseynova (692,8 bal), Nəzmiyyə Mayılova (672,5 bal) və Fəridə Xudiyeva (673 bal) kimi qızlar yüksək nəticələr əldə ediblər.

Oğlanlar arasında da ən yüksək nəticələrdən biri Alı İsmayılovun (697,05 bal) adına yazılıb. Eyni zamanda Goranboy-Naftalan və Samuxda oğlan şagirdlər 653–655 bal ilə daha çox fərqləniblər.

Nəticələrə görə, şəhər məktəblərində həm qız, həm də oğlan məzunlar arasında nəticələr daha yüksəkdir. Rayon və kənd məktəblərində isə qız məzunlar oğlanlara nisbətən daha yüksək nəticələr göstəriblər. Belə ki, orta bal göstəricisi qızlar arasında 642 olduğu halda, oğlanlarda bu rəqəm 635-dir.

Araşdırma göstərir ki, şəhər məktəbləri ümumilikdə kənd məktəblərini qabaqlasa da, rayon və kənd məktəblərində də yüksək nəticələr göstərən istedadlı şagirdlər az deyil. Qız şagirdlər sayca daha çox yüksək bal toplayaraq regionların təhsil uğurlarında dominant rol oynayırlar.